Csík zenekar

Aus Wikipedia
Zur Navigation springen Zur Suche springen
Der Artikl is im Dialekt Hausrukfiatlarisch gschriem worn.
Csík zenekar
Da Csík Janosch, da Gründa fum Csík zenekar, ba am Konzeat 2009
Da Csík Janosch, da Gründa fum Csík zenekar, ba am Konzeat 2009
Oigmoans
Richtung Foiksmusi, Wödmusi
Grindung 1988
Hoamseitn www.csikband.hu
Aktuelle Bsetzung
Csík Janos (Kabömoasda)
Majorosi Marianna
Hockbredl (Zymbal)
Zsolt Barcza
Bartók József
Kunos Tamás
Makó Peter
Szabó Attila

Des Csík zenekar (ausgschbrocha: Tschik Sänäkor, ungarisch fia: Csík Orchester) is a ungarischn Foiksmusi-Kabön. Se is im 1988a Joa fum Csík Janosch in Kecskemet grindd woan und is seid dem zu ana fu de bekauntasdn folklore Bänds in Ungarn woan, de a intanazional in da Wödmusi-Szene eafoigreich is. A Bsondaheit fum Csík zenekar is, das se oide Liada in ole meglichn Dialekt fum ehemolign hisdoarischn Ungarn singa kinan.

Bändgschicht[Weakln | Am Quelltext weakln]

De Kabön is im 1988a Joa fum Csík Janos grindd woan, dea sis zua Aufgob gmocht hod oide ungarische Foiksmusi zan ausgrom und neich zan intapretian. Dafia hod a in Archiv und oide Biacha Liada gsuacht und fasuacht de mid seina Bänd zan schbün. Wai de oidn Liada oft in regionale Dialekt gsunga woan san und ned im heitign Schriftungarisch, is da Csík Janosch iwan Umweg fu da Musi so a nu a Expeat fia ungarische Dialekt woan. Ea hod sis zum Zü gmocht, de oidn Liada in eanara Oaginalfoam zan singa und ned in ana ans modeane Ungarische aubasstn Foam. Bsondas intressiad haum eam dabai ned neta de Doafliada aus seina Gegend, sondan bsondas de oidn Sochan aus de Regionen de heit neama zu Ungarn ghean, wia oide ungarische Liada aus Simbiaring oda da sidlichn Slowakei.

Des Csík zenekar hod in deara Zeid easchde Eafoig in Ungarn gfeiad und a grose Aufdrid in Budapest ghobt, wos fia a Kabön aus da Provinz goa ned so söbfaschdendli woa. Danem haums a Aufdrid aussahoib fu Ungarn gem, iwaroi doat wo in de Nochbalenda nu ungarischredade Leit dahoam san. Am intanazionaln Publikum bekaunt woan sans im 2000a Joa. Do hod de Bänd im kulturelln Programm fu de olympischn Schbü in Sydney ois Fadreta fia Ungarn gschbüd. Doatn is a de intanazionale Wödmusi-Szene auf ea aufmeaksaum woan. Said deara Zeid hod de Bänd a modeanare Veasionen fu oide Liada aischdudiad und de oide Foiksmusi mid Elemente aus'n Rock, Blues und'n Jazz kombiniad.

De Mitgliada fu da Bänd haum iwa de Joa oiwai wida gwegslt, obwoi a hoata Kean fost in da gaunzn Zeid glaich blim is. De Sengarin, a d'Majorosi Marianna is schau fost gauns fum Aufaung au dabai. Dafoas baim Csík Janosch gsunga hod, woas Denzarin baim Foiksmusikorchester fu da Ungarischn Schdodseisnbau (Magyar Állami Nepi Együttes). Im Zivübruaf is a Leararin. Da Gaingschbüla Szabó Attila is im 1995a Joa dazua kema. Noch'n 2000a Joa hod de Bänd a boa neiche junge Musika aufgnuma, unta aundam in Gwetschnschbüla Barcza Zsolt, dea a des tradizionelle ungarische Hockbredl, as Zymbal, schbün kau.

Im 2002a Joa hed si de Bänd fost aufglest, wia da Csík Janosch an schwan Autounfoi ghobt hod. Dabai is a schwa falezt woan und hod si d'linke Haund an mearane Schdön brocha. Es hod aso ausgschaud, wia waunn a nia wida gaingschbün kintad. De gaunze Foiksmusi-Szene in Ungarn is gschokt gwen. Dawai ea im Schbidoi woa, haum owa de aundan bschlossn, dass auf jedn Foi waida mochan und a Benefizkonzeat oaganisiad, damid da Csík si an gscheitn Dokta loasdn kau. In Kabönmoasda und easchdn Fidla hod in deara Zeid da Szabó Attila gmocht. A boa Monad schbeda iss mid seina Haund a wida bessa woan und duach fü üm is eam sogoa glunga, wida in da oidn Foam a d'Fidl zan schbün.

In de lezdn Joa haum a boa junge ungarische Rockbänds Liada fum Csík zenekar „gecovat“, unta aundam fu Kispál es a Borz und fu da Bänd Quimby. De Veasionen san recht populea woan, bsondas des Liad „Most múlik pontosan“. Daduach is a de Aufmeaksaumkaid fia de Oaginalsveasion wida recht gros woan. De Intapretazion fu Quimby haum si im Intanet iwa drai-a-hoib Millionen Leit auf Youtube augschaud[1], de Veasion fu Csík zenekar sogoa iwa fimbf Millionen[2]. Im 2008a Joa is des Csík zenekar am Sziget-Festival in Budapest auf da Hauptbühne aufdredn.

Diskographie[Weakln | Am Quelltext weakln]

  • 1993 – Boldog szomorú dal
  • 1998 – Tiszta szívvel
  • 2001 – A kor falára
  • 2004 – Be sok eső, be sok sár
  • 2005 – Senki nem ért semmit
  • 2008 – Ez a vonat, ha elindult, hadd menjen…
  • 2010 - Szívest örömest
  • 2014 - A Kor Falára

Fuasnotn[Weakln | Am Quelltext weakln]

  1. Youtube: Quimby - Most múlik pontosan (Staund 30. Meaz 2011)
  2. Youtube: Csík Zenekar - Most múlik pontosan (Staund 30. Meaz 2011)