Der Bulle von Tölz: Eine Hand wäscht die andere
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Eine Hand wäscht die andere |
| Produktionsland | Deitschland |
| Originalsproch | Deitsch/Boarisch |
| Läng | 93 Minutn |
| Oitasfreigob | FSK 12 |
| Einordnung | Staffel 2, Foig 8 12. Foig insgesamt |
| Easchdausstrohlung | 13. Aprui 1997 auf Sat.1 |
| Stab | |
| Regie | Walter Bannert |
| Drahbuach | Franz Xaver Sengmüller |
| Produktion | Ernst von Theumer junior |
| Musi | Kristian Schultze |
| Kamera | Hanuš Polak |
| Schnitt | Ingrid Träutlein-Peer |
| Bsetzung | |
| |
Eine Hand wäscht die andere is a deitscha Feansehfuim van Walter Bannert ausm Joar 1997 noch on Drahbuach van Franz Xaver Sengmüller. Es is de zwejfte Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 13. Aprui 1997 af Sat.1 ausgstroit worn.
Handlung
[Werkeln | Am Gwëntext werkeln]De Resi Berghammer und de Kommissarin Sabrina Lorenz bsuachan in Kogelreuth a Woikampfvaonstoitung zua nächstn Gmoarodswoi. Dort dalems, wia da Student Sebastian Blattner an Buagamoasta Ignaz Rissbacher und an Landrod Siegfried Wallner dableckt. Da Blattner, dea wo ois Gegnkandidat otritt, wiaft eana a Gmauschl vor, unta ondam doss da Forstamtsrod Karl Flemisch af a Amerika-Roas af Kostn vo da Gmoa eiglon worn is, wia ausm natuagschitztn Forst a Haffa Kies braucht worn is. Aft wead da Student af an Wink van Ortsparteivorsitzendn Anton Rambold zamgschlong. Am nächstn Morgn wead da Blattner daschossn in sein Auto gfundn. Ois Tatwoffn wead a Handfeiawoffn Marke Mauser identifiziat.
De Kriminala Benno Berghammer und Sabrina Lorenz konzentrian si zeascht af de politischn Gegna, wei as Opfa an Korruptionssumpf truckaleng woit, oba oa Spua noch da ondan valaft si im Sand.
In da Studentnwohnung z Minga eafoart de Lorenz vo da Hausmoastarin, doss vor oana Woch a fesche Frau mid an rodn Cabriolet mid Däiza Kennzoachn noch an Sebastian Blattner gfrogt hod. Bis vor an hoim Joar soi ea reglmäßi vo oana ondan Frau bsuacht worn sei; olladings san koane Spuan davo z findn.
Wias Alibi van Buagamoasta Rissbacher plotzt, wei da Freind vo seina Tochta eam eascht umara Viatl noch zwejfe bei da Nocht hoamkemma gseng hod, stott scho umara ejfe, gibt ea zua, dos ea a Vahäitnis mid seina Sekretärin Apollonia Perzl hod. Aa schimpft ea driba, doss da Max Blattner, an Opfa sei Bruada, zwoa Joar lang in seina Partei Mitglied woar und vor an hoim Joar austredn is. Ea häd ois ausghoacht und sein Bruada brettlbroad vazejhd.
De Kommissar finden außa, doss as Cabrio da Katja Flemisch van Bauamt gheard. Se häd an Sebastian Blattner zu an Gspräch mid ian Valobtn, an Anton Rambold, ibaredn soin. Bei dera Befrogung entdeckn de Kriminala a große Woffnsammlung, de wo an Voda vo da Katja, an Karl Flemisch, gheard. Da Berghammer mechad an Duachsuachungsbschluss bsorgn, oba de Stootsanwäitin Dr. Zirner wui zeascht Beweis seng.
Wei bei da Woi a weng bschissn worn is, fordad da Landrod Wallner an Buagamoasta zun Ricktritt af, oba dea lahnt ob. Eascht wia da Anton Rambold eam mid ara Woffn und Schauagschichtn unta Druck setzt, untaschreibt da Rissbacher de Ricktrittseaklearung.
Da Max Blattner stejd am Tatort a Gedenkkreiz fia sein Bruada af. Da Benno Berghammer entdeckt dort a Rosn und glabt, doss de Margret Blattner a Vahäitnis mid ian Schwoga ghobt hod. Draf ogsprocha, streits ois ob. Iam Mo Max wiaft da Berghammer Moard aus Eifasucht vor, oba wei da Kommissar koane Beweis ned hod, wead ea nausgschmissn. Wia de Sabrina Lorenz emfois zun Blattnerhof kimmt, hearn de Kommissar a Schiaßarei und rennan hi. De zwoa Buam vo de Blattner ballan mid ara Mauser, wos afm Dochbodn gfundn hom, af Blechbixn. Da Voda kimmt aa dazua und gibt an Moard zua, wei de Eamittla jetzad eh de Tatwoffn ois Beweismittl hom.
Hintagrund
[Werkeln | Am Gwëntext werkeln]Gfuimt worn is z Däiz, am doatign Kalvarienberg und im Klosta Benediktbeiern;[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik
[Werkeln | Am Gwëntext werkeln]De Programmzeitschrift TV Spielfilm schreibt: „Kommunal-Politkrimi mit satirischem Biss.“[2]
Im Netz
[Werkeln | Am Gwëntext werkeln]- Eine Hand wäscht die andere in der Internet Movie Database (englisch)
- Eine Hand wäscht die andere bei Fernsehserien.de
Beleg
[Werkeln | Am Gwëntext werkeln]- ↑ Eine Hand wäscht die andere – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Eine Hand wäscht die andere – Filmkritik bei TV Spielfilm
| Vorherige Foig 23. Meaz 1997: Leiche dringend gesucht |
Episodnlistn | Nächste Foig 22. Feba 1998: Tod am Rosenmontag |