Der Bulle von Tölz: Tod am Rosenmontag

Aus Wikipedia
Zur Navigation springen Zur Suche springen
Der Artikl is im Dialekt Obaboarisch gschrim worn.
Foig der Serie Der Bulle von Tölz
OriginaltitlTod am Rosenmontag
ProduktionslandDeitschland
OriginalsprochDeitsch/Boarisch
Läng90 Minutn
OitasfreigobFSK 12
EinordnungStaffel 3, Foig 1
13. Foig insgesamt
Easchdausstrohlung22. Feba 1998 auf Sat.1
Stab
RegieWalter Bannert
DrahbuachFranz Xaver Sengmüller
ProduktionErnst von Theumer junior
MusiKristian Schultze
KameraHanuš Polak
SchnittIngrid Träutlein-Peer
Bsetzung
Episodnlistn

Tod am Rosenmontag (Orbatstitl: Mord in närrischer Zeit[1]) is a deitscha Feansehfuim van Walter Bannert ausm Joar 1998 noch on Drahbuach van Franz Xaver Sengmüller. Es is de 13. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 22. Feba 1998 af Sat.1 ausgstroit worn.

Handlung[VE | Weakln]

Bei ara Foschingsvaonstoitung wead da Arnold Netzthaler in da Bar vo hint dastochn. De kloane Eistichstej deit af a Oart Stricknodl mid ungfähr 30 cm Läng ois Moardwoffn hi. Obwoi d'Kommissarin Sabrina Lorenz aa dort is, gibt's koane Zeigen ned, wei de Prinzngarde d’Afmeaksamkeit vo olle Bsuacha af si zong hod.

De Monika Netzthaler, de Frau van Opfa, wui zua froglichn Zeit dahoam gschlofn hom; wega ara stoarkn Migräne häds a Schloftablettn gnumma. Fia de Stootsanwäitin Dr. Zirner is dea Foi oba doh kloar, wei d’Witwe de eheliche Trei ned goar so eng gseng hod: Entweda hod de Netzthalerin oda ia Gspusi ian Mo umbrocht – oder boade zammad.

Da Prälat Hinter und da Notar Schmidseder kriang seit a poar Wochan anonyme Drohbriaf in identischem Stij. Wei da Schmidseder af da Vaonstoitung as gleiche Kostim wia as Moardopfa trong hod, kannt sei, doss da Täta de zwoa vawechslt hod.

Ban Seniornkranzl im Pfoarrhoam foid af amoi da Strom aus. Wia da Prälat Hinter si am Sicharungskostn z schoffa mocht, wead ea vo ebban bedroht, dea wo si ois Boandlkrama vakleidet hod. Duach as beheazte Eigreifn vo da Resi Berghammer wead dea ind Flucht gschlong. De Zammahäng zwischn Prälat, Notar und Briafschreiba wean an Kommissar Benno Berghammer kloar, wia sei Muada eam vazejhd, doss da Prälat se ibaredn woit, doss de „Pension Resi“ da Kiachn vamocht. De Notariatsogstejte Eva Lachner nennt an Berghammer oan Foi, wos Zweifl ghobt hod, ob de oide Frau no gwisst hod, wos se do duad.

In da Zwischnzeit hod si außagstejd, doss de Monika Netzthaler in da Tatnocht ned dahoam woar, sondan bei an gwissn Max Roidl; a Nochboarin hod de Frau umara drei aus an Taxi steing gseng. De Stootsanwäitin Dr. Zirner hod drum zwoa Duachsuachungsbefej bsorgt, in da Hoffnung, doss in oana vo de Wohnungan de Moardwoffn gfundn wead. Da Kommissar Berghammer is oba oiwei mehra davo ibazeigt, doss ned da Arnold Netzthaler, sondan da Notar Schmidseder umbrocht wean soit. Mid seina Kollegin Lorenz bsuacht ea an Tobias Schöpplein, an Enkl vo dera Frau, de wo noch da Moanung vo da Eva Lachner geisti neamma gonz af da Heh is. Da Student Schöpplein gibt sofort zua, doss ea de Drohbriaf gschrim hod, wei da Prälat si mid da Huif van Notar vor iba oan Joar as Vameng vo seina Oma untan Nogl grissn hod. Leida kannt ea ned beweisn, doss scho domois neamma zuarechnungsfähig woar. De Kriminala ibazeing si sejba davo, doss de Schöpplein dement is, und frong an Enkl noch sein Alibi. Ea wui dahoam gwen sei und an seina Diplomoabat gschriem hom.

De Duachsuachungan bei da Monika Netzthaler und ban Max Roidl bringan nix. Ois Grund fia ia Liag mid da Schloftablettn gibt de Netzthalerin o, doss se si fia de Affär gschamt häd.

De Kriminala lossn an Notar Schmidseder wissn, doss da Briafschreiba identifiziat worn is, da Mearda oba no frei umanandalaft. Se rodn eam, doss ea ned afn Kehraus geht. Wei da Notar moant, doss de Vaonstoitung vui z wichtig is, stejns an Mearda a Falle. Wia dea im buntn Treim af sei Opfa eisticht, kimmt ea mid da Woffn ned duach – im Kostim steckt ned da Notar, sondan de Kommissarin Lorenz, de wo a Schutzwestn trogt. Da Ogreifa wead ibawäitigt und demaskiat. Es is de Notariatsogstejte Eva Lachner. Ois Motiv gibt's o, doss fimf Joar Lang „sei Eva“ woar, oba donn is a Jingare kemma und se woar wieda d’„Frau Lachner“. Se is sicha, doss da Notar si wega da Neien scheidn losst, und se moant, doss um eam ned schod is.

Am nächstn Dog geht da Benno Berghammer no amoi zun Prälatn Hinter und wui eam ibaredn, doss ea afs Vameng vo da Schöpplein vazicht. Eascht wia da Kommissar odeit, doss zu de Medien duachsickan kannt, af wejche Weis de Kiachn zu deara Eabschoft kemma is, gibt da Prälat noch.

Hintagrund[VE | Weakln]

Gfuimt worn is z Däiz, unta ondam im „Hotel Kolbergarten“;[2] ois Schaublotz fia de „Pension Resi“ homs as Hollerhaus Irschnhausn heagnumma.

Kritik[VE | Weakln]

De Programmzeitschrift TV Spielfilm schreibt: „Eigentlich ist die Reihe ja schon närrisch…“[3]

Im Netz[VE | Weakln]

Beleg[VE | Weakln]

  1. Der Bulle von Tölz: Mord in närrischer Zeit – TV Spielfilm
  2. Tod am Rosenmontag – derbullevontoelz.de
  3. Der Bulle von Tölz: Tod am Rosenmontag bei TV Spielfilm