Der Bulle von Tölz: Mord im Irrenhaus
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Mord im Irrenhaus |
| Produktionsland | Deitschland |
| Originalsproch | Deitsch/Boarisch |
| Läng | 89 Minutn |
| Oitasfreigob | FSK 12 |
| Einordnung | Staffel 3, Foig 4 16. Foig insgesamt |
| Easchdausstrohlung | 10. Mai 1998 auf Sat.1 |
| Stab | |
| Regie | Walter Bannert |
| Drahbuach | Walter Bannert |
| Produktion | Ernst von Theumer junior |
| Musi | Kristian Schultze |
| Kamera | Hanuš Polak |
| Schnitt | Ingrid Träutlein-Peer |
| Bsetzung | |
| |
Mord im Irrenhaus is a deitscha Feansehfuim van Walter Bannert ausm Joar 1998 noch on oagnan Drahbuach. Es is de 16. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 10. Mai 1998 af Sat.1 ausgstroit worn.
Handlung
[Werkeln | Am Gwëntext werkeln]Da Professor Ludwig Roth, dea wo in seina Fiama eafoigreich Motoan fia Pflanzna-Ej entwicklt, wead noch an Sejbstmoardvasuach duach Portwein und Schloftablettn in de gschlossane Obteilung vo da psychiatrischn Klinik eigliefad. Dort wead ea vo da Mitpatientin Klara Huberer tätli oggriffn. Am nächstn Morgn weads dahängt in iam Zimma gfundn. Mid Untastitzung van Polizistn Anton Pfeiffer nimmt da Kommissar Benno Berghammer de Eamittlungan af. Ea is sicha, doss de Frau si ned sejba umbrocht hod, wei ia Mund zuaklebt worn is; außadem san schwoarze Hoar unta iare Finganägl, se sejba hod rode Hoar. Da Professor Roth is Haptvadächtiga, oba de Ausanondasetzung mid da Klara Huberer is fian Kommissar a z schwochs Motiv.
De Andrea Huberer, de Tochta van Opfa, findt a Togebiachl vo iara Muada, wo drinnad steht, doss da Professor Roth da Voda vo da Andrea is, wos dea unumwundn bstätigt.
De Maria Umlauf, a langjährige Mitorbatarin in an Professor Roth seina Fiama, glabt ned, doss ia Chef an Sejbstmoardvasuach gmocht hod, wei ea kuaz vor an Duachbruch in da Motoanentwicklung steht. Zu iam Leidwesn hod aa no an Professor Roth sei Sohn Ferdinand, wo koa Ahnung vo dea Materie ned hod, dawei de Gschäftsfiahrung ibanumma. Wia da Junior sein Voda um zwoa Millionan Mark oschnorrt, dmid ea seine Spuischuidn zoin ko, ruckt da Oide nix außa, obwoi sei Sohn vo seine Gschäftspartna bedroht wead.
D’Resi Berghammer hod an Professor scho imma meng und wui eam bsuacha, oba in da Klinik weads mid ara neien Patientin vawechselt und wega heftiga Gengwehr ruhiggstejd. Ia Sohn Benno, dea wo davo nix woaß, losst se zua Fahndung ausschreim, nochdems an gonzn Dog ned zun Finden is. Am nächstn Dog siagt eas zuafälli in da Klinik und wuis mid hoam nehma, oba se weigad si, weis de Rundumbetreuung zun Schätzn gleant hod.
De Laboruntasuachungan eagem, doss da Strick, mid dem wo de Klara Huberer afghängt worn is, Spuan vo Nussej afweist und de schwoarzn Hoar van Professor Roth kemman. Dea glabt, doss ebba de Spuan glegt hod, nochdem sei ogeblicha Sejbstmoard gscheitat is. Da Benno Berghammer glabt eam dawei, obwoi etlichs fia eam ois Täta spricht. Wia da Professor eafoart, doss sei Sohn de neiestn Konstruktionsplän an brasilianische Gschäftspartna vakafa wui, wead ea granti. Zun Vahindan vo deara Katastroph schickt ea sei Tochta, de Andrea Huberer, bei da Nocht in d’Fiama, wos de Datn lescht, nochdem ea se vo da Klinik aus af an Laptop kopiat hod.
Am nächstn Dog dawischt de Berghammerin oan Mitpatientn im Zimma van Professor und stejd eam zua Red. Wia ea se bedroht, vaspeats de Tia und ruaft mid an Handy ian Buam o, dawei ia Gegna hinta da Tia randaliat. Es is da Fernando Martinez, dea wo zwoa Dog nochm Professor eigliefat worn is, wei ea seina Sekretärin an Laptop an Schädl gschmissn hom soi, wos oba glong is. Wia da Kommissar Berghammer aa no Nussej bei eam findt, vahoft ea eam. Da Martinez sogt aus, doss da Ferdinand Roth gsogt hod, doss ea an Professor zammschlong soi, oba wia dea vo da Klara Huberer attackiat worn is, hod ea gmoant, doss a guade Idee is, wonn ea an Ferdinand sein Voda an Moard ohängt. Do moant da Polizist Anton Pfeiffer, doss da Ferdinand dazua neamma befrogt wean ko, wei dea an da Isar tod afgfundn worn is.
Hintagrund
[Werkeln | Am Gwëntext werkeln]Gfuimt worn is haptsächli z Däiz;[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik
[Werkeln | Am Gwëntext werkeln]De Programmzeitschrift TV Spielfilm schreibt: „Fischers kabarettistisches Talent schlägt in dieser älteren Folge voll durch. Einige der Gags stammen aus seiner eigenen Feder.“ Fazit: „Launige Folge mit irre guten Einlagen.“[2]
Im Netz
[Werkeln | Am Gwëntext werkeln]- Mord im Irrenhaus in der Internet Movie Database (englisch)
- Mord im Irrenhaus bei Fernsehserien.de
Beleg
[Werkeln | Am Gwëntext werkeln]- ↑ Mord im Irrenhaus – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Mord im Irrenhaus – Filmkritik bei TV Spielfilm
| Vorherige Foig 19. Aprui 1998: Tod eines Strohmanns |
Episodnlistn | Nächste Foig 17. Mai 1998: Der Mistgabelmord |