Der Bulle von Tölz: Schöne, heile Welt

Aus Wikipedia
Der Artikl is im Dialekt Obaboarisch gschriem worn.
Foig der Serie Der Bulle von Tölz
OriginaltitlSchöne, heile Welt
ProduktionslandDeitschland
OriginalsprochDeitsch/Boarisch
Läng93 Minutn
OitasfreigobFSK 12
EinordnungStaffel 5, Foig 2
26. Foig insgesamt
Easchdausstrohlung26. Aprui 2000 auf Sat.1
Stab
RegieJörg Grünler
DrahbuachRalph Werner
ProduktionErnst von Theumer junior
MusiKristian Schultze
KameraOtto Kirchhoff
SchnittIngrid Träutlein-Peer
Bsetzung
Episodnlistn

Schöne, heile Welt is a deitscha Feansehfuim van Jörg Grünler ausm Joar 2000 noch on Drahbuach van Ralph Werner. Es is de 26. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 26. Aprui 2000 af Sat.1 ausgstroit worn.

Handlung[Werkeln | Am Gwëntext werkeln]

Da Schlogastar Tony Gordon gibt a Konzeat im Däiza Kurhaus. D’Resi Berghammer wui a Autogramm vo eam hom und gehd in sei Garderob. Dort findts eam mid on Briafeffna dastocha am Bodn lieng und kriagt im nächstn Moment a Champagnafloschn on an Hintakopf. Wia ia Sohn, da Kommissar Benno Berghammer, bsorgt am Tatort eitrifft, is se oba scho wieda munta und wui aa sofort a Zeignaussog mocha, oba da Benno wui, doss zeascht im Kranknhaus untasuacht wead.

Da Grichtsmedizina Dr. Robert Sprung stejd fest, doss da Stichkanoi im letztn Driddl aus zwoa Tei bsteht. Da Täta muass oiso de Woffn a Stickl weid außazong und no amoi zuagstochn hom. Eascht da zwoate Stich hod de linke Heazkomma troffn und zun Tod gfiahd.

Da Benno Berghammer und de Sabrina Lorenz stejn fest, doss as Moardopfa mehra Feind ois wia Freind ghobt hod: Da Bassist Max Unger, wega seina Kokainsucht dauand pleite, hod kuaz vorm Konzeat no a Ausanondasetzung mid sein Chef ghobd; de ned bsondas talentiate Sängarin Franziska Schmirl hod si a steile Karriere dahofft, wonns mid an Tony ins Bett geht; und da Tony woit sein Manager Charlie Forster nausschmeißn, wei dea Tantiemen untaschlong hom soi. Aa sei Ehefrau Susanne Hödlmoser und seine Stieftechta Kathrin und Maria zoang si ned grod schockiat iba an Tony Gordon sein Tod.

D’Resi Berghammer nutzt iare Position ois oanzige Zeigin aus und gibt an Lokalreporta Goetz van „Tölzer Kurier“ fia 850 Mark a Interview. Da Benno is granti, wei sei Muada Details ausblaudad hod, de wo ned and Effentlichkeit kemma soidn.

Da Foi nimmt a gache Wende, wia de 14-jährige Maria Hödlmoser on Sejbstmoardvasuach untanimmt. Se ibasteht an Sprung van Schuidoch fost unvaletzt, oba se valiat ia ungeborns Kind.

De Kriminala eafoarn van Zeidungsreporta Goetz, doss da Tony Gordon af mindajährige Diandln gstondn is. Ea untamauat des mid oadeitige Buidln. Aft lossns on Gentest ban Fetus mocha, dea wo zweiflsfrei eagibt, doss da Tony Gordon sei Stiaftochta gschwängat hod. Draf ogsprocha, sogt de Muada vo da Maria, doss nix davo gwisst hod. De Sabrina Lorenz hoid dageng, doss sogoar da Klassnlehrarin a Vaändarung on da Maria afgfoin is. Dazua moant d’Susanne Hödlmoser, se häds hoid ned woahrhom woin. De Kommissar konfrontian se mid da Zeignaussog, doss ia Tochta Kathrin ban Valossn vo da Garderob gseng worn is. Aft gibt's aa zua, doss ian Mo umbrocht hod, oba ban Nochstejn vo da Tat stejd si außa, doss koa Ahnung van Heagong ned hod.

De Kathrin Hödlmoser kimmt afs Kommissariat und gsteht iaraseits an Moard. Ois Motiv gibts an sexuelln Missbrauch vo iara Schwesta o. Se sejba is obm 11. Lemsjoar emfois vo iam Stiefvoda missbraucht worn. Ea hod ia domois droht, doss ea se und si sejba umbringt, wonns jemandn ebbs davo vazejhd. Wias im Oita vo 16 Joar vo dahoam auszong und zu iam Freind ibasiedlt is, hods iam Stiefvoda droht, doss an d’Effentlichkeit geht, wonn ea si jemois on da Maria vagreift. Ea hod ia vasprocha, doss ea’s bleim losst. Wias jetzad oba vo da Schwongaschoft eafoarn hod, is se zu eam in d’Garderob gonga und hod eam zua Red gstejd. Wia ea si außaredn woit, hods an Briafeffna gnumma und oamoi zuagstocha. Ea is zammbrocha und hod jämmalich gwinslt, do is de Kathrin nausgrennt.

Jetzad, wo de Tätarin feststeht, is no de Frog offn, wea d’Resi Berghammer niedagschlong hod. Da Benno Berghammer traut da Kathrin Hödlmoser ned zua, doss ara oidn Frau a Floschn iban Schädl zong hod. Außadem deit da dopplte Stichkanoi af on zwoatn Täta hi. An Berghammer kimmt des vadächtig vor, doss d’Franziska Schmirl bei eanara letztn Begegnung so doa hod, wia wonn zwischn an Tony Gordon und sein Manager ois in Ordnung gwen warad. Es schaugt aso aus, wia wonn da Charlie Forster se vorgschickt häd, dmids eam bei da Polizei bessa dosteng losst. Wei de Kriminala koane Beweis gegan Manager ned hom, stejns eam a Falle: D’Resi Berghammer kriagt a vasteckts Funkmikrofon und soi ban Charlie Forster on Eapressungsvasuach Mocha; ia Sohn und sei Kollegin hoidn si im Hintagrund und hearn mid. Wia de Berghammerin an Manager so weit hod, doss ea frogt, wia vui se fias Maihoidn valongt, sogts, doss hoid gnua braucht, doss af Mallorca a neichs Lem ofonga ko. – „Mallorca“ warad as Stichwort zun Eigreifa gwen, oba de Kommissar hoffn, doss no mehra eafoarn. Eascht wia da Charlie Forster de Berghammerin attakiat, greifns ei und vahindan an zwoatn Moard.

De gschäftstichtige Resi Berghammer mocht aa des Ealebnis zu Gejd: Fia 2000 Mark vakaffts de „Story“ On an „Tölzer Kurier“.

Hintagrund[Werkeln | Am Gwëntext werkeln]

Gfuimt worn is z Däiz und z Berg am Starnberga See (Bootsweaft);[1] ois Schaublotz fia de „Pension Resi“ homs as Hollerhaus Irschnhausn heagnumma.

Im Netz[Werkeln | Am Gwëntext werkeln]

Beleg[Werkeln | Am Gwëntext werkeln]

  1. Schöne, heile Welt – derbullevontoelz.de (Memento vom 29. Aprü 2016 im Internet Archive)