Der Bulle von Tölz: Eine tödliche Affäre

Aus Wikipedia
Zur Navigation springen Zur Suche springen
Der Artikl is im Dialekt Obaboarisch gschrim worn.
Foig der Serie Der Bulle von Tölz
OriginaltitlEine tödliche Affäre
ProduktionslandDeitschland
OriginalsprochDeitsch/Boarisch
Läng88 Minutn
OitasfreigobFSK 12
EinordnungStaffel 5, Foig 1
25. Foig insgesamt
Easchdausstrohlung10. Mai 2000 auf Sat.1
Stab
RegieWigbert Wicker
DrahbuachMichael Lerchenberg
ProduktionErnst von Theumer junior
MusiKristian Schultze
KameraLothar Elias Stickelbrucks
SchnittIngrid Träutlein-Peer
Bsetzung
Episodnlistn

Eine tödliche Affäre is a deitscha Feansehfuim van Wigbert Wicker ausm Joar 2000 noch on Drahbuach van Michael Lerchenberg. Es is de 25. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 10. Mai 2000 af Sat.1 ausgstroit worn.

Handlung[VE | Weakln]

Da Wolfgang Spann findt an Motorrollafoara, wo si darennt hod. Da Tode is da Eiscafébsitza Giulio Traghetto. Da Grichtsmedizina Dr. Robert Sprung stejd fest, doss as Opfa mid an Seidntiachl stranguliat worn is. Außadem is eam afgfoin, doss de Toschn vo da Leich umdraht worn san, wia wonns ebba duachsuacht häd.

Laut Angelo Traghetto hod sei Bruada Giulio an Dogesumsotz oiwei mid hoam gnumma, desmoi rund 6000 Mark. Drum gengan de Kriminala Benno Berghammer und Sabrina Lorenz vo Raubmoard aus. Wias an Wolfgang Spann dahoam afsuacha woin, haut dea mid sein Auto ob. Wia da Polizist Anton Pfeiffer eam dawischt hod, wead unta da Fuaßmattn vo an Spann sein Auto as vaschwundne Gejd gfundn. An Diabstoi gibt ea zua, oba midm Moard wui ea nix z doa hom.

An Benno Berghammer sei Muada Resi spuid in da Theatagruppn van Prälatn Hinter d’Miss Marple im Agatha-Christie-Stickl „Mord im Pfarrhaus“ und steigad si so weit nei, doss se si goar im Privatlem mid da Roin identifiziat und zun Benno sein Leidwesn af englische Oart kocht. Se glabt, doss de Mafia hintam Moard steckt, und nimmt ian Dauapensionsgost – a gwissa Herr Springer – mid af Eamittlungstour. Nochdems in da Fuaßgängazone a Zeidl umasunst Ausschau noch Mafiosi ghoidn hom, gengans ins Eiscafé van Giulio Traghetto, wo se a Gspräch zwischn da Elena und an Angelo midhearn. Aus de afgschnopptn Wortfetzn schliaßns, doss de zwoa – Frau und Bruada van Opfa – a Gspusi hom und da Elena ia Tochter Giovanna nix davo woaß – oiso koa Mafiamoard, sondan Moard aus Liab ois Raubmoard tarnt. Mid deara Theorie plotzn de Berghammerin und da Springer in de Vanehmung van Wolfgang Spann, wean oba van Kommissar nauskomplimentiat, wei ea davo ibazeigt is, doss da Spann da Täta is. De Kollegin Lorenz ko si dageng scho vorstejn, doss ebbs dro is, weis gseng hod, doss de Giovanna, de Tochta van Opfa, hinkt. De Valetzung kannt vo on Stuaz van Motorrolla kemma. Da Benno Berghammer widaspricht, wei de Giovanna a Alibi vo iam Freind Andreas hod, dea wo se zua froglichn Zeit hoamgfoarn hom wui, oba d’Sabrina Lorenz hoid dageng, doss ia easchta Liabhoba aa anjedn Meineid fia se gschworn häd. Do foid an Kommissar ei, doss ea bei da letztn Theataprob gseng hod, wia de Giovanna bei ara bstimmtn Szene in echte Tränan ausbrocha is.

De Berghammerin und da Springer hearn in da Nochboarschoft vo da Famij Traghetto, doss da Giulio reglmäßig Frau und Tochter vadroschn hod und sei Bruada Angelo zu seina Schwägarin gonga is, soboid da Giulio s Haus valossn hod.

Van Prälatn Hinter eafoarn de Kommissar, doss de Giovanna moastns vo iam Voda vo da Theataprob obghoit worn is, wei ea ned woit, doss sei Tochta midm Andreas zamm is; außadem häd da eifasichtige Voda seina Tochta de oane oder ondane Watschn gem. D’Elena Traghetto sogt dageng aus, doss normal da Andreas ia Tochta vo de Probn hoambrocht hod, aa desmoi. Se wui ghead hom, wia da Rolla vorm Haus steh bliem is, donn war de Giovanna zu ia ins Schlofzimma naufkemma und häd ia a guade Nocht gwinscht, wia oiwei hoid. Zun Vahäitnis zwischn Voda und Tochta wuis nix song.

Wia de Kriminala de Giovanna festnehman, gibt da Andreas zua, doss ea seina Freindin a foischs Alibi gem hod. De Giovanna sogt aus, doss ia Voda se vo da Prob obghoit und se untawegs a Hur gschimpft hod, und wias zruckgschrian hod, doss se si neamma ois gfoin losst, hod ea se van Rolla gstessn und vadroschn. Donn is ea weidagfoarn und se hod danem healaffa miassn. Ea hod gsogt, wenn ea an Andreas no amoi in iara Näh siagt, donn daschlogt ea olle zwoa. Aft hod ea se wieda afsitzn lossn und is weidagfoarn. Do hods sei Hoistiachl mid boade Händ zuazong. Se san in d’Wiesn gfoarn und umgfoin, donn is se hoamgonga.

Hintagrund[VE | Weakln]

Gfuimt worn is z Däiz (unta ondan Eisdiele „Garda“) und z Gaißach (Unfoiort);[1] ois Schaublotz fia de „Pension Resi“ homs as Hollerhaus Irschnhausn heagnumma.

Kritik[VE | Weakln]

De Programmzeitschrift TV Spielfilm schreibt: „Krimioriginal mit bayrischer Gemütlichkeit.“[2]

Im Netz[VE | Weakln]

Beleg[VE | Weakln]

  1. Eine tödliche Affäre – derbullevontoelz.de
  2. Der Bulle von Tölz: Eine tödliche Affäre – Filmkritik bei TV Spielfilm