Eisenhammer (Hasloch)

Da Eisenhammer Hasloch is a historische Hammaschmied bei Hasloch im bayerischn Spessart. Er wead vom Haslochboch otriem.

Gschicht

Da Eisenhammer is am 24. Meaz 1779 grindt worn, wia de domois gmoansam regiarendn drei Grafen von Löwenstein-Wertheim den Briadan Tobias und Johann-Heinrich Wenzel aus Neulautern an Erbbstandsbriaf fian Bau vo am Eisenhammer ausgstejd hom.^[1]

Mit dena no heit voi funktioniarendn Eihrichtunga wean de untaschiedlichstn Schmiedteile produziat, vor oim owa Kleppl fia Kiachaglockna mid oana fia a Freiformschmied unglablichn Prezision (±2 mm).^[2] Des Wossaradl treibt iwa d Nockn aufm Wellbaam in Hammastui vom Aufweafahamma noch om, dea wo bam Owafoin - duach sei oagnas Bärgwicht vo 170 kg - des gliahade Eisn vafoamt, des wo afm Amboss liegd. Mid jeda Nockn wiedahoit se dea Vuagong. Obahoib vom Hammastui is da sognennde Prella obrocht, dea wo a zweits Houchweafa vom Hamma vahindat und duach sei Fedakroft in Schlog vasteakt.^[1]

Da sognennde Schwounzhamma is a kloanara Hamma, bei dem d Nocken afn Schwounz vom Hammastui druckn und doduach es Hem vom Hammerstui bewiaka. Da gusseisane Kammring afm Wellbaam hod 15 eikeite Nockn, wos a schneje Schlogfoig vom Hamma mid am Bärgwicht vo 135 kg bewiaka. Unta dem Hamma san friaha jeds Joar bis 50.000 Pfluagschorn ausgschmiedt worn.