Formschluß

Der Artikl is im Dialekt Obaboarisch gschriem worn.

Mid am Formschluss moand ma in da Technik a Vabindung vo zwoa Drima de zsammhoidn wei's Formen hom, de inanonda greifn. D'Voraussetzung is, doss se de Drima an Flächn beriahn, af dene de z'iwatrongne Kroft senkrecht stähd. Wennst a Drum on am ondan festschraubsd, ko des nimma oghom wean, wei da Schraumkopf gressa is ois des Loch. De Kroft zan Ohem wiakd vo da Obafläch vo dem Drum af'd Untaseitn van Schraumkopf. S'Vaschiam vo dem Drum is a ned megli, des liegd owa on am Kroftschluss. Wenn zwoa Drima mid Possstift vabundn wean, donn ko ma's zwoar ohem, owa nimma vaschiam, wei ja de Stift in de Lecha stecka. De Innaseitn vo de Lecha iawadrogd de Kräft af de Aussnseitn vo de Possstift und so af des ondre Drum. Streng gnumma is as Afanondaleng vo Drima aa a Formschluss. De kenna ned inanonda vasinka, wei d'Gwichtskroft af de Obaflächn van nexdn Drum drunta iawadrong wead.