God

Der Artikl is im Dialekt Niedaboarisch gschriem worn.

A boar Beispui vo God-Doarstejunga

A God oda a Geddin (dt. Gott, engl. god) is a iwanatialigs Wesn, wo vo d Menschn ganz untaschiedli gseng wead. Des gehd vo menschnehnlign Wesn bis zua voistendign Abstraktion. Gedda hom owa imma a grousse Mocht und Kroft, a absoluts Wissn und a unhoamlige Presenz. Se gejtn oft ois oimachti, oiwissad, oigengwerti und wean bsundas vaeahd.

Im Kristndum gibts nua oan God und dea wead aa Heagod gnennd. A boor andan Religiona ham aa nua oan God, de Moslems in Allah, de Judn vaeanna unterm ganz heiling Nama Jahwe. An Haufa Religiona ham mehrane Gedda. Sgibt owa aa Leit, de net glaam, dass ibahapts an God gibt, de nennt ma Atheistn. Owa d moastn Buddhistn glaam, doss koan God ned gibt.

Wos ganz wos ondas is de Frog, wea oda wia oda wos da God oagntli is. Des iss aa, wos de Atheistn oagntli moanan; ned dass koan God gibt, sondan dass jedenfois an kristlichn God ganz gwis ned gem soiadad oda, bei a poor Atheisten ganz krass, dass da Mensch sejba God waar. Wobei ma nacha frong miassat: moanan de jedn oanzlnan, moanan de irgadwos wia in Begriff Menschheid oda moans ebba gor si sejba. Da Sartre zum Beispui moant si sejba, wei obs andane Menschn gibt, woasa gor ned, er woas bloos (bzw. moant), dass "sei Existenz seina Essenz vorausgeht" - wos de studiade Variante davo is, dassa sie sejba fias häxste Wesn oda hoid God hoit.

Vo kristlichm Standpunkt ko ma eam si am bestn voastejn ois an Heilign Geist, dea ibaroi zuaschaut, ois midkriagt und fois notwendi aa eingreifa ko, indema an Engl schickt oda glei ebban dazua bekehrt oda leicht sogor indem a de Sach häxstpersenli ind Hand nimmt. Aussa a poor Anhoitspunkte wissma do oba nix. Nedamoi de Kirch mit eana Offenbarung wissens, und sogn des aa sejba. Wos de oba aa sogn is: De poor Sachan, desa si sogn traun, de stimman aa.

Zwecks da Vaehrung, de am Herrgod zuasteht, muass ma laut Kirch anam jedn Sunnda in Godsdeanst geh und bätn. Bei de Katholischn muas des d Mess sei.

Ogeseng vom Begriff "God" gibts no den Begriff "Gedda". Des is a bissl wos andas, nämli koa häxts Wesn, sondan bloos a Art Engl, Ibamensch oder Naturgwoit. Do hom de oidn Griachn und Rema und vui andane an ganzen Haffa vaschiedane Gedda ghobt. Ois "God" in unsam Sinn homs da oba entweda gor koan ogseng oder häxstns an Jupiter, oda wia immer der häxste vo dene dann ghoassn hod, oda aa-r-a unpersenlichs Schicksal. Heit is des no aso bei de Hindus; des, wos mia God nennan, hoasst bei dene Brahman und is so a Art Wejdgeist oda oigmoans geddlichs Wiakn; de häxtn vo dene eanane Gedda hoasn Wischnu, Brahma (den wos ma ned mid Brahman vawexln deaf) und Schiwa. Schlaue Menschen wia da Euhemeros hom vamuadt, daß de ganzn Gedda moastns Menschn, zum Beispui Kenige worn, de ma nach eanam Doud vaehrt hod.

D Judn und Kristn hom mid da Vaehrung vo de Gedda aufgrammt. Laut dene is as Kennzoachn vo de guadn Engln grod dass s grod ned mit dene Ehren obätt wern woin, de am Herrgod alloa zuastengan. Aussadem hod zum Beispui da heilige Augustinus den Vadocht ghobt, dass de vaehrtn Gedda vo de Heidn in am Haffan Fej nedamoi bloos eibuit worn, sondan schlimma no, bäse Geista, oder dass sie de Geista wenigstns in de Vaehrung eigschlicha hom, um d Menschn vom oanzign God obzumlenka.

Im Netz

 Commons: God – Sammlung vo Buidl, Videos und Audiodateien

• The Big Religion Chart (Religionfacts.com)
• William Wainwright: „Concepts of God“ in da Stanford Encyclopedia of Philosophy (englisch, inklusive Literatuaogobm)