Groußa Foikastoa
| Groußa Foikastoa Großer Falkenstein | ||
|---|---|---|
| ||
| Häh | 1315 m | |
| Log | Bayern, Deutschland | |
| Beag | Boarischa Woid | |
| Geographische Log | 49° 5′ 3″ N, 13° 16′ 48″ O | |
| ||
Da Grouße Foikastoa (amtl.: Großer Falkenstein) is a 1315 Meta houa Berg im Boarischn Woid, za. fimf Kilomäda siidesdle fo Boarisch Eisnstoa im Nationalpark Boarischer Woid.
Drom afm Gipfe is a Schutzheisl fom Boarischn-Woid-Varein, Sektion Zwiesl, des im Summa oi Dog und im Winta an de Wochaendn offa is. Siwanachtn gäd aa. Baud woan iss im Hirgschd 1932 fom Straubinger Stodbaumoasta Oskar Schmidt, am 7. Jenna 1933 hodas da Effadlekeit iwagem und am 15. und 16. Juni 1933 is im Rama foa Fäidmess fom domoign Ludwigsthoia Pforra Maier eigweihd woan. Scho domois hom 30 Leid iwanochtn kina. 1975 is des Heisl renowiad woan und dano hom 60 Leid duad an Blooz kod.
Fom Gipfegreiz hodma an weidn Ausblick afn Groussn Arba, an Groussn Ossa, af d Stod Zwiesl und an Groussn Rachl.
Da Aafstieg zan Gipfe is iwa de Wandaweg Heidlbeer, Eibe, Silberblatt und Esche mit de Ausgangspunkte Zwieslawoidhaus, Greizstraßl und Scheiaeck in zwoa Stund megle. Sengswert is de Höibochgspreng, a Fäisngebiet woua Bo (Bach) in da Schluchd aussaduad und se in Rinnsoin und Wossafoin owe za Höibochschwäi, in an gloan Sää nei wiafd. Da Weg dohi und weida, is owa ooschdrengad und grod wos fia dräniade Wandara und Woidlaifa.
Wesdle is 125 Mäda duifa da Gloa Foikastoa, emfois a achtnswerta Aussichtspunkt.