Kaspanaze Simma
| Der Artikl is im Dialekt Hausrukfiatlarisch gschriem worn. |
Da Kaspanaze Simma (ausgschrocha: Koschbanatze Simma, oagentli: Kaspar Ignaz Simma; * 27tn Septemba 1954) is a foararlbeaga Baua und friarana Politika. Ea ghead zu de „Urgestein“ fu de Greanan in Östareich und woa in de 1980a Joa oana fu de prominentasdn Fadreta fu deara domois nu gauns neichn Poatai. In lezda Zeid iss a weng ruiga um eam woan und ea lebt wida ois Söbstfasoaga af seim Bauanhof im Bregenza Woid.
Sai Lem[Werkeln | Am Gwëntext werkeln]
Aufgwogsn is da Kaspanaze auf am Bauanhof in Andelsbuch im Bregenza Woid. Des is gauns im Wesdn fu Estareich, im Bundeslaund Foararlbeag, wo schau neama Boarisch sondan Alemannisch gret wiad. Wia in deara Zeid ibli, woan sei Familie politisch gseng diafschwoaze katholische Bauan und aso is a da Kaspanaze oisa Junga zeascht amoi zum Jungbauernbund fu da ÖVP dazua gaunga. Ea hod si owa oiwai schau recht fia d'Natua und in Umwödschutz intressiad und is desweng a in de frian 1980a Joa in a Oawadsgruppn beruafn woan, de a soziale und ökologische Neiausrichtung fu de Schwoazn unta dem Naum „Modell Vorarlberg“ propagiad hod. Des Konzept is owa bai de oidauigsessan Schwoazn im Ländle ned bsondas guad aukema und im 1983a Joa hod de Poatai dageng gschdimt, das des offiziell ins Poataiprogramm aufgnuma wiad.
Da Kaspanaze woa af des aufi augfressn af de Schwoazn und is desweng zu da domois nu recht jungen greanen Bewegung dazua gaunga, de owa zu deara Zeid nu aufgschblitat woa in biagaliche und linke Grupm und faschidane regionale Biagainiziativn. In Foararlbeag hods de Alternativen Liste Österreichs gem, de in Kaspanaze im 1984a Joa ois Schbiznkandidat fia d'Laundtogswoi aufgschdöd hod. In am Woibündnis mid de biagalichn Vereinten Grünen Österreichs is eana dabai a Iwaroschungseafung glunga und se haum 13 Prozent fu de Schdiman kriagt. Da Kaspanaze is auf des aufi Obgeodneta im foararlberger Launddog woan.
Dua sei unkonventionelles Aufdredn - ea hod im Feanseng Dialekt gredt, an laungen Hippy-Boat ghobt und oiwai so boachande Pfoadn aunghod - is a schnö berümt woan, a aussahoib fu Foararlberg. Zan Baischbü hod a am Woiobnd söwagmochtn Beagkaas an de Politika fu de aundan Poatain ausdaid und dafau gredt, das ma a im politischn Gegna oiwai as Guade seng soid und a „Politik der Liebe“ mochn soid. De Situazion in Foararlberg woa in deara Zeid insofean bsundas, wai de biagalichn Greanen (VGÖ) und de linken Greanen (ALÖ) sunst iwaroi ideologisch zaschdridn woan und separat kandidiad haum. Desweng haums a niagends so fü Prozent dareicht wia doatn. Ois Obgeodneta hod si da Kaspanaze fian Umwödschutz recht auigsezt, hod fasuacht neiche Wossakroftweak zan fahindan und woa foa oim a lautschdoak geng de Wiederaufarbeitungsanlage Wackersdorf demonsdriad, de in deara Zeid im benochbatn Boan baud wean hed soin.
Im 1989a Joa, ba da negsdn Launddogswoi haum si daun a de Grean in Foararlbeag zschdridn und haum separat kandidiad. De biagalichn VGÖ, fia de da Kaspanaze audredn is, haums so neama in Launddog aini gschoft. Eascht 1994, wo de zwoa Grupm wida midanaund audredn san, is eana des wida glunga und da Kaspanaze is nu amo fia fimbf Joa bis 1999 Obgeoadneta woan. In deara Zeid woan de Greanen schau a weng meara a etabliate Poatai, de a in Wean im Nazionalrod drin woa, und aso hod ma aussahoib fu Foararlberg in de Medien fum Kaspanaze neama aso fü ghead. Des is a drau gleng, das innahoib fu de Greanen oiwai meara de linke, schdodarische Frakzion as Zepta in d'Haund gnuma hod und so Bauanschedl wia da Kaspanaze an'dn Raund drengt woan san.
1999 hod a desweng frustriad neama kandidiat und seid dem konzentriad a si wida gauns auf de Oawad af seim oagan Bauanhof, den a ois Söbstfasoaga betraibt. Maunchmoi is a owa nu öffentli zan seng, waunn a wo an Foadrog gibt.
Im Netz[Werkeln | Am Gwëntext werkeln]
- Vorarlberg Online: Einzug der `Grünen´ in den Landtag, Artikl iwan Aufschdig fu de Greanen in de 1980a Joa
- Aurora-Magazin: In Fülle leben - Vom guat’n Platz, Artikl fum Kaspanaze Simma
- Datum: Letzte Fragen an ... Kaspanaze Simma - „Ich höre immer nur Schlagwörter“ (Seite nicht mehr abrufbar; Suche in Webarchiven), Interview mim Kaspanaze, Datum-Ausgob 10/2007