Lobau

Der Artikl is im Dialekt Ostestareichisch gschriem worn.

De Lobau is a Augebiet vo da Donau im Ostn vo Wean. Da greßte Deu vo iare ziaka 2300ha is aufm Weana Stodgebiet, klanare Stickln san in Niedaöstareich.

De Weana Aunteule ghean zan Woid- und Wiesngiatl vo da Stod und san wichtig fia de Naherholung vo de Weana. Außadem gibts duatn aa no des Grundwossaweak Lobau, wööchanes in Spitznzeitn de Woassavasuagung vo da Stod sichastööd. A wichtige Roin spüüt aa da Naturschutz: de gaunze Lobau is Ramsar-Schutzgebiet, Natura 2000 Gebiet und a Deu vom Nationalpark Donauauen.

Laundschoft und Nutzung

De Lobau sööwa kaumma in zwa Höftn deun: in de oware (im Noadwestn) und de untare Lobau (im Siidostn). De Grenz zwischn de zwa Deule is in ziaka de Trassn vom Donau- Oder- Kaneu, owahoib vom Ööhofn. Paralöö zua owaren Lobau rennd is untare End vo da Donauinsl. Da Moachfööddaumm schneidt in Auwoid von da Donau oo; zweng dem gibts in da Lobau kaa Hochwossa meah, wia s in an natialichn Auwoid vuakummt. A bsundare Bedeitung hod de Lobau ois Naherholungsgebiet von Wean. Greßare Natuabodeplätz findt mar auf da Panozzalockn in da owaren und bein Dona- Oder Kaneu in da untaren Lobau.

Quer duach de Lobau geht da Radlweg vo Wean noch Pressbuag, wööchana östlich vom Ööhofn aufn Moachfööddaumm weidageht. Aufn greßten Deu vo da Flächn stockt Auwoid; bsundast in da owaren Lobau san owar aa Fööda eigstraat. A weidare Bsundaheid san aa de Haaßländn. Des san trockane, steppmoatige Wiesnflächn auf an schoodrign Grund, de wos kaan Kontakt midn Grundwossa haum. Außadem ziang si etliche Oidoame duachn Auwoid, Restln vo de ehemolign Donaulaundschoft vua da Regulierung. Duach des, dass de Lobau duachn Moachfööddaumm vo da Donau oogschniddn is, woar iwa etliche Joahre de Gfoah, dass de Lobau und iahre Oidoame ausdrickat. Seid 1992 schaud de Weana Stodvawoidung, dass des in Griif kriagt, indem das ma Wossa aus da Donau einapumpt.

De Schlocht bei Aspern

Aum 21 und 22. Mai 1809 hod de Lobau aa in da Schlocht bei Aspern -de easchte Niedalog vom Napoleon- a Roin gspüüd. Da Kaumpf sööwa woa zwoar im offanan Fööd und in de Uatschaftln Aspern und Eßling (heitzdog Deule vo Wean); owa noch da Schlocht hod si da Napoleon auf de Lobau, de wos domois ar Insl woa, zruckzogn. Duatn woa daun fia meahrare Wochn sei Hauptquartier.

Im Netz

Commons: Lobau – Sammlung vo Buidl, Videos und Audiodateien
De Lobau auf da Seitn vo da Weana Stodvawoitung
De Lobau im Östarreich-Lexikon AEIOU
Gschicht vo da Lobau auf www.stadt-wien.at