Münchna Kindl

Der Artikl is im Dialekt Mingarisch gschriem worn.

Woppm vo Minga

Münchna Kindl - Postkoatn um 1900

s'Münchna Kindl steigt aus'm Woppm (1847 vo Kaspar Braun)

Münchna Kindl, aa Mingara Kindl (dt.: Münchner Kindl) is da Nama vo da vaniadlichtn Woppmfigua vo Minga.

D'traditionej Woppmfigua vo Minga is a Mönch in oana goid-schwoazn Kuttn. Voiksetymologisch hod s'Woat Münchn mit Mönchn ("ba dena Mönchn") z'doa, wos owa noch neian Forschungen foisch sei kannt. Megli is, dass Minga vum vorchristlichn Woat Munica kimmt, s'wo Ort af da Ufaterrassn hoasst..

D'Woppm-Figua (ob 13. Joahundat) is im Laf vo da Zeit, scho seitm 16. Joarhundad, imma wieda vo Kinstlan nei doagstejt und sukzessive vaändat woan. Vor oim hod d'Figur imma mehra kindliche G'sichtsziag griagt und in de 1920er Joa is dann aus'm Buam a Deandl woan - s'modeane Münchna Kindl is damit born g'wen. Wia koa andane deitsche Woppmfigua hod se de Figua imma mehra vasejbständigt. Zletzt hods sogoa s'Eidbuach obglegt und zan Biakrug und zan Radi griffa.

S'Münchna Kindl find ma heizdog zum Beispui af Trambowogn, Kanaldeckln, Postkoatn, Biakriagln, Biafloschna und Plakatn.

S'Münchna Kindl vo da Wiesn

S'Münchna Kindl werd vom „Festring München e. V.“ ausg'suacht. Da „Festring München“ organisiat an Einzug vo d'Wiesnwirt sowia an Trochtnumzug vum Oktoberfest. S'Münchna Kindl is weiblich, zwischn 20 und 29 Joa oid und stammt moast aus dena Reihn vo d'Mingara Wiesnwirt, Schausteja bzw. Brauarein. S'Münchna Kindl werd oft aa Botschafterin vo Minga g'nennt.

S'Münchna Kindl fiaht an Einzug vo d'Wiesnwirt zum Oktoberfest o und stähd dann nem an Obabuagamoasta vo Minga, wann d'Wiesn mitm O'zapft is eräffnet werd. Am easchtn Sunndog vum Oktoberfest findt a groussa Trochtn- und Schitznumzug stott, wo s'Münchna Kindl in ana gejb-schwoazn Franziskanakuttn und oan Maßkrug in da Hand, af am Ross sitzend an Umzug ofiaht.

D'Münchna Kindl

Joar	Nam
1938	Ellis Kaut
1965	Lieserl Fesenmeier
1972–1978	Christl Mory
1979–1980	Hannelore Fischer
1981–1983	Helene Münchhalfen
1984–1986	Stephanie Spendler (Hagn)
1987–1994	Manuela Weitner
1995–1998	Silja Schrank-Steinberg
1999–2000	Stephanie Redl
2001–2002	Daniela Heide
2003–2004	Julia Krätz
2005–2006	Nadine Schröder
2007–2009	Stefanie Krätz
2010–2014	Maria Newrzella
2015	Laila Noeth
2016–	Viktoria Ostler

Andane Münchna Kindl

Jeda, dea wo in Minga g'boan und afg'waxa is, werd aa Münchna Kindl g'nennt.

D'boarischn Spirituosn-Spezialitätn vo da Firma Riemerschmid wean aa Müncher Kindl g'nennt; davo gibts drei Sortn:

• Oberbayerischer Gebirgsenzian
• Bärwurz
• Erster Altbayerischer Kartoffelschnaps

Noch da Mingara Woppm-Figua is aa d'Münchner-Kindl-Brauerei g'nennt g'wen, d'wo 1905 vo Unionsbräu iwanumma woan is.