MS Explorer

Der Artikl is im Dialekt Owaöstareichisch gschriem worn.

MS Explorer
Dechnische Datn
Schifsdüp:	Polar-Graizfoatschif
friane Naum:	Lindblad Explorer Society Explorer
Gress:	2346 BRZ / 773 NRZ
Leng (ü.a.):	72,86 m
Breadn (ü.a.):	14,02 m
Diafgaung:	uma 4,2 m
Gschwindigkaid:	uma 11 kn
Besozung:	54
Passaschiakapazidet:	104
Baujoa:	1969
Bauweaft:	Uudenkaupungin telakka Uusikaupunki, Finnland
Flagn:	Liberia
Hoamadhofn:	Monrovia
IMO-Nummer:	6924959
Ruafzaichn:	ELJD8
End:	Untagaunga in da Nocht fum 23. auf n 24. Nofember 2007 nochdem s mid am Aisbeag zaum gschdessn is.

D MS Explorer woa a Graizfoatschif fu da kanadischn Ualaubsoaganisazionsfiama G.A.P. Adventures, des am 23. Nofemba 2007 in da Antarktis unta gaunga is, noch dem s mid am Aisbeag zaum gschdessn is. Si woa a Graizfoatschif, des schbeziel fia Foatn in de Polarregionen baud woan is. Ole Leit de an Boad woan, haum nochn Untagaung gret wean kina.

Gschicht

D MS Explorer is 1969 in Uusikaupunki in Finlaund baud woan und hod zeascht Lindblad Explorer ghoassn, wai s uaschbringli fum schwedischn Foascha Lars-Eric Lindblad blant und bedrim woan is. D MS Explorer woa des easchde Schif iwahaupt, wos fia n Schifsduarismus in de polarregionen baud woan is. Glai im Joa 1969 iss auf a Eakundungsfoat in de Antarktis aufbrocha und woa auf de Oat mosgebli drau beteiligt, das da Duarismus a in d Antarktis kema is. 1984 is d MS Explorer a ois easchds Graizfoatschif duach de Noadwestpassasch duachi gfoan.

Am 11. Feba, 1972 is de Lindblad Explorer bai ana Foat, wo a da Lars-Eric Lindblad söwa dabai woa, in da Antarktis auf Grund glaufn, in da Gegend fum La Plaza Point. D Passaschia haum ole fu da tschilenischn Marine gret wean kina und s Schif is noch Buenos Aires in Argentinien ogschlept woan und schbeda noch Kristiansand in Noawegn, wo s repariad woan is.

Noch dem des Schif a boa Moi fakaft woan is, hod s 1985 da deitschn Redarai Society Expeditions aus Bremen ghead, de a s Schif World Discoverer bedrim hod. Desweng iss de Lindblad Explorer fu deara Redarai in Society Explorer umbenaunt woan. Said 1992 hoast des Schif neta nu MS Explorer. Said 1994 hod s deara kanadischn Fiama G.A.P. Adventures ghead und is unta libearianischa Flagn gfoan.

1998 hod de Explorer ois easchds Schif iwahaupt de James Ross Insl umrundet und is im söbn Joa in Amazonas aufi gfoan und hod ois easchds gressas Schif in Punkt eareicht, wo 80 Mailn (130 km) fu Iquitos in Peru nu aufi da Rio Ucayali und da Amazonas zaum rinan.

D Explorer woa sogoa auf zwoa Briafmarkn drauf, de fu South Georgia aussa brocht woan san. Weng iara Foab hod s fu de Leit in Schbiznaum "kloans rods Schinaki" griagt.

Hawari und Untagaung in da Antarktis im Nofember 2007

D Explorer noch da Kolision, mid schdoaka Schlogseitn

Da genau, bai da King-George-Insl iss bassiad

Am 23. Nofemba 2007 um 05:24 in da Frua (kooadiniade Wödzeid UTC) is de MS Explorer auf an Aisbeag drauf gfoan, wia s grod auf ana Graizfoat fum argentinischn Ushuaia weg zua antarktischn Hoibinsl untawegs woa, umara 26 Semailn östlch fu da zu de Süd-Shetland Insln ghearadn King-George-Insl. Dabai hod si si a Luka in Rumpf aigfaungt. Ob s wiakli a Aisbeag woa, woas ma owa ned genau, wai de Hawari in da Finsdan neamt genau gseng hod.

Ungefea 15 Schdundn gschbeda, noch Aungom fu da kanadische Bedraiwa-Fiama G.A.P. Adventures sogoa schau um 19:00 Ua UTC, iss noch fagebliche Fasuach fu da Bsozung, d Luka zan schdopfn und des Schif do nu zan daretn, unta gaunga und im antarktischn Mea auf 1100 Meta gsunkn.

De 91 Passaschia, de 9 Expedizionslaita und Foadrogende, so wia 52 Maun Besozung san dafoa nu in de Retungsbot gschbrunga und es is a nu rechtzeidig a Notsignal ogem woan. Auf des aufi is de MS Nordnorge kema, de a grod in da Gegend woa und hod de Leit aus n aiskoidn Wosa gret.

Da Keptn und da Easchde Ofizia san dafoa nu aufn Schif blim und haum fasuacht, des Wosa ausn Schif zan pumpn und so de MS Explorer schwimad zan dahoidn. Des woa owa noch an Schdromausfoi und in daduach ausglestn Schdüschdaund fu de Pumpn umasunst. Auf des aufi haum a de zwoa s Schif mid an Retungsbod falosn.

De Nordnorge, a Schif wos sunst fia de noawegische Hurtigruten ois Bostschif untawegs is und in de Wintamonat a fia Graizfoatn in da Antarktis aigsezt wiad, hod ole Schifbrüchign zu da tschilenischn Antarktisschdazion Presidente Eduardo Frei Montalva auf da King-George-Insl brocht. Fu doat san de Leit in de zwoa negsdn Dag mid ana Lockheed C-130 Hercules-Dransboatmaschin fu da tschilenischn Arme zan Schdüzbunkt Punta Arenas im Sidn fu Tschile gflong woan.

Duach de Hawari fu dem Schif fiacht ma owa das in da sensiblen Natua fu da Antarktis a Umwödkatasdrofn bafoa schded, wai de Explorer nu 185.000 Lita Draibschdof an Boad ghobt hod, wia s untagaunga is. Argentinien hod glai drauf bekaunt gem, dass se in Duarismus in da Antarktis aischrenkn woin, wai ma soichane Unglik nia gauns ausschliassn kau. A Wissnschoftla foadan, das weniga Foatn fu Ualaubsoaganisatoan in den sensiblen Lemsraum fu da Antarktis untanuma wean soin, damid so wos in Zukunft ned so laicht wida bassiad.

Auf jedn Foi is wenigstns neamt falezt woan oda gschdoam.

Im Netz

•  Commons: MS Explorer – Sammlung vo Buidl, Videos und Audiodateien
• Eagly Eye Tours: M/S Explorer
• Fotos und Faktn zu da MS Explorer (auf schwedisch)
• genauare Datn fum Schif