Manali-Leh-Hochstroßn

Der Artikl is im Dialekt Owaöstareichisch gschriem worn.

Oft entstengan de Staus, weus an LKW üwalon hom

D'Manali-Leh-Hochstroßn (englisch: Manali-Leh-Highway oda aa Leh-Manali-Highway) is a 477 Kilometa launga Vakeahsweg im indischn Himalaja, dea wos de Städt Leh im Bundesstoot Jammu und Kashmir und Manali in Himachal Pradesh vabindn tuad.

Bekaunnt is dea „Highway“ voa oim desweng, weu ma auf eam üwa mearare vu de hechstn befoahboan Possstroßn vu da Wöid drüwa foahn muaß, so zum Beispüi üwa'n Rohtang-Poss (3.978 m), in Baralacha-Poss (4.892 m), in Lachulung-Poss (5.059 m) und in Tanglang-Poss (5.325 m). Da letzte vu de iatst aufglistetn is sogoa da zweithechste Poss auf da Wöid, üwa den ma mit am Kroftfoahzeig drüwa kimmt.

D'Manali-Leh-Hochstroßn bringt an vu Manali im Kullu-Toi in'd Region Lahaul und Spiti und noch Ladakh. De Stroßn is netta offn, waun'd Road Construction Company vu da indischn Armee in Schnee wegga brocht hod und waun de Schädn vum Winta behom san, oiso im Summa zwischn Juni und Mitte Septemba. Owa aa in dera kuazn Zeid muaß oiwei aun da Stroßn goaweit wean, weu de dünne Bitumen-Deckn ausbessat wean muaß und de Schädn vu de Eadrutsche behom wean miaßn.

Damid mas üwa de gaunze Streckn mid olle Pässe drüwa schofft, braucht ma mid am Auto in da Rögi mindestns zwoa Tog. Ãndare Vakeahsmittl, de wos si aunbietn san de Foahradln, fia wos ma owa gscheid a Kondi midnehma soit. Außadem gibts aa an rögimäßing Busvakeah. Weu da Luftdruck in dea teuweis extremen Hächn schau oag niadrig is, muaß ma owa mid eikalkulian, dass an d'Hächnkraunkheid dawischn kau.