Paul Krugman

Aus Wikipedia
Der Artikl is im Dialekt Hausrukfiatlarisch gschriem worn.
Da Krugman Paul, im Nofemba 2008 in Schdokhoim

Da Paul R. Krugman (* 28. Februa 1953 in New York) is a amearikanischa Wiatschoftswissnschoftla und Uni-Brofessa in Princeton, New Jersey, dea an Haufn Biacha iwa de momentane Wödwiatschoft und de Globalisiarung gschrim hod. Ea schreibt a jede Woch a Kolumne in da New York Times, wo a a efda de Wiatschoftsbolitik fu da Bush-Regiarung und fu da Federal Reserve Bank kritisiad hod. Gemainsaum mim Maurice Obstfeld hod a Leabuach fia Intanationale Foikswiatschoft gschrim, wos oans fu da Schdandardweak fia Schdudentn woan is. Im Joa 2008 hod in Noböbrais fia Wiatschoft griagt.

Sai Lem[Werkeln | Am Gwëntext werkeln]

Da Krugman Paule is auf Long Island in da Nechn fu New York aufgwogsn. Sai Fota woar a Fasicharungsmenedscha, den sei Familie zruk ged auf jidische Ainwaundara aus'nheitingWaisrusslaund. Noch da High-School hod a in Yale zan schdudian augfaungt und zwoa Foikswiatschoft (in Amearika sogt ma "Economics" dazua). Schau 1974 hod a doat sein Betschela (B.A.) gmocht und 1977 daun am Massachusetts Institute of Technology in Boston sein Dokda (Ph.D.), mid ana Dissatazion iwa flexible Devisnkuase. Noch seina Promozion hod a a Joa laung ois Berota fian domoling President fu de USA in Jimmy Carter goawat in dem sein Council of Economic Advisers. Danoch is a wida zruk auf d'Uni gaunga und is Brofessa woan, zeascht auf da Uni in Yale, daun am MIT und schbeda auf da Stanford-Uni in Kalifoanien. Ea woa a ois Gostbrofessa auf da UC Berkeley und auf da London School of Economics, befoa a daun im Joa 2000 noch Princeton gaunga, wo a seid dem ois Brofessa blim is.

Fia de Bolitik hod a danem nu efda goawat und zwoa zwischn 1982 und 1983 in am Team fu Wiatschoftsberota fia n'Ronald Reagan und schbeda hod a in Bill Clinton in Wiatschoftsfrogn untaschdizt bai dem sein Presidentschoftswoikaumbf im 1992a Joa. Im 1999a Joa hod a a Zeidl fia Enron ois exteana Berota goawat, a Gschicht de eam schbeda foagwoafn woan is, wai de Fiama am End fum 2001a Joa mid Bombm und Karacho tschari gaunga is. De Oawad fia Enron hod a owa schau am End fum 1999a Joa blaim lossn, wai a seid dem fia de New York Times ois Wiatschoftskolumnist zan schreim augfaungt hod. Duach de Hokn, bai dear a seid dem jede Woch an Artikl zu aktuele Wiatschoftsgschichtn gschrim hod, is a a in de Medien recht bekaunt woan. In seine Kolumnen hod a seid 2001 oiwai wida de Wiatschoftsbolidik fu da republikanischn Bush-Regiarung kritisiad und des a in seine Biacha aini gschrim.

Sowoi ois Kolumnist wia a ois Autor fu wiatschoftliche Sochbiacha hod a oiwai a neokeynesianisdische Bolitik fadredn, wiaso a in Amearika ois Fadreta fu ana libaraln oda progressivn Wiatschoftsbolidik güt. In Airopa sogad ma, das des a eha linke Bolitik fu ana sozialn Moaktwiatschoft is, bai dea da Schdod duachaus a weng ins Wiatschoftslem aigreifn soid und zwoa antizüklisch. Oiso wauns mid da Konjunktua noch unt ged, soid a ruig a weng mea Göd ausgem und so in oigemainen Trend entgengschdaian. De Aunsichdn hod a a in seina Analüsn zu da Wödwiatschoftskrise im Buach "The return of depression economics" fadretn, in dem a dafoa gwarnt hod, das mid da foischn Bolidik laicht wida so a Krise wia domois aufkema kant.

De Hoitung hod eam in de lezdn Joa oiwai wida Kritik aibrocht fu eha konsavative Bolitika und Wiatschoftsschuanalisdn, hod auf da aundan Sait owa sicha dazua baidrong, das a jiat im 2008a Joa Mitn in da schwasdn Finanzkrisn seid launga Zeid, in Noböbrais fia Wiatschoft griagt hod.

Nem seine moasdns fia a breadas Publikum recht faschdendlich gschriwanen Sochbiacha, hod a a nu einige Leabiacha fia de Ausbüdung auf da Univeasidet gschrim, unta aundam gemainsaum mim Wiatschoftsbrofessa fu da UC Berkley a Schdandardweak fia intanazionale Foikswiatschoft und z'lezt gemainsaum mid seina Frau, da Robin Wells, de so wia ea Brofessarin in Princeton is, a Buach iwa Mikroekonomi.

Brais[Werkeln | Am Gwëntext werkeln]

  • 1991: John Bates Clark Medailn (USA)
  • 1998: Horst-Recktenwald-Brais fia Nazionalekonomi (fu da Uni Ealaungen-Niambeag)
  • 2004: Brinz-fu-Asturien-Brais fia Sozialwissnschoft (Schbanien)
  • 2008: Wiatschoftsnoböbrais (bekaunt gem am 13dn Oktoba)

Literatua[Werkeln | Am Gwëntext werkeln]

Leabiacha[Werkeln | Am Gwëntext werkeln]

  • International Economics - Theory and Policy; Paul R. Krugman, Maurice Obstfeld, 7th edition, Boston, Mass.: Pearson, Addison-Wesley, 2006, ISBN 0-321-31154-X (Englischschbrochigs Oaginal)
  • Internationale Wirtschaft - Theorie und Politik der Außenwirtschaft; Paul R. Krugman, Maurice Obstfeld, Pearson Studium, 6. Auflage 2004 - ISBN 3-8273-7081-7 (Hochdeitsche Iwasezung)
  • Economics; Paul Krugman, Robin Wells, Kathryn Graddy, European ed., 1. print. - New York, NY: Worth Publ., 2007 (© 2008), ISBN 978-0-7167-9956-6
  • Microeconomics; Paul Krugman, Robin Wells, New York, NY: Worth Publ., 2005, ISBN 0-7167-6277-3

Sochbiacha[Werkeln | Am Gwëntext werkeln]

  • Nach Bush: das Ende der Neokonservativen und die Stunde der Demokraten. Frankfurt a. M.: Campus-Verlag 2008, ISBN 978-3-593-38565-5
  • Der große Ausverkauf - wie die Bush-Regierung Amerika ruiniert; Frankfurt a. M.: Campus-Verlag, 2004 ISBN 3-593-37437-4
  • Die Große Rezession. Was zu tun ist, damit die Weltwirtschaft nicht kippt. Frankfurt a. M.: Campus-Verlag 2001, ISBN 3-548-70054-3 (The return of depression economics)
  • Schmalspur-Ökonomie. Die 27 populärsten Irrtümer über Wirtschaft (2000), neichasde Auflog: Minga: Ullstein-Taschenbuchverlag, 2002, ISBN 3-548-70075-6 (Aus dem Amerikanischen von Herbert Allgeier - The accidental theorist and other dispatches from the dismal science)
  • Der Mythos vom globalen Wirtschaftskrieg. Frankfurt a. M.: Campus-Verlag, 1999, ISBN 3-593-36147-7 (Pop internationalism)
  • Pop Internationalism. Cambridge, Mass.: MIT-Press 1997, ISBN 978-0262611336 (A Saumlung fu Essays iwa de intanazionale Wiatschoft)
  • Geography and Trade, Leuven University Press, 1991, ISBN 0-262-11159-4

Im Netz[Werkeln | Am Gwëntext werkeln]

Video: