S schiache Wusal

Aus Wikipedia
Zur Navigation springen Zur Suche springen
D Schiachn liegt im Aug vom Betrochta
Schauts enk des schiache Wusal oo!
A junga Schwan is graubraun und net unbedingt schee

S schiache Wusal (dt. Das hässliche Entlein, engl. The Ugly Duckling, denisch: Den grimme Ælling) is a Kunstmärchn vom denischn Schriftsteja Hans Christian Andersen. Es is anno 1843 vaeffentlicht woarn.

D Gschicht[VE | Weakln]

A Antn briadt segs Wusal aus. Nua ban siebtn Oa dauats a bissl länga bis a Wusal aussaschlupft. Es is grau und schiach und aa grässa wia d ondan. Es wead desweng ibaroi nua ausglocht und vaspodt. Do dengt sa si: I muass obhaun und rennt davo. Es vasteckt si im Schuif und is vo oin valossn. Da Winta is saukoid woarn. S Wusal hod dauand schwimma miassn, domids Wossa net zuagfroarn is. Oba s Wossalooch is imma kloana woarn, des Eis imma stärka und s Wusal imma schwächa und schwächa, bis s festgfroarn woar. Zum Glick is nacha a Baua kema und hods ausn Eis aussaghockt. Dea hods hoamgnumma und eihgspiat. Des hod eam oba aa net gfoin und es is wieda davoglaffa. Da Winta woar fias Wusal hoart, so hoart, doss mas goar net vazäin wui. Oba irgendwonn is do s Fruahjoar kema. Do woars Wusal grouss gmua, doss fliang hod kina. Es is iban Goartn gflong, wo d Äpfebaam und da Flieda bliaht und Sun glocht hod. Do hods d Schwana im Wossa gseng, wo so schee woarn und woit z eana fliang. Do is za eana hiigflong und hod si dengt: De wean mi umbringa, wei i so schiach bi, oba vo mia aus stiab i hoid. Oba wias ibas Wossa fliagt, na siechts ia Spiaglbuid und siecht, dass sejm a Schwan woarn is. Na gfreit sa si wia a Schneekinigin und ois is in Budan. Und d Leit hom gsogt, doss hiaz a neia Schwan ans Wossa kema waa und s waa da scheenste vo oin!

Interpretation[VE | Weakln]

Es is d Gschicht vo am Aussnseita, wo ausgstessn wead und olle Phasn vo Depression duachlafft.[1] Bis a a Gruppn findt, wo ra akzeptiat wead und meakt, dass a mehra draf hod ois wia vui ondane.

Fuim uns Musical[VE | Weakln]

Bekonnta wia s Original-Märchn vom Andersen sejm is heit oft da kuaze Animationsfuim vo d Disney Studios The Ugly Duckling vom Jack Cutting ausm Joar 1939.[2]

Anno 2004 is a Musical mitm Inhoit vom Märchn in San Diego uaafgfiaht woarn: Lucky Duck. S Buach is vom Bill Russel, d Musi vom Henry Krieger.[3]

Beleg[VE | Weakln]

  1. Mathias Jung: Das hässliche Entlein. Die Erlösung vom Minderwertigkeitskomplex. 2. Auflage 2011. emu-Verlag GmbH, Lahnstein.
  2. Nordische Filmtage Lübeck: Program. luebeck.de, 1999, obgruafa am 27. Dezemba 2016.
  3. Henry Krieger. Theatrical Rights Worldwide online, obgruafa am 26. Dezemba 2016.

Im Netz[VE | Weakln]

 Commons: S schiache Wusal – Sammlung vo Buidl, Videos und Audiodateien