Stommdisch

Aus Wikipedia
(Weidagloadt vo Stammtisch)
Zur Navigation springen Zur Suche springen
Der Artikl is im Dialekt Obaboarisch gschrim worn.

A Stommdisch (dt.: Stammtisch) is a Gruppn vo Leit, de se des öfftan in na Wiatschoft treffn. Da Disch, an dem de hocka, hoassd natiali aa Stommdisch.

Traditioneje Stommdisch[VE | Weakln]

In vui Wiatschoftn is da Stommdisch glei zum dakenna, wei a entsprechends Tafal drafstähd oda driabahengd. Ob und diam liasd ma do'n Spruch: "Do hogga de, de ollaweil do hogga". Dea Spruch bschreibd rechd schee de Oart vo da Zuaghearigkeit. A Stommdisch is a vui lockerne Gruppn wia z. B. a Vaein. Dementsprechnd kennd ma sa a untaranond, is mim Wiat per du und hod gwisse Freiheitn, de wo a ondana Gost ned hod; z. B. ko se a Stommdischbruada sei Bia oschreim lossn, wei da Wiat woass, doss a oiwei wieda kimmd.

Beim traditionejn Stommdisch guids ois unhöfli, wenn ma se ois Fremda on an laarn genauso wia zu am bsedzdn Stommdisch dazua hockd. De Etikette schreibd voa, doss ma se eascht dozuahocka deaf, wonn ma vo om Midglied dozua eihglon woan is.

A bsundane Foam vom Stommdisch is da Friahschoppn. Do treffan se d'Leit om Sunnda noch da Kiach zum Weißwuaschtfriahstick]].

Ofd wead om Stommdisch Koartn gspuid, meisd Schofkopf oda aa Wattn.

Ondare Stommdisch[VE | Weakln]

Nem de traditionejn Stommdisch kimmds a imma meah dazua, doss se fremde Leit mid gmoasome Intaressn treffa. Z. B. gibds in vui Städt an Wikipedia-Stommdisch. In dene Fäj han neie Leit gean gseng.

Aa in ondare Lända gibds Stommdisch oda zmindesd wos vagleichboas. Af de Britischn Insln zum Beispui triffd ma se reglmäßig im Pub. In Spanien und Sidamerika gibds a eingne Oart vo (Kinstla-)Stommdisch, de Tertulia. Do treffn se reglmäßig eha kinstlarisch vaologde Leit, dischkrian iwa eingne Weake und tauschn Ideen aus.

Stommdisch in da Politik[VE | Weakln]

In da Politik hod da Stommdisch a eha negative Bedeitung. So bwegd se zan Beispui a Redna af "Stommdischniveau", wann a rechd vui populistische Themen afgreifd. Des kimmt vom Klischee, doss om Stommdisch oiwei af om recht om niedring Niveau dischkriad wead, vui (negative) Stereotypn und Klischees iwa ondare present han und fia a Problem ofd Lösunga gfundn wean, de zwoar afn easchtn Blick oafoch ausschaung, afn zwoatn owa unmegli beziehungsweis vui z'radikal han und desweng nua vo Leit favorisiad wean, de entweda z'deppad han oda ned iwa eahnan eingna Tellarond nausschaung kenna.