Stommdisch

Aus Wikipedia
Der Artikl is im Dialekt Obaboarisch gschriem worn.

A Stommdisch (dt.: Stammtisch) is a Gruppn vo Leit, de se des efftan in na Wiatschoft treffn. Da Disch, an dem de hocka, hoassd natiali aa Stommdisch.

Traditioneje Stommdisch[Werkeln | Am Gwëntext werkeln]

In vui Wiatschoftn is da Stommdisch glei zan Dakenna, wei a entsprechnds Tafal drafstähd oda driwahengd. Ob und diam liasd ma do'n Spruch: "Do hogga de, de ollawei do hogga". Da Spruch bschreibd rechd schee de Oat vo da Zuaghearigkeit. A Stommdisch is a vui lockane Gruppn wia z. B. a Vaein. Dementsprechnd kennd ma se aa untaranond, is mim Wiat per du und hod gwisse Freiheitn, de wo a ondara Gost ned hod; z. B. ko se a Stommdischbruada sei Bia oschreim lossn, wei da Wiat woass, doss a oiwei wieda kimmd.

Ban tradizionejn Stommdisch guids ois unhefli, wenn ma se ois Fremda on an laarn gnauso wia za om bsezdn Stommdisch dozua hockd. De Etikette schreibd voa, doss ma se eascht dozuahocka deaf, wonn ma vo om Midglied dozua eihglon woan is.

A bsundane Foam van Stommdisch is da Friahschoppn. Do treffn se d'Leit om Sunnda noch da Kiach zan Weißwuaschtfriahstick.

Ofd wead om Stommdisch Koartn gspuid, meisd Schofkopf oda aa Wattn.

Ondare Stommdisch[Werkeln | Am Gwëntext werkeln]

Nem de tradizionejn Stommdisch kimmds a imma meah dozua, doss se fremde Leit mid gmoasome Intaressn treffa. Z. B. gibds in vui Städt an Wikipedia-Stommdisch. In dene Fäj han neie Leit gean gseng.

Aa in ondare Lända gibds Stommdisch oda zmindesd wos vagleichboas. Af de Britischn Insln zan Beispui triffd ma se reglmeßig im Pub. In Spanien und Sidamerika gibds a eingne Oat vo (Kinstla-)Stommdisch, de Tertulia. Do treffn se reglmeßig eha kinstlarisch vaologde Leit, dischkrian iwa eingne Weake und tauschn Ideen aus.

Stommdisch in da Politik[Werkeln | Am Gwëntext werkeln]

In da Politik hod da Stommdisch a eha negative Bedeitung. So bwegd se zan Beispui a Redna af "Stommdischniveau", wonn a rechd vui populistische Themen afgreifd. Des kimmd van Klischee, doss om Stommdisch oiwei af om recht om niedring Niwoo dischkriad wead, vui (negative) Stereotypn und Klischees iwa ondare present han und fia a Problem ofd Lösunga gfundn wean, de zwoar afn easchtn Blick oafoch ausschaung, afn zwoatn owa unmegli beziahungsweis vui z'radikal han und desweng nua vo Leit favorisiad wean, de entweda z'deppad han oda ned iwa eahnan eingna Tellarond nausschaung kenna.