Text:Schoo wieda z'spot
Josef Max Schuegraf: Der Wäldler: Gedichte in der Mundart des bayerischen Waldes. Wiazburg, 1858
Schoo wieda z'spot?[Am Gwëntext werkeln]
Es giet oft Leut, de überoll
Hintnache kömma thäan,
Und wenn ma's grod raus song aa soll,
In koan Foll fürte wean.
So geiht's 'm Lukas z'Olt'nstodt,
Dea kimmt hold neuimols recht,
Und wenn ma'n frogt, woarum so spot,
So schimpft a oan ned schlecht.
Do is da Churfüascht Max amol,
In'd Stodt vo Cham eizong;
Da Lukas moant, ea'n seng duart solln
Und von eahm wos dafrong.
Jetz weui ea hold eikömma is
In'd Stodt noch Cham af'd Post,
So hofft a, seggt a'n Max'l gwiß,
Wenn dea a Bißl rostt;
Doh Churfüascht Max'l is schoo längst
Zon Stodtthoa auße gween; --
Und Lukas will -- in tausat Aengst,
'N Postvowolta ren.
"Hea Postvowolta koo ma ned
'N Churfüascht huit no seng?
I häitt on eahm a kloane Red
On dea ma vül noh gleng."
Da Postvowolt sogt eahm zaou:
"Ea kunnt 'n wohl noh seng,
Doh nimma ren, -- wenn dees wa gnaou,
So wa a ned voleng, --"
Und mocht eahn schnell de Speissolthüa
In Ang'lweit'n af,
Und füht zon Bild 'n Lukas füa
Mit dera Stichred draf:
"In seina Gröiß -- do schau 'n oo,
Weui grod ea glebt jetz hot, --
Du koost 'n seng, weui i gsogt ho,
Zon ren doh, -- is's schoo z'spot."