Tomahawk

Aus Wikipedia
Tomahawk mit Schwoaf ("Drop") fia Zeremonien bzw. Rituale

Da Tomahawk is de traditionelle Streitaxt und a Oizweck-Weakzeig vo de Indiana gwen. Ois Weakzeig hod da Tomahawk bis zum heitign Tog sei Bedeitung dahoidn; vo da US-Army wead da Tomahawk zua Zeit aa ois effektive Nohkampfwoffn[1] eigsetzt.

Ea besteht wia ra Hockn aus an Schoft und an Kopf. Da Schoft is ebba 25 bis 50 cm long und is moast ausn Hoiz vom Hickory-Baam gmocht. Da Kopf woa uaspringlich aus Stoa oda Obsidian (Vuikan-Glos), noch Okumft vo de Eiropäa in Amerika aa aus Eisn oda Messing.

Gschicht[Werkeln | Am Gwëntext werkeln]

Da Nom Tomahawk kimmt aus de Algonkin-Sprochn vo "tamahak" or "tamahakan". Des Woat is nacha vo eiropäischn Amerikanan anglisiat woan. Es hod woascheinlich sowoi Stoa-Hockn ois aa Stoa-Kein gmoant und zwoa jede Foam davo. Da Tomahawk woa scho imma a Wuaf- und Hieb-Woffn und a Weakzeig zgleich.

Da Tomahawk woa a wichtigs Symboi fian Kriag bzw. Kriagszuastand.[2] Ea hod aa a rituelle Bedeitung ghobt. Des symbolische Vagrobm und Ausgrobm vom Tomahawk bei de Indiana is im Boarischn zum gfligltn Woat woan. "S Kriagsbeil begrobm", moant uaspringlich "Friedn schliassn", im Boarischn "an Streit beiglegn". "S Kriagsbeil ausgrobm", hoasst uaspringlich "Kriag fiahn", heit "an Streit ofanga". Es is owa umstrittn, ob de Indiana de Tomahawk je vagrom ham.

Es hod a Tomahawks gebm, wo Woffn und Friednspfeifn gleichzeitig woan, da sognennte "Pfeifntomahawk", dea wo zum beliabtasten Tomahawk ibahapts woan is. Es hod aa a symbolische Bedeitung ghobt, ob ma am Gegniwa ein Pfeifnkopf oda de Klinga highoidn hod.

Heitige Vawendung[Werkeln | Am Gwëntext werkeln]

Da Tomahawk is heit wieda a beliabts Oizweck-Weakzeig. Es gibt vui vaschiedane Heastella.

Da Tomahawk hod sogoa wieda a militärische Bedeitung griagt. In da US-Army wead a modeana Tomahawk ois Oizweckweakzeig und ois Nohkampfwoffn eigsetzt. Zua Zeit aa in Afganistan.

"Tomahawk-Weafn" is a Sportoat, wo ned nua vo Retrogruppm ausgfiaht wead, sundan aa vo Kampfsportohengan wia z. B. vom Okichitaw, de wo Tomahawk-Kampftechnikn trainian.

Galerie[Werkeln | Am Gwëntext werkeln]

Schau aa[Werkeln | Am Gwëntext werkeln]

Beleg[Werkeln | Am Gwëntext werkeln]

  1. Bericht vo ABC vom David Tillet, (engl., gseng am 24. Feba 2011). Archiviert vom Original [1] am 31. Jenna 2011; abgerufen am 24. Februar 2011.
  2. Wortschatz Uni Leipzig@1@2Vorlage:Toter Link/wortschatz.uni-leipzig.de (Seite nicht mehr abrufbar; Suche in Webarchiven)

Im Netz[Werkeln | Am Gwëntext werkeln]

 Commons: Tomahawk – Sammlung vo Buidl, Videos und Audiodateien