Vandana Shiva

Aus Wikipedia
Wexln zua: Navigation, Suach
Der Artikl is im Dialekt Hausrukfiatlarisch gschrim worn.
d'Vandana Shiva bai ana Dischgriararai aufn Efangelischn Kiatdåg 2007 in Köln

Vandana Shiva (* 5dn Novemba 1952 in Dehradun, Indien) is a indische Umwödschizarin, Biagarechtlarin und Feminisdin. Se håd im 1993ga Joa in altanatifn Noböbrais gwunga, wais fiar a sauwane Natua kembfd und s'Dema fum Umwödschuz recht eafoigraich unta d'Laid bråcht håd und dabai oiwai an bsondan Blikwünki auf de schbeziele Situazion fu de Waiwalaid ghåbt håd und aso an Feminismus mid da Ekologi fabindn kina håd.

Se is im Noadn fu Indien, im Bundesschdåd Uttarakhand néd waid fum Himalaya auf d'Wöd kema. D'Ötan fu ia woan zeascht oi zwoa Beãmte, d'Muata ois Leararin und da Fåta bain Milidea, hãm åwa schbéda eanare Bosdn aufgém und han Bauan woan. Aso håd de Vadana Shiva schã ois Kind s'Lém am Lãnd und mid da Natua kena gleand, åwa drozdem a a Büdung nåch westlichn Schdandad midgriagt. In deara Zaid håd si in Indien a fü dã in da Lãndwiatschåft, ois is modeanisiad woan und naiche Föda und Plantaschn han ãglégt woan und so håd dåmåis schã midgriagt, wia oag si ois faendat wãn mid fü Dechnik und Kemi in d'Umwöd âigriffa wiad und de uaschbringlichn Foamen fu da Lãndwiatschåft faschwindn.

Schbéda håds dãn Fisik schdudiad und zwoa néd neta in Indien sondan unta ãndam a in Kanada. Danå heds guade Schãsn auf a wissnschåftliche Kariea und an guadn Bosdn in de USA ghåbt. Se is åwa zruk nåch Indien gãnga und håd im Kuaschdåi fu iara Muata a Laboa âigricht, wos mid lãndwiatschåftliche Foaschungen de õahõamischn Bauanlaid ghoifn håd béssa zan wiatschåftn und zwoa aso, dass néd oiwai naiche Föda schwentn miassn und aso da Wåid oiwai wéniga wiad. In de 70ga Joa håd si si dãn a bai da easchdn indischn Umwödschuzbewegung, in Chipko Movement ãngaschiad. Dés is a Farainigung fu Waiwalaid dé si recht fian Schuz fum Wåid âigsézt hãm. De Waibsbüda hãm Akzionen gmåcht, wia dass Bam umõamd hãm und si doat ãkét kãm, damid de Bam ned umgschnin wean. Dés håd natiali fia Wüawi gsoagt und woa gãns wås naichs, åwa sé hãms gschåft, das de Regiarung an Kredit heagém håd, damid da doatige Gmõawåid dahåidn wean kina håd. D'Vandana Shiva håd foa oim duach ia Wissn iwa intanazionale Wiatschåftsoaganisazionen und schdåtliche Schdön höfn kina, wo natiali de doating Bairinen néd fü driwa gwust hãm und déswéng foahea oft iwan Disch zong woan san.

Se söwa håd de Eafoarungen aus deara Zaid schbéda zu ana aiganen Filosofi fum Ökofeminismus ausbaud, bai déms foa oim ums Dahåidn fu da Biodiveasidet ged und géng de Åbhengigkaid fu Sådguadfiamen, de Göd mid patentiade Sãmen fadeana woin. Õane fu earane Aussång dazua is:

"D'Waiwalaid han fu da indusdrieln Revoluzion auf eana Roin ois Lifarantn fu menschlichn und natialichn Romatrial reduziad woan."

Ném iare aiganen sozialn Brojekt is d'Vandana Shiva haid a nu Beråtarin fu da Wödeanearungsoaganisazion (Food and Agriculture Organization) fu da UNO. Im 1982ga Joa håds a aigane Foaschungsschdifdung grünt, dé Research Foundation for Science, Technology and Ecology hoast. Daduach is õane fu de bekãntasdn intanazionaln Globalisiarungskritika woan und kembfd haid foa oim dagéng, das grosse intanazionale Konzean d'indische Lãndwiatschåft oiwai meara kontrolian und de Bauan åbhengig måchan. Se mõand a, das Bauan dé si fia dés âisézn, aigentli in Gaist fum Mahatma Gandhi waida drãng, dea a géng d'Åbhengigkaid und d'Ausbaitung fu dé õaman Laid am Lãnd kembfd håd. Da åide Slogan "Quit India", dea fria géngan englischn Kolonialismus gricht woa, waid haid iwadrång auf de grossn intanazionaln Fiamen, dé si in Indien broad måchan, wia zan Baischbü Cargill oda Ricetec. Im Bezug auf soichane Agrokonzean håds amåi gsågt:

"Mãnche westliche Fiamen earina mi an an Dokda, dea an Kaisaschnid måcht und dãn aso duad wia wãn a s'Kind a nu gmåcht hed."

D'Vandana Shiva is haid Mitglid fum Club of Rome und fum Exekutifkomite fum World Future Council. Gemainsãm mim Jerry Mander, mim Edward Goldsmitz, mim Jeremy Rifkin und mim Ralf Nader is haid Foasizade fum International Forum on Globalization.

Brais[VE | Weakln]

  • 1993 håds in altaniatifn Noböbrais griagt (Right Livelihood Award)
  • In Global 500 Award fum Entwiklungsprogram UNEP fu de Faaintn Nazionen
  • Fum Time-Magazin is zu õane fu de fünf Hödn fia a greans Joahundat gwöd woan (Hero for the Green Century).
  • Aussadem håds in Blue-Planet-Award 2007 fu da Bealina Schdifdung ethecon griagt.

Biacha fu ia auf Hochdaidsch[VE | Weakln]

  • ... schließlich ist es unser Leben. Verlag Die Werkstatt, 1993, ISBN 3-89533-122-8
  • Ökofeminismus. 1995 mid da Maria Mies, ISBN 3-85869-122-4
  • Biodiversität - Plädoyer für eine nachhaltige Entwicklung. Paul Haupt, Bern 2001, ISBN 3-258-06345-1
  • Biopiraterie. Kolonialismus des 21. Jahrhunderts. Unrast Verlag, Münster 2002, ISBN 3-89771-416-7
  • Geraubte Ernte - Biodiversität und Ernährungspolitik. Rotpunktverlag, Zürich 2004, ISBN 3-85869-284-0
  • Erd-Demokratie - Alternativen zur neoliberalen Globalisierung. Rotpunktverlag, Zürch, 2006, ISBN 3-85869-327-8

Im Netz[VE | Weakln]

 Commons: Vandana Shiva – Oibum mit Buidl, Videos und Audiodateien