Wikipedia Dischkrian:Kandidatn fia Berige Buida

Ohne polemisian z'woin: Brauch ma des wiakli? Eigene Büidl håd d'barWP eh fåst koa, intanazional und språchunåbhängig san 99% vu de Büidln sowieso (eigntli oiß bis auf boarisch gschrimne Grafikn) und i glaub ned, dass ma då herin 3 Leid san, de si mid Büidln aa technisch und so auskennan. Mei Meinung wa håid so. → «« Man77 »» 16:35, 24. Jän. 2009 (CET)

Find i aa, dass ma dé dawai néd brauchn, fir dés samma vüi z' klâ, waidas miassadn aa nu Artike dazua sâi, dé ma aa néd håm, bzw. néd só schnöi kriang... --Mucalexx 16:39, 24. Jän. 2009 (CET)

Nu ans: I find in Flori seine Büidln aa supa, netta is a Auszeichnung bei uns herin ± wertlos, weu "gfåid ma" bei am Büidl echt subjektiv is und, aus meina Sicht, oiß, wås i dazua beitrång kãu. A berigs Büidl soi åwa aa technisch etc an Weat håm. Eventuell kintad ma jå auf deWP oda auf Commons schaun, wås de vu de Büidln håidn. → «« Man77 »» 16:56, 24. Jän. 2009 (CET)

Man, i glab das de Buidl vom Florian a echts Aushängeschuid fir unsa Wikipedia san. Und des in jeda Beziehung. De soit ma ned glei an de Commons gem. De werd do ohnehin irgenwann landn. Und des is dann fir uns guad und firn Florian. Aa a Oreiz fir de unsan, Buidl beizsteian.

Fir de Buidl de i vorschlogn werd, gibts a scho guade Artike.

I kenn mi mit Buidl guad aus, da Prjaeger no bessa, da Florian so und so und i bin ma sicha, dass do herin no da oane oda andare Nutza is, der do kompetent mitredn ko. Und de Benutza de mitlesn lerna dazua, wei so schwiarig is des aa wieda ned.

Und mit de berign Artike hod des aa irgenwann kloa ogfangt.

--Matthias Klostermayr 17:17, 24. Jän. 2009 (CET)

No wos, wann i mir de Obstimmunga iaba de Berign Artike in Erinnarung ruaf, dann hom do imma wiede Leit mitgstimmt, wo i den Eindruck ghobt hob, dass de ned nua koa Ahnung ghobt hom, jo sogoa oim Oschein noch, den Artike goa ned glesn hom. ;-) --Matthias Klostermayr 17:23, 24. Jän. 2009 (CET)

Meine Buidl

Des gfreid mi sakrisch, daß meine Buidl so guad okemma. I sig des ois a Art Sachspend o, daß i meine Buidl zua Vafügung stäi. Und i bin do a recht dankbar, daß de Leid, de auf vui vo meine Buidl drauf han, da a recht großzügig mit eanane Rechte am Buidl han. Fia mi is des aba koa Spendn an de bar-wp, sondan scho an de Allgemeinheit, desweng lod i de a olle direkt bei Commons nei. Fia de Illustration vo da WP reichan de kloana Dateiformate leicht und i mächt damit a a bissal de Nutzung aussahoib vo da WP erschwern, a aus Rücksicht auf de Leid, de auf de Buidl drauf han.

Des mid de berign Buidl is sicha koa schlechte Idee, do hät ma dann a Auswoi mid dene ma im Wechsl d'Hautpseitn schmückn kunntn. I dad des aba ned auf Buidl bschränkn de innahoib vo da bar-wp hochglon worn han (do dad i mi ja säiba ausschliaßn ;-) ). I dad's a ned auf Buidl bschränkn, de aus unsre eigna Reihn kemman. S' soidadn hoid Buidl sei, de bei unsre Artikl heagnumma wern oda zua unsre Themen passn, daß oiso ois a Blickfang auf da Hauptseitn oda in na Art Gallerie diena kenna und de Leid dazua bringa se diafa in unsa WP neizklicka. --Schott Flori 09:50, 2. Feb. 2009 (CET)

Bei de Såchn, de'st ãusprichst, gib i da komplett recht. Vielleicht kinan ma's uns so eirichtn, dass ma åis Kriterium eifüahn, dass da Büidbeschreibung auf da Hauptseitn an (blaun) Link zu am Artikl enthåitn muaß, wo des Büidl wesntlich is? Thematisch muaß åwa, deng ma i, oiß offn steh, mia san a Dialekt- und ned Regionalprojekt.

Iagndwãs in de Richtung miaß ma fåst måchn, sunst miaßad ma fåst ålle exzellentn Büida vu deWP und Commons aa duachdiskutian, weu schlecht san de jå bei Gott ålle midanãnda ned. → «« Man77 »» 11:26, 2. Feb. 2009 (CET)

PS: Mi'm Voten håid i mi zruck, i bin ma fia sowås daweu nu zu sea a Laie. S'haaßt åwa ned, dass i mi aa zukümftig ned söiwa dafia eisetzn wead.

Des mit Commons passt scho. I denk oba, dass ma des vorleifig scho af unsare Nutza beschränkn soitn, wei sunst kennt ma jo glei iba hundat Buidl obstimma.

@Man: Jo, mia san a Sprochprojekt und koa Regioalprojekt. Mia hom oba nur dann a dauahafde Existenzberechtigung, wann ma bestimmte Bereiche hom, wo ma bessa san, wia olle andan Wikipedias. Und do bietn se de boarischn Themen - nebm andan Sochn - vor oim o. Des is a des wos de Leit in easchta Linie ba uns suacha. (De deitsche Wikipedia is ba dena meistn deitschn Themen aa bessa wia de englische.)

--Matthias Klostermayr 21:22, 3. Feb. 2009 (CET)

Stimmt. Åwa voaschreim kinan ma uns a thematische Einschränkung ned, de kãu's hächstns hintarücks gem (es wiad afåch nix soiches voagschlång) oda duach a Klausl, dass a Büidl in am Artikl eibundn sei muaß oda so wås in de Richtung. Boarische Themen bietn natiali si ãu und i stütz de Gschichtn aa gean mid, åwa i söiwa bi so ziemli s'Gengteu vu am Voikskundla und i håb trotzdem mei Freid, im Dialekt z'schreim und mia taugt's voa oim z'seng, wia ma im Dialekt a vum Klischee weid weg liegade Themen ååhãndln kãu. → «« Man77 »» 21:57, 3. Feb. 2009 (CET)

I gfrei mi jo aa, wann ma in andan Themen bessa san wia de deitsche Wiki, z.B. im Arabischn Alphabet ;-) --Matthias Klostermayr 22:23, 3. Feb. 2009 (CET)

Ånordnung auf da Hauptsaitn

Mai Vurschlog warad, dass ma d' Büidl vo da Wochn do ånordnen, wo jezzad 's Büidl vom Sproochraum is... Hob amoi in da blaun Hauptsaitn ainedo, kå si a jeeda →do åschaun. Mucalexx 10:11, 2. Feb. 2009 (CET)

Laien beim Obstimma

Wei do so fui schreim, daß ned gnua Leid gabad, de de Buidl fachlich beurteiln kenna, bzw. daß se säim ned traun: Des hoid i fia an Schmarrn. Jeda hod a Gfui dafia, ob a Buidl schee is oda ned. Des hod nix damit zum doa, ob a's a daklern ko, warum a des Buidl schee findt. Wei auf da andarn Seitn kunnt ma an Haffa Buidl noch irgndwäichane Gstaltungsregln ois bsundas gelungen oda wertvoi daklern, und se gfoin trotzdem koam. Im Zsammhang mit da WP is sowieso as ollawichtigste, ob des Buidl wos vazäid. Und ob a jeda des glei vasteht, wos ma mit dem Buidl song mog. --Schott Flori 09:48, 3. Feb. 2009 (CET)

Kå'ma schou amol ogloante Büldla nuamol Nominiern?

Ejchadwej how'e de bisheringa Büldla-Woln niat gschai mitkrejgt ghått. Wal i how ejtz amol ins Archiv gschaut, dou han aa tolwais recht weng Stimma ogem worn. Drum frouch'e. -- Sinnierer 21:11, 25. Aug. 2009 (CEST)

Miaßn eigentli de Buidl olle an Bezug zur boarischen Kultur hom? Rein vom thematischn her schauds momentan danoch aus. Merce fürd Auskunft. Servas! --Flo 20:29, 22. Jän. 2012 (CET)

Na, des is iagndwås zwischn Zufåi und ungschribne Regl. A thematische Einschränkung warad gegn d'Wikipedia-Grundsätz → «« Man77 »» 21:09, 22. Jän. 2012 (CET)