Zellergraben

Im Zellergrobm

Da Zellergraben is a Grobn - fosd scho a Schlucht - nächst Furth bei Göttweig. In Furth gehma eascht in Kellergraben hoch, nochha kimmt da Zellergraben (des is a bisl lustig, ned vawirrn lossn!). Duachn Grobn fiaht da Themenweg Löss & Wein und da Wöterbesteig Wachau. Des Bsundare aun dem Grobm is, dass de bis 12 m hochn Föswänd eigentli koa Föswänd san, sundan aus knetbarem Löss bstehn. Do haum si eh scho a boa Leit mit ehna Kunstwerk vaehwign miassn. Des glaubts goa ned, dass des hoit, des is jo fosd senkrecht stehenda Gatsch. Nocha kemma zua an Obzweiga, links geht wieda zruck ois Rundweg noch Furth, des gehma aum Hoamweg. Grod weida fiaht da Weg laungsaum aussa und duach Weingärtn, im Lössbodn woxd da Griane Veltlina aum besten, bis ma unsa Zü erreicht haum - des Zellerkreuz. Waun ma no weida gehn, kemma duathi wo ma vorha woan, inn Fuchsleitengraben.