Alois Irlmaier
| Der Artikl is im Dialekt Obaboarisch gschrim worn. |
Alois Irlmaier (* 1894 in Scharam bei Siegsdorf in Oberbayern; † 1959 in Freilassing) woar Brunnenbauer, Rutngänger und Prophet. In seine Visionen schreibt er unter andam vum Drittn Wäidkriag und da Zeit danoch. 1947 hod er si vorm Amtsgricht in Laufen (Soizach) wegn Gauklarei vaantwortn miassn. Ea is owa freigsprochn woarn.[1]
Da Irlmaier wor a oanfocha und schlichta Mo, guadmiatig und huifsbereit. Ea wor ned schlau, ea wor ned grissn und hod a koa bsondare Phantasie ghobt. De de eam näher kennt hom, worn dea Ansicht, dass ea seine Visionen nia erfindn hätt kennan, dazu war a vui zweng begobt gwen.[2]
Inhoitsvazeichnis |
[drå werkln] s'Lem
Scho ois Kin hod ea af Wosseradern empfindlich reagiert. Späda hod si des no weida vastärkt. Ea hod nua iaba a Quäin geh miassn und scho san seine Händ "wurlert" woarn, wia des säim ausdruckt hod.
Vo 1914-1918 woar ea Soidot im earschtn Wäidkriag. Dabei is ea durch a Granotn im Unterstaund vaschitt worn. Viar Tog laung is ea unta da Erdn glegn, unta Schock, ohne Wossa und ohne Essn, dann hom's eam grettet. Ea woar a andara Mensch wia ea daun hoamkemma is. 1920 hod ea de Maria Schießinger gheirat, mid dea ea viar Kinder ghobt hod, dazua hod ea no an Ziahsohn afgnumma.
1926 is des Heisl vum Irlmaier bis af de Grundmauern obrennt. Zwoa Joahr hom ea und seine Leit bei Vawaundtn gwohnt. 1928 sans daun noch Freilassing zogn. Do hod ea si ois Wossasuacha, Brunnenbauer und Rohrvalega (Spengler) schnäi an Nam gmocht. Ea woa so erfolgreich, dass ea davo guad lem hod kenna.
In Freilassing hod'a daun seine earschtn Visionen ghobt. Maunche sogn, dass des mid seine dramatischn Vaschittung im Kriag z'duan hätt. Seine Begobung ois Woahrsoga hod si schnäi umgsprochn, wei ea a große Treffaquotn ghobt hod. Imma meahr Leid san zu eam kemma, oba ea hod fia de Weissogungen nia Gäid valaungt. Mit'n Beginn vum zwoaten Wäidkriag is de Nochfrog no greßer worn, wegn de Sorgn, Ängste und wegn de vuin Vamisstn.
1947 is ea wegn Gauklarei ongklogt worn. Des Amtsgericht in Laufen hod den Freispruch u.a. so begründet: "Die Vernehmung der Zeugen, …, hat so verblüffende, mit den bisher bekannten Naturkräften kaum noch zu erklärenden Zeugnisse für die Sehergabe des Angeklagten erbracht, dass dieser nicht als Gaukler bezeichnet werden kann."[3] Noch dem Prozesszeign Walter Feinbichler hod der Irlmaier während der Vahaundlung woahrgsogt, wos de Frau vum Richter grod dahoam mochat und wos si fia a Gwandl onhätt. Do hod da Richta sofuat an Gerichtsdiener losgschickt und wia a widakemma is, hod er de Aussogn vum Irlmaier bestätigt.[4]
De Fähigkeit zum Woahrsogn hod da Irlmaier owa imma mehr ois Plog empfundn und nur no fia wenig Menschn gmocht. Aus Verbitterung wegn de Spötter hod ea sogoa a Warnschild vor seim Heisl obringen lossen: "Bin nur noch in Angelegenheit des Brunnensuchens zu sprechen" [5]
Sein eigenen Tod hod ea vorausgsogt fia den Zeitpunkt, wo ea a Marienkapelln baun tät. 1959 hod ea damid ongfangt, kurze Zeit späda is ea gstorbn.
[drå werkln] Weissogungen
- Vorzeichn fian Kriag: Ollas ruaft Friede, Schalom! Do wiard's passiern.
- Dauer des Drittn Wäidkriags: Die ganze Sach werd net lang dauern, i siach drei Strich – drei Tog, drei Wochn, drei Monat, i woaß net genau, owa lang dauert's net!
- Vahoidnstipps fian Kriag: Gähds ned ausn Heisl aussi. Draußn gäht da Staubtod um und vui Mensch sterbn. Wea den Staub einschnauft kriagt an Kraumpf und stiarbt. Moch de Fensta ned af, schauts ned aussi, hängt'es mid schwoazn Papier zua. Olle offenen Wossa wearn giftig und olle offenen Speisn, de ned in vaschlossenen Dosn san. Losst's gweihte Kerzn brennan und bets. Noch 72 Stundn is ollas vorbei.
- De Katastrophn: Noch da Katastrophn wearn mehr Menschen tot sein ois in de zwoa Wäidkriag zsamm. De Viecha foin um, des Gros wiard gäib und dürr, de Totn wearn ganz gäib und schwoaz. Da Wind treibt de Todeswoikn noch Ostn ob.
- Klimavaänderung: Es wearn Südfrüchte bei uns wochsn. Es wiard vui wärma.
Fuaßnotn fia olle Weissogungen.[6]
[drå werkln] Schau aa
[drå werkln] Fuaßnotn
- ↑ Er spürt das Wasser und er sieht in die Zukunft…. In: Altbayrische Heimatpost vom 6. November 1949
- ↑ Egon M. Binder: Alois Irlmaier. Der Seher von Freilassing.
- ↑ Südost-Kurier vom 11. Juni 1947
- ↑ Wolfgang Johannes Bekh: Alois Irlmaier. Der Brunnenbauer von Freilassing. Sein Leben und seine Voraussagen, S.109
- ↑ http://www.spiegel.de/spiegel/print/d-44419110.html SPIEGEL Wissen: Peter Seewald, Der Erdball wird durchs All schlingern"
- ↑ Manfred Böckl, Prophezeiungen für das neue Jahrtausend, S.73f. De Woahrsogungen ins Boarische iabasetzt vum Wikipedia-Autor.
[drå werkln] Literatua
- Conrad Adlmaier: Blick in die Zukunft. Die Gesichte des Mühlhiasl; die Voraussagen des Alois Irlmeier von Freilassing. 1950
- Wolfgang Johannes Bekh: Bayerische Hellseher. Vom Mühlhiasl bis zum Irlmaier. Gespräche, Zitate, Ergebnisse um die große Schau in die Zukunft. 1976. ISBN 3-7787-3067-3
- Wolfgang Johannes Bekh: Alois Irlmaier. Der Brunnenbauer von Freilassing. Sein Leben und seine Voraussagen. 1990. ISBN 3-7787-3381-8
- Manfred Böckl: Alois Irlmaier. Blick in die Zukunft. 1998. ISBN 3-7787-3191-2
- Egon M. Binder: Alois Irlmaier. Der Seher von Freilassing. 1998. ISBN 3-89682-015-X
- Manfred Böckl: Prophet der Finsternis: Leben und Visionen des Alois Irlmaier. 1999. ISBN 3-431-03577-9
- Dietz-Rüdiger Moser: Geachtet & geächtet: bayerische Volkshelden in kulturhistorischen Skizzen. 2007. ISBN 3-934941-29-X
