Barthelmarkt

Der Artikl is im Dialekt Obaboarisch gschrim worn.

A Bierzäit am Barthelmarkt

Da Barthelmarkt in Oberstimm bei Manching is oans vo de äidestn Voiksfest vo Bayern. Sein Nåma hod a vom Sankt Bartholomä, am Schutzheilign vo de Fischer und Schäfer, der wo gleichzeitig a no Patron vo da Oberstimmer Kirch is. Er is jeds Jåhr oiwei åm letztn Wochnend im August (Freitåg bis Montåg).

As erste Moi daucht da Barthelmarkt in am Schreim vo 1354 auf, åba angeblich gibts n scho seid de Röma, de wo doda Viecha ghandlt hom. Doda gibts a heid no an Roßmarkt, auf dem oiwei no Pferdl vakafft wean.

Aufm Barthelmarkt gibts - wia auf jedm Voiksfest - Bierzäit, Fåhrgschäft, Tandla, Wiaschdlbudn und so weida. Die vier Bierzäit werdn vo vier verschiedene Brauerein beliefad: Herrnbräu, Toerring, Spåten und Ingobräu.

Wos an Barthelmarkt vo åndere Voiksfest unterscheidt is nåtiali des gånz eigene Flair. Dåzua ghead zum Beispui de eigens komboniade Barthelmarkt-Hymne oda da Barthelmarkt-Montag, wos scho in da Friah um Fümfe ålle auf de Disch stengan.

2010 hod åm Barthelmarkt-Montag da Sänger vo ara Band im Biazäit fia Furore gsorgt, weil a "Sieg" gruafa hod und a boa Leit ausm Publikum des aa mid "Heil" beåntwortet hom, zum Teil aa mit ausgstreckte Arm. Spaada hod a se entschuldigt und gmoant, dåss a eigndle bloß d'Stimmung im Zöit weida okurwen woit und a söiba aa ned woaß, wos eahn dåzua valeit hod. Ois Konsegwenz is a Stråfvafoahn gegan Sänga eigleit worn und de Band werd in Zukunft nimma eiglon wern. Vo dem Ereignis gibts aa Handyvideos auf Youtube und ondane Seitn.

Links

• Offizielle Webseitn: www.barthelmarkt.com