Voiksfest

A Voiksfest is, wia da Nåma scho sogt, a Fest vom Voik fias Voik. Des kå a Kerwa sei, oba aa a Feierwehrfest oda wos vagleichbårs. Månche hom a gor koan Grund, de han einfåch a so entståndn. Hauptsåch vui Leid und griawig is. Vui Voiksfest hom a Jahrhunderte oide Tradition, wia zum Beispui as bekånntaste und greßte vo da Wäit, d'Wiesn (vulgo Oktoberfest) in Minga. In Bayern håd boid a jeds gräßas Doaf oans. Voiksfest findn eigndle oiwei stått, außer im Winta, weils då z'koid is.

Wos gibts nå aufm Voiksfest?

Bierzäit

A Bierzäit mit Leit drin.

As ållerwichtigste is as Bierzäit, des ghead per definitionem jå scho dazua. Im Biazäit han in da Regl an haufa Biergarniturn zum draufhocka, a Bühne fia'd Blåskapoin (oder d'Partybänd) und an Ausschank. In månche ko må wos zum Essn kaffa, meistns a hoibads Giggal oda a Schweinerns. Söibstbedienung gibts meistns ned, die Bedienungen kemman zu oam an Tisch und hom månchmoi aa scho Maßn dabei, de wo ma eahna dånn glei direkt åbkaffa ko. Da Preis fiar a Måß Bia is hächa wia in da Boazn oda im Lådn, wei da Wirt an Gwinn måcha måg und as Festzäit und d'Bedienunga aa zoid wean woin. Olladings vastängan vui Leit ned, wårum da Biapreis desweng fåst jeds Jåhr oghom wean muaß, derawei as Bia woåndas jåhrlang as söibe kost.

Fåhrgschäft

Fåhrgschäft gibts nadiale aa aufm Voiksfest, wia zum Beispui Riesenråd, Kettnkarussell, Autoscooter, Geisterbåhn, Achterbåhn und so weida. De meistn låssn bloß niachdane Leit (oda soiche, de zumindest dånåch ausschaugn) fåhrn, weils Angst håm, dåss Bsuffane an Schmarrn måcha und si söiba oda iagndwem åndas wähdoa. Des is leida in da Vagangenheid scho oft båssiad; so is erscht 2009 oana in Neimarkt ausm Riesnrod gfoin.

Budn

Nem de Fåhrgschäft gibts aa no åndere Såcha zum amüsiern, wia zum Beispui Hau-an-Lukas, Schiaßbudn und Losbudn. Gwinna konnst vui, zum Beispui Blastikrosn, Lebkuachaherzal oder Stoffviecha. An de Schiaßbudn und voa oim am Hau-an-Lukas håd se scho so måncher vor seim Gspusi gscheid blamiert.

Fian Hunga zwischndurch gibts aa Imbissbuden, wånn oam as Essn im Biazäit z'deia oda z'vui is. Do gibts ois, vo Bråtwirschtl- und Lebakaassemmen und Brezn mid Kaas iba brennde Måndln und Zuckawattn zum Steckerlfisch.

Dandla

Bei gräßere Voiksfest gibts oft aa no Dandla, de wo ois megliche vakaffa, wia Hiat, Hosn, Besn, Pfånna, Schmuck und lauta Såch, des ma hoid so braucht (oder aa ned).

Häusl

As Häusl is eigendli nåchm Biazäit as zwoatwichtigste aufm Voiksfest, wei wosd obm neischüttst, kimmt a irgendwånn untn wieda naus. Auf de großn Voiksfest wern dåfia extrig Container aufgstöid, fia desd månchmoi aa zoin muaßt. Wannst des ned mechst oda wanns di fast zreißt und de Schlånga voam Häusl no z'lang is, nå konnst aa wuidbisln, zminderst wannst a Månnsbuid bist. Oba bass auf dåssd koan obieslst und dåss di koana beim Wuidbisln dawischt, zumindest koana, dea wo wos dogeng hod.

Wos ziagt ma då o?

A Gwandordnung gibts ned. De meistn Leid kemman entweda ganz leger, im Sunntagsgwånd oda in Tråcht. In de letztn Jåhr håd si oiwei mehr wieda d'Tråcht duachgsetzt, und voa oim de jungan Leit kemman oiwei mehra in Ledahosn und Dirndl.

Wer gäht nå do hi?

Aufs Voiksfest gengan Jung und Oid. Vui Leit gengan mit eahnane Familien hi, de junga Leit mit eahnane Freind. Dementsprechend han aa de Intaressn vatretn: Vui Junga woin eha Zau nauslåssn und gengan ins Biazäit (wo stått da Blåskapoin desweng aa imma äfta a Partyband aufspuit) und fåhrn Achterbahn; während de Familien zum Essn higäh und de Kinda Kettnkarusell fåhrn lassn.

Auf vui Voiksfest gibts aa Festredna, de wo oft vo boliddische Partein han und Woikåmpf måcha. Bekannt fia seine Biazäit-Redna is zum Beispui da Gillamoos in Omsberg.

Soichane Redn wean aa ois Biazäit-Redn bezeichned, oft mit a nägativn Konnotation: A Biazäit is nåchm Klischee da Inbegriff vom deppadn, ungebildetn, bsuffana Bauern, dea wo se leicht vo populistische Themen einehma låsst (z.B. "Olle fauln Auslända naus!") und dem Redna mit da gräßtn Goschn quasi aus da Hend frißt, solångs fia ean säiba panem et circenses gibt. A Paradebeispui dåfia is de inzwischn deitschlåndweit bekannte Redn vom ehemålign boarischn Minischterpräsidentn Günther Beckstein, dea wo (allerdings ned im Biazäit, sondan beim Rundfunk) gsågt hod, dåss ma "mid zwoa Maß no autofahrn ko".

A ähnlichs Klischee is da Ståmmdisch, wo ma in da kloana Rundn iba boliddische Probleme dischkriart und vameintlich oafache Lösunga findt, de wo ålladings im richtign Läm nia funktioniern daadn oda vui zu radikal han.

Wo gibts iwaroi Voiksfest?

Voiksfest gibts fåst in jedm Dorf in Bayern und Estarreich, åba aa außerhoib. De Cannstatter Wasen in Stuttgart zum Beispui is as zwoatgreßte Voiksfest in Deitschlånd, direkt nåch da Wiesn. Oba aa außahoib vom deitschn Språchraum gibts des, då hoaßts hoid dånn bloß ånders. Aba voa oim de Amerikaner hom des boarische Modell kopiert und hom an Haufa "Genuine Bavarian Volksfests", bei dene se si des Bia und sogår de Blåskapöin aus Europa kemma lassen.

Große Voiksfest in Bayern han zum Beispui:

• d'Wiesn
• as Gäibodnfest in Straubing
• da Gillamoos in Omsberg
• da Plärrer in Augschburg
• da Barthelmarkt in Oberstimm bei Inglståd
• as Herbstfest in Rosnham
• da Berch in Erlanga
• Und wennst gråd z Brasilien bist ...