George V. von Großbritannien
George Frederick Ernest Albert vu Sachsn-Coburg-Gotha (geboan: 3. Juni 1865 in Marlborough House in London; gestorbn: 20. Jenna 1936 in Sandringham) woa ois George V. vu 1910 bis zu seim Tod im Johre 1936 da Kenig vum Vaeinigtn Kenigreich vu Großbritannien und Irlånd (seit 1927: und Nordirlånd) und Kaisa vu Indien.
Inhoitsvazeichnis |
Lebnslauf[dro werkln]
Heakunft und Kindheit[dro werkln]
George V. woa da zwoate Sohn vum Edward VII., dem spatan Kenig vu Großbritannien, und da Alexandra vu Dänemark. Ea woa da Cousin vum deitschn Kaisa Wilhelm II., ebenso wia dea vum russischn Tzarn Nikolaus II., mit welchn ea sogår storke Ähnlichkeitn gmeinsom kopt hod. George ståmmt aus em deitschn Füastnhaus vo Sachsn-Coburg-Gotha, und woa, seit 1714, da easte britische Monarch, dea englisch, ohne an deitschn Akzent, gsprochn hot.
George V. ois Prince of Wales[dro werkln]
In seina Jugnd hot ea scho da Marine dient und hot vüü Teile vum British Empire bereist. Ea hotn Titel Herzog vu York trogn, und woa a a begeistata Jäga. Noch em Tod vu seim ältan Bruada Albert Victor im Johr 1901, is ea offiziella Thronfolga wuan, und dåmit zum Prince of Wales. Am 6. Juli 1893 heirat' ea im St. James's Palace die deitsch-englische Prinzessin Maria vu Teck, de eigntlich die Valobte vu seim totn Bruada gwesn waa. Die Ehe is sea glücklich valoffn, in da Öffntlichkeit hot ea ia oiwai groaße Vaeahrung gegnüba bråcht und zsommen hobns 6 Kinder kopt:
- Edward (* 23. Juni 1894; † 28. Mai 1972), Füast vo Wales, ois Edward VIII. König vo Großbritannien und Nordirlond, Kaisa vo Indien, nåch seina Obdonkung Herzog vu Windsor ∞ Wallis Simpson (1896–1986)
- Albert (* 14. Dezember 1895; † 6. Feba 1952), Herzog vu York, als Georg VI. König von Großbritannien und Nordirlond, Kaisa vu Indien ∞ Lady Elizabeth Bowes-Lyon (1900–2002)
- Mary, Princess Royal (* 25. April 1897; † 28. März 1965), ∞ Henry Lascelles, Earl of Harewood (1882–1947)
- Henry (* 31. März 1900; † 10. Juni 1974), Herzog von Gloucester ∞ Lady Alice Montagu-Douglas-Scott (1901–2004)
- George (* 20. Dezember 1902; † 15. August 1942), Herzog von Kent ∞ Prinzessin Marina vu Griechnlond und Dänemark (1906–1968)
- John (* 12. Juli 1905; † 18. Jenna 1919)
In die Johr vu 1905 bis 1907 wor George V. Lord Warden of the Cinque Ports.
Regiarung[dro werkln]
1910 is George seim Vota ois George VI. auf en Thron gfoigt. 1911 wuade ea auf da sogenonntn Durbar in Delhi in Indien zum Kaisa vu Indien gekreent, de gleichzeitig die letzte woa, de in Indien voizoogn woan is.
Easta Wöitkriag und Onnohme vum Nomen Windsor[dro werkln]
Da Ausbruch vum Eastn Wöitkriag hot im Vaeinigtn Kenigreich zu a massifn antideitschn Stimmung gfiaht. Ois easts wuade dea Vawondte vu George, Luis vu Battnberg, dea ois easta Seelord in da Royal Navy dient hot und bei Kriagsausbruch nu dafia gsorgt hod, dass die britische Flottn mobil woa, massif attakkiat. Battenberg hot sei Omt aufgebn miassn, sein Füastntitl aufgebn miassn und sein Nomen in Mountbatten ändan miassn und danoch hotn da Kenig zum Marquess of Milford-Heaven anonnt. A die deitschn Vawondtn vu sei Frau, Maria Teck hobn donn englische Odlstitl aholtn. Da Kenig selba bezeichnet sich selba zwor als vollkommn britisch, weat oba trotzdem vu seine Untatanen sea skeptisch betrochtet, voa ollem nochdem ea sein Vetta Albert vu Schleswig-Holstoa vateidigt hod, dea britische Gfongenenloga beaufsichtigt hot. Oamol, ois da Premieeminista David Lloyd George oamol zum Kenig bstellt woan is, soll dea sogor gsogt hobn: "Mecht wissn, wos mia mei kloana deitscha Freind z' sogn hot". Ois George's Cousin, Tzar Nikolaus II. in Russlond zum Obdonkn zwungen woan is, hot George eam es Asylrecht vaweigat, wohrscheinlich weng dessen deitscha, in Großbritannien vahosstn Frau Alix. Ea schrieb seim Cousin, dass es bessa fia eam waa, wenn ea decht in Frankreich oda Spanien Zuaflucht suachat, wos offnsichtlich bedeitet, dass ea koa Intresse dron kopt hot, eam z' höifn. Nochdem George imma mea unta öffentlichn Druck grotn is, hot ea die deitschn Flaggn, de traditionell, weng da Heakunft vum britischn Kenigshaus, in da St. George's Chapel in Windsor aufkängt woan, obnemmen lossn. Endgüitig zum Umschwenkn hots oba east sei Kommentar zum in da Times vaöffentlichtn Artikl vu H. G. Wells brocht, in dem behauptet woan is, da Hof sei "fremdländisch geprägt": "I bi vielleicht wenig übazoignd, oba I wüü vadommt sei, wenn I a Fremdlända bi!". Am 17. Juli 1917 is es Haus Windsor proklamiat woan. Da Kenig hott damit fia sich und fia olle Nochkommen vu da Queen Victoria auf deitsche Nomen und Odlstitl vazichtet. Sei Vetta Wilhelm II. hot donn drüba in Deitschlond gspottet, ea tat sich scho drauf frein die Auffiahrung vum Stickl Die lustign Weiba vu Sachsen-Coburg-Gotha z' sehn. Zu sei Beeadigung hot ea en Herzog vu Sachsn-Coburg-Gotha (a a Vetta vu Georg) gschickt, dea in Nazi-Uniform aschienen is.
Spatare Regiarungsjoa[dro werkln]
Die nächstn 20 Joa hot George ruhig und ohne groaße Skandale vabrocht. Ea is fia sei gewissnhofte Afüllung vu seine Pflichtn bekonnt gwesn, und nua zwoa Zwischnfäll san awähnensweat: 1927 hot ea sein Titl, duach die Unobhängigkeit Irlonds, in Kenig vum Vaeinigtn Kenigreich vu Großbritannien und Nordirlond ändan miaßn und die Weltwiatschoftskrisn ob 1929, außadem woa ea da easte Monarch, dea die, inzwischn traditionell gwoane, Weihnochtsonsproch ans Volk koitn hot (1932). Zu seim ältestn Sohn hotte ea a ziemlich zwiaspältigs Vahältnis. Dessn Vabindung mit a 2-mol gschiednen Amerikanarin hot ea ois a Sakrileg betrochtet. George hot sich oiwei gweigat Wallis Simpson z' empfongen und ea hot a sei Frau schwöan lossn des nia z' toan, wenn ea a mol tot waa. Üba sein Sohn hot ea mit vüü Weitblick sogn kenna: "Wenn I tot bi, donn weat sich dea Bua innaholb vu 12 Monat ruinian".
Peasönlichket[dro werkln]
Da Kenig woa eigntlich nua mäßig gebildet und recht wenig b'lesen, sei Freizeit hot ea ois begeistata Philatelist zuabrocht. Er hot die Briefmorknsammlung vum englischn Kenigshaus aufbaut (Royal Philatelic Collection), de heit oane da weatvoistn ibahaupt is und noch George's Tod is sie in Stootsbsitz ibagongan. Ea hod Raritätn vo Briafmarkn aus olla Welt kafft, und nua oa oanzigs Moi soi ea übabotn woan sein, und des woa bei da Vasteigarung da British Guiana 1¢ magenta, de Arthur Hind griagt hot. Die Begeistarung fia des Hobby hot zum Schluss sogoa zua Ausbreitung vu dem Hobby in Großbritannien gfiaht.
Im Gegnsotz zu sein Vota, dea ois weltgewondt goitn hot, woa ea eha phantasielos und pedantisch, oba genau wia sei Vota woa a ea a extrema Raucha, wos eam long schware gsundheitliche Probleme bereitet hot. Sogor noch sei Lungenoperation hot ea stork weita gracht, sodass sich sei Zuastond imma weita vaschlechtat hot, bis sei Leiborzt Lord Dawson, mit da Zuastimmung vu da Queen Mary, sei Leidn vakürzt hot, idem ea iam a Übadosis Morphin gebn hot. Sei Sorg is in da keniglichen Gruft da St. Georges-Chapel in Windsor beigsetzt woan. Spata is dea no in a Hochgrob übafüaht woan, in dem donn 1953 a Queen Mary beigsetzt woan is.
Im Web[dro werkln]
Commons: Georg V. – Oibum mit Buidl, Videos und Audiodateien
