Innare Mongolei

Aus Wikipedia

Der Àrtikl is im Dialekt Owaöstareichisch gschriem worn.

Autonome Region Innare Mongolei
Öbür mongɣul-un öbertegen ǰasaqu orun
内蒙古自治区 Nèi Měnggǔ Zìzhìqū
Basisdatn
Hauptståd und Regiarungssitz:	Hohhot ( Kökeqota; 呼和浩特 Hūhéhàotè Shì)
Flächn:	1.183.000 km² (drittgreßte Region vu China; 12% vu gãnz China)
Einwohna:	23.760.000 (Rãng 23 in China)
Bevöikarungsdichtn:	20,1 Leid/km²
Offizielle Språchn:	Mandarin, Mongolisch* * im klassischn Alphabet
Voasitznda vu da Autonomen Region:	Bagatur
Parteisekretäa:	Cho Bo
D'Låg vu da Innan Mongolei (rosa) in China
Webseitn:	http://www.nmg.gov.cn

Innare Mongolei is de Bezeichnung vu am autonomen Gebiet im Noadn vu da Voiksrepublik China. Auf Chinesisch hoaßt d'Innare Mongolei Nèi Měnggǔ (內蒙古), auf Mongolisch Öbür mongɣul (). Da ISO 3166-2-Code vu da Innan Mongolei is CN-15.

Aa wãun da Begriff Äißare Mongolei heid vaåitat is, is bei da Innan Mongolei da sinozentrische Nãum nu da offizielle. Da greßte Teu vu da Äißan Mongolei is heid da unåbhängige Stååd Mongolei; de Mongoin nennen de Regionen Äißare und Innare Mongolei liawa d'Hintare und d'Voadare Mongolei. De Mongoin måchn heid åwa netta nu an Bruchteu vu da Bevöikarung aus: Fåst 80% vu de duat lebadn Leid han Han-Chinesn.

D'Innare Mongolei is dünn besiedlt, lãndwiatschåftli is kaum wås mid iah ãu zum dafãnga, åwa sie håd vüi Rohstoffe und is desweng und weu's a lãnge Grenz håd strategisch wichtig.

[dro werkln] Gschicht

schau aa unta da Gschicht vu China und vu da Mongolei

Dass ma heid vu ana Innan und ana Äißan Mongolei redt, håd historische Gründe: Zu de Zeidn vu da chinesischn Qing-Dynastie is de Innare Mongolei in gwähnliche chinesische Provinzn eiteud woan, d'Äißare Mongolei is åwa im Großn und Gãnzn so glåssn woan, wia's voahea aa schãu gwesn is.

A Jadedråch vu da Hongshan-Kuitua, de vu 4700 bis 2900 voam Christus dauat håd

Lãnge Zeid is de Kontrolle üwa des Gebiet, des ma heid Innare Mongolei nennt, zwischn de bäialichn Chinesn im Südn und de nomadischn lebadn ãndan Vöika wia zum Beispüi de Mongoin im Noadn hin und hea gwexlt. Im Ostn, im mandschurischn Gebiet, håm eha ãndare Vöika d'friahe Gschicht gprägt wia de Chinesn und de Nomadn aus'm Noadn. Es findn si zwåa mearare Paralleln in da Gschicht vu de vaschiedenen Regionen, de heid zu da Innan Mongolei zsãmmgfåsst han, s'Gebiet is åwa groß und deshåib muaß ma aa betonen, dass duat zwåa nomadische Vöika glebt håm, åwa em ned ans üwaråi sondan vaschiedene in vaschiedene Teile vu dem Gebiet.

Direkte Einflüsse vu de chinesischn Dynastien auf de Gengd håd's schãu voam Christus seina Zeid gem. Nåch'm Dschingis Khan, am Mongoin, dea ålle mongolischn Vöikagruppm vaeint håd und aa China eignumma håd, und dem seina Yuan-Dynastie im 13. und 14. Joahundat håd de Ming-Dynastie vaãnlåsst, dass ma ungefäa duat, wo heid de Südgrenz vu da Innan Mongolei is, de Große Maua neich ãulegt. Unta da mandschuarischn Qing-Dynastie (17. Joahundat bis 1912) is d'Innare Mongolei in mearare Vawåitungseinheitn aufteud woan. In dera Zeid hãm de Mongoin ned vu oana vu de neich gschåffenen Untaregionen in a ãndare reisn deafn. In da Qing-Zeid håd außadem d'gezüite Ãusiedlung vu Han-Chinesn in da Innan Mongolei und in da Mandschurei iahn Ãufãng ghåbt, wås mid ana Bedrohung vu de Russn zsãmmhängt. S'Lãnd håm si de neichn Siedla entweda afåch vu de Nomadn gnumma oda se hãm's påchd oda de mongolischn Adlign åkauft.

A Vagleich zwischn de Vawåitungseinteilungen vu da Republik China und da Voiksrepublik China: Ma siacht, dass's d'heidige Innare Mongolei in da Republik China ned gem håd, weu's dåzumåis in de Provinzn Rehe, Chahar, Suiyuan, Ningsia, Liaopeh und Hsingan aufteud woa. Außadem san de Grenzvaläufe ned genau de söiwn.

In da Zeid vu da Republik China håd d'Äißare Mongolei iah Unånhängigkeid wieda zruckkriagt, d'Innare is im Gengsåtz zu da Äißan komplett vu de Lãndkåatn vaschwundn, weu's nämli in neiche Provinzn eiteud woan is. 1931 hãm se de Japana d'Mandschurei gschnappd und duat in Stååd Mandschuko eigricht, in dem aa Teile vu da heiding östlichn Innan Mongolei gwesn han.

Da De Wang

1937 håd da Mongolnprinz Demchugdongrub (auf chinesisch De Wang gnennd) d'Restln vu da Innan Mongolei fia unåbhängig eakläad und den Stååd Mengkiang gnennd. Des is wia Madschuko a japanische Marionettn gwesn. 1945 is dea Stååd vu sowjetische und äißa-mongolische Truppm wieda earowat woan und wieda ãn's chinesische Stååtsgebiet ãugschlossn woan.

Nu bevoa China 1947 a Voiksrepublik woan is, is de Innare Mongolei nåch'm sowjetischn Modöi vu ana Mindaheitnpolitik zu ana Autonomen Region gmåcht woan, wia ma's in China außadem mid Xinjiang, Ningxia, Tibet und Guangxi gmåcht håd. D'Inna-Mongolische Voikspartei, de öida is wia d'chinesische, is mid dea vaschmoizn woan. Bis zum 49a-Joa is s'Gebiet vu da heiding Innan Mongolei in de Provinzn Rehe und Suiyuan untateud gwesn; danåå is aa nu da Westn vu da Mandschurei (Teile vu de Provinzn Heilongjiang und Fengtian) zu ia dazuakemma. So is aus am kleanan Gebiet, des netta d'Hulunbuir-Gengd umfåsst håd, innahåib vu oam Joazehnt d'Innare Mongolei wia ma's heid kennt entstãndn, weu vüi Lign, Bãnna und Regionen ãugschlossn woan san, weu duat aa mearare Mongoin daham gwesn han. Desweng håd d'Innare Mongolei aa de längliche Foam kriagt. In da Kuituarevoluzion 1969 san große Teile vu da Innan Mongolei auf de Nåchbåaprovinzn aufteud woan, des is åwa im 79a-Joa wieda rückgängig gmåcht woan.

Es gibt wia aa in Sinkiang und Tibet Gruppm, de fia'd Unåbhängigkeit vu da Innan Mongolei vu China und geng an, wia de des moanan, chinesischn Imperialismus kämpfm. De Gruppm hãm åwa im Gengsåtz zu de uigurischn und tibetischn ned so vüi Einfluss und Untastützung weda in da Innan Mongolei nu außahåib. In de 80a-Joa hãm a poa Studentn in Apparat vu da Inna-Mongolischn Voikspartei in Fråg gstöid und oana, dea Hada hoaßt, håd 1992 d'Südmongolische Demokratische Allianz gründt. Da Hada is iatst åis politischa Gfãngena eigspead; da Xi Haiming, a ãndara vu de Studentn, is ins Exüi gãnga und håd 1997 in New York a neiche inna-mongolische Partei auf'd Fiaß gstöid.

[dro werkln] Geografie

A Wüstn in da Innan Mongolei

Klimadiagramm vu Hohhot

Da Göiwe Fluss in da Innan Mongolei

D'Autonome Gebiet vu da Innan Mongolei grenzt im Noadn ãn Russlãnd und an'd Mongolei; im Südn grenzt's - vu Westn nåch Ostn - an Gansu, Ningxia, Shaanxi, Shanxi, Hebei, Liaoning, Jilin und Heilongjiang. D'Innare Mongolei is bis 2400 km lãng åwa stöinweis netta 200 km broad.

S'Klima in da Innan Mongolei is a kontinental-gmäßigts mid am lãngen kåidn Winta und am kuazn wåamen Summa. So liegt de duachschnittliche Temparatua im Jänna bei 23 Grad minus im Noadostn und bei zehn Minusgrad im Südn; im Juli is's duachschnittli 17 bis 23 Grad woam. Vum Südosten zum Noadwesten hi nimmt de Niadaschlågsmeng imma mea åb. Im Noadn san's stöinweis netta 50 mm Niadaschlåg im Joa, in de hechan Gengdn im Noadostn åwa bis zu 450 mm.

Da Großteu vu da Innan Mongolei is vu Hochebenen und Gebiagskettn dominiad. Vum Ostn hea eahem si de Ebenen vu da Mandschurei in a Gebiage, im Zentrum vu da Region san de Beag Yinshan und Langshan. Ãn da Grenz zua Region Ningxia liegt mim Helan da hechste Beag vu da Innan Monglei, dea wås 3.556 Meta hoch is. D'Grenz zua unåbhänging Mongolei büidet greßtnteus d'Gobi-Wüstn. Ãndare greßane Wüstn han d'Mu Us und d'Hobq-Wüstn. Im Südn måcht da Göiwe Fluss (aa åis Huanghe bekãnnt) d'Grenz zum Rest vu China. De zwoa ãndan wichting Flüss in da Region han da Amur im äißastn Ostn und da Liao.

In de letztn Joa is d'Desertifikazion zu am eanstn Problem woan.

[dro werkln] Politik und Regiarung

D'chinesische Vafåssung garantiad in de Artikl 112 bis 122, dass de autonomen Regionen gwisse Söibstbestimmungsrechte hãm, wås d'Politik und Wiatschåft betrifft. In da Theorie schaut des so aus, dass a autonome Region, wia's de Innare Mongolei jå is, eha an Eamessnsspüiraum hãm, wãun's drum gehd, de nazionaln Richtlinien bei ökonomische Frång umzsetzn. In da Praxis passt da Sekretäa vum Regionalkommitee vu da Partei (d'kommunistische, de jå de oanzige is, de's gibt) åwa gãnz genau auf, ob da Voasitznde vu da Autonomen Region eh brav is. Währnd da Voasitznde in da Rögi a ethnischa Mongoi is, is da Parteisekretäa gwähnli a zuagroasta Han-Chines aus am gãnz an ãndan Teu vum Lãnd. Da jetzige Parteisekretäa zum Beispüi kimmt aus Anhui und hoaßt Chu Bo, da neiche Voasitznde (seid Aprüi 2008) hoaßt Bagatur und is a ethnischa Mongoi, wia aa sei Voagänga, da Yang Jing aus da Ståd Ordos, dea iatst da Voasitznde vu da stååtlichn Kommission fia ethnische Ãnglegnheitn is. D'Regionalregiarung håd im Großn und Gãnzn d'söiwe Struktua wia's aa d'Regiarung vu ana ned-autonomen Provinz vu China håd.

D'Politik in da Innan Mongolei is eha auf Voazeigeprojekte hi ausgricht, so wia Stråßn vabreadan und riesngroße Häisa baun, åis auf des, wås da Großteu vu de Leid eigntli brauchat. Da owaflächliche Foatschritt wiad heagnumma, damid's da Zentralregiarung in Peking zoang kinan, dass si wås tuad in da Innan Mongolei. Fia'd 60-Joa-Feia vu da Gründung vu da autonomen Region is in am Voaoat vu Hohhot a Stadion fia sechzgtausnd Leid baut woan, wås an Haufn Göid kost håd, åwa kaum nu amåi voi sei wiad. De Manie vu da Regiarung, dass's Bruttoinlãndsprodukt steing muaß, füahd dazua, dass's Wåxtum relativ unausgeglichn is. Dazua kimmt nu, dass da Parteisekretäa und ãndare Regionalpolitika oft amåi korrupt hãndln und si in dem Fåi sogåa traun, geng'd Zentralregiarung z'agian.

[dro werkln] D'Administrative Gliedarung

De Vawåitungseinheitn vu da Innan Mongolei und weidane Siedlungsgebiete vu de Mongoin in China, danem da unåbhängige Stååd Mongolei

D'Hauptståd vum Autonomn Gebiet Innare Mongolei is Hohhot, d'greßte Ståd åwa Baotou (ungefäah 1,3 Milljonen Einwohna).

Auf da Ebene vu de Beziake is de Innare Mongolei in nei beziaksfreie Städt und drei Bünde (Aimags) teud:

Städt			Aimags
Hohhot 呼和浩特市	Baotou 包头市	Wuhai 乌海市	Xilin 锡林郭勒盟
Chifeng 赤峰市	Tongliao $通辽市	Ordos 鄂尔多斯市	Hinggan 兴安盟
Hulun Buir 呼伦贝尔市	Bayan Nur 巴彦淖尔市	Ulanqab 乌兰察布市	Alxa 阿拉善盟

Vüi vu de „Städt“ san east in de letztn Joa entstãndn und hãm Lign easetzt. Auf da Kreisebene teud si d'Innare Mongolei in 49 Bãnna, 21 Stådtbeziake, 17 Kroas, 11 Städt und 3 Autonome Bãnna (des san insgsãmt 101 Einheitn); auf da Ebene vu de Gmoana in 457 Großgmoana, 220 Stråßnviatl, 98 Sum, 68 Gmoana, 17 Nazionalitätn-Gmoana und oa Nazionalitätn-Sum.

D'Hauptståd vum Alxa-Bund (östlichsta Teu vu da Innan Mongolei): Bayan Hot

Satellitnaufnãhm vu Baotou

zentrala Plåtz in Hohhot

[dro werkln] Demografie

Bei da Voikszählung vum Joa 2000 han 23.323.347 Einwohner in da Innan Mongolei zöhd woan. D'nãmensgebade Voiksgruppm, de Mongoin, san schãu längst netta nu a Mindaheid in eanam eignen Autonomen Gebiet. Fåst 80% vu de Einwohna han Han-Chinesn, um de 17% Mongoin, guade 2% Mandschu und da Rest teud si auf an Haufn kleanare Gruppm auf.

Bis zum End vum 17. Joahundat håd's in da Innan Mongolei quasi kane chinesischn Bewohna gem, sondan netta mongolische und ãndare ned-chinesische Vöika. Mi'm Ãufãng vum 18. Joahundat hãm dãun d'rögimäßige Eiwãndarung vu de Chinesn ãugfãnga. De ned-chinesischn Vöika vu da Innan Mongolei findn si ålle ned netta in da Innan Mongolei sondan aa in de Gebiete rundum.

In mãnche Teule vu da Innan Mongolei is's schãu seid Ewigkeitn so gwesn, dass si Bewohna aus'm Südn mid Leid aus'm Noadn ågwexlt oda vamischt hãm, wås voa oim beim Göibm Fluss da Fåi wåa. De neichaste Phasn, in dea de Han-Chinesn duat aufi ziang, håd am Ãfãng vum 18. Joahundat ãgfãnga und is dåzumåis vu da mandschurischn Qing-Dynastie gföadat woan. De Wöin håd bis ins 20. Joahundat ãdauat; d'Han lem heid zum greßtn Teu in da Hetao-Region und in a poa ãndare Gengdn im Zentrum und im Ostn vu da Innan Mongolei.

De 17%, de wås de Mongoin heid nu ausmåchan, san zsãmmgsetzt aus vaschiedene mongolischspråchige Bevöikarungsgruppm, zu de vum offizielln China aa de Burjatn und Oiratn zöhd wean. Vü vu de tradizionöi nomadisch lebadn Mongoin san zua Sesshåftigkeit üwagãnga, nåchdem eanare Såchn in de 1950a- und -60a-Joa vum maoistischn Reschiim vastååtlicht woan han.

Soidådn vu da chinesischn Armee, de gråd in da Innan Mongolei stazioniad han, wean bei dea Statistik ned midzöhd.

[dro werkln] Språchn

A zwoaspråchig ãugschrimne Kentucky Fried Chicken-Filialn in Hohhot

De Han-Chinesn vawendn je nåch Region vaschiedene Dialekte, so findt ma im Ostn vu da Innan Mongolei Nordost-Mandarin-Dialekte, in de zentralan Teule dominian eha de Jin-Dialekte, de mid'm Dialekt aus Shanxi eng vawãndt han. De greßan Städt (Hohhot und Baotou) hãm jeweus eanan eingnen Dialekt entwückit.De Mongoin hãm genau aso eana Dialektvüifåit. D'standardmäßige Ausspråch vum Mongolischn in China orientiad si am Chahar-Dialekt vum Blaun Bãnna in da zentraln Innan Mongolei, währnd masi in da unåbhänging Mongolei am Chalcha-Dialekt orientiad. De ãndan ethnischn Gruppm wia de Daur, Ewenkn und Oroqen speak hãm eanare eingnen Språchn.

In da Innan Mongolei miaßn ålle Stråßnschüidln, Vakaufsständ und Dokumente vu da Regiarung zwoaspråchig sei mid'm klassischn Mongolisch und im Chinesischn. Es gibt drei mongolische Feansehsenda, in da letztn Zeid håd si si außadem duachgsetzt, dass de Duachsång in de öffntlichn Vakeahsmittln zwoaspråchig gmåcht wean. In de städtischn Zonen kãu ma åwa feststöin, dass s'Mongolische imma mea vum Chinesischn zruckdrängd wiad, weu vu de jingan Leid imma mea fließnd Chinesisch redn kinan. Am Lãnd åwa hãm si de mongolischn Tradizionen nu dahåidn kina; es wiad sogoa nu im åidn (klassisch-mongolischn) Alphabet gschrim, währnd ma in da Äißan Mongolei a kirillischs Alphabet eigfüaht håd. Im kirillischn Mongolisch schreibat si da offizielle Nãm vu da Region Өвөр Монголын Өөртөө Засах Орон (Övör Mongolyn Öörtöö Zasach Oron).

[dro werkln] Kunst und Kuitua

Gråslãnd in da Innan Mongolei

De scheinbåa endlose gråsige Lãndschåft is schãu imma a Kennzeichn gwesn vu da Innan Mongolei und aa fia d'Innare Mongolei. In da mongolischn Kunst håd de Dåastöllung vum Gråslãnd und vu de mongolischn Tradizionen an hochn Stöllnweat. De Mongoin vu da Innan Mongolei übn zåihreiche tradizionölle Kunstfoamen aus; eana Küch is greßtnteus vu da tradizionöi mongolischn åågleitet und basiad auf Müich und Lammpifleisch. Voa oim da Feiatopf håd si vu da Innan Mongolei aus weidavabreitn kina; Lebmsmittlmarkn aus da Innan Mongolei vamåaktn meißtns Müichprodukte und Eis zum Schlecka.

Bei de Han-Chinesn is de Shanxi-Opa a recht beliebte tradizionelle Kunstfoam, aa d'ostasiatische Zirkuskunst håd in da Innan Mongolei an hochn Stöllnweat.

[dro werkln] Wiatschåft

Ãnbauflächn fia Weizn findn si voa oim bei de Flusstäla; wo's trickana is, wiad's Lãnd vü mea fia Headnviecha wia Geaß und Lammpin heagnumma, wås in da Rögi mid da tradizionöin, nomadischn Lemsweis vabundn is. 1991 håd's in da Innan Mongolei 204.000 Kamöi, 3,7 Milljonen Kiah, anahåib Milljonen Pfealn und fåst 30 Milljonen Kloawiedakaia gem.

In de berging Gengdn im Ostn hãm aa d'Foastwiatschåft und s'Jagan an hechan Stöinweat – Rentiaheadn hoidn si voa oim de Ewenkn in eanam autonomen Bãnna. Aa Kaschmiawoin wiad in da Innan Mongolei aa produziad. Neichane Faktoan, de im Wuhai-Gebiet aufkemman, san Weitraum und d'Weiprodukzion; wichtig woan is da Ãubau vu Föidfricht east mid de chinesischn Siedla.

Haufatsweis findt ma in da Innan Mongolei Bodnschätz wia Koihn, Eadgas und bei a poa söitene Stoffe wia Niob, Zirkonium und Beryllium håd de Innare Mongolei mea Ressuasn wia de ãndan Provinzn vu China. Da Åbbau und d'Vaweatung vu de Stoffe woan in da Vagãngenheid åwa ziemli ineffizient, woduach ma im End aus vüi weng Nutzn ziang håd kina, in da Luft weid z'vü Schådstoffe han und voa oim in Hohhot aus grauslicha Smog si entwückin håd kina. De wichtigan Industriezweige beschäfting si mid da Koihn, da Eazeigung vu Enagie und mim Hoiz. In da Zukunft mecht d'Innare Mongolei aa bei da chemischn Industrie, in da Metalluagie und aa im High-Tech-Bereich a greßane Roin spüin.

S'Bruttoinlãndsprodukt vu da Innan Mongolei håd im Joa 2006 479 Milliardn Yuan, åiso guad 60 Millionen US-Dolla ausgmåcht, wås a Steigarung um 18 % im Vagleich zum Joa davoa bedeitt håd; s'duachschnittliche Wåchstum pro Joa liegt bei 16,6 %. In da Ståd håd s'vafügbåare Einkommen 10.358 Yuan, am Lãnd 3.342 Yuan ausgmåcht; beide Ãngåm beziang si auf 2006 und hãm an Ãnstieg um jeweus ungefäa 12 % bedeitt. Des Wiatschåftswåchstum håd wia in eigntli gãnz China aa in da Innan Mongolei dafia gsoagt, dass üwaråi neiche Heisa baud wean; im Vagleich zu Peking oda Schanghai is s'BIP vu da Innan Mongolei åwa um üwa d'Höifde niadriga.

[dro werkln] S'chinesische Wöidraumprogramm

S'JSLC

Oane vu de chinesischn Ãnlång fia eana Wöidraumprogramm, s'Jiuquan Satellite Launch Center (JSLC) liegt im äißastn Westn vu da Innan Mongolei, im Ejin-Bãnna. Benãnnt is's nåch da nächstglengnen greßan Stådt (Jiuquan), de schãu in da Nåchbåaprovinz Gansu liegt. Gründt woan is des Wöidraumzentrum 1958, wås haaßt, dass des des öideste vum Lãnd is, außadem san in kana ãndan chinesischn Ãnlåg so vü Raketn in'd Luft gschossn woan. Wia de ãndan soichn Ãnlång aa is aa s'JSLC fia'd Öffntlichkeit ned zuagängli.

[dro werkln] Intaressants fia Ummanãndaroasade

Fia Touristn, denan d'Lãndschåft ned gnuag is, is voa oim d'Hauptståd Hohhot intaressant. De wichtigan Såchn zum Ãuschau san:

• Da Dazhao-Tömpi, a lamaistischa Tömpi aus'm Joa 1580. De Bsondaheitn vu dea Ãnlåg san a Buddha-Statue aus Süiwa, kunstvolle Dråchnschnitzarein und de Wãndbüidln.
• Da Xiaozhao- oda Chongfu-Tömpi, emfåis a lamaistischa Tömpi, åwa vum Joa 1697 und vum Qing-Kaisa Kangxi.
• Da lamaistische Xilituzhao-Tömpi, da greßte aus da Gengd vu Hohhot the largest Lama, dea außadem amåi s'regionale Zentrum vum Lamaismus woa.
• S'Zhaojun-Gråb

Åwa aa im Rest vu da Innan Mongolei san Såchn zum findn, de ma si åis Ummanãndaroasada ãuschau soit. A guads Beispüi dafia is im Dschingis Khan sei Mausoleum bzw. Scheingråb in da Stådt Ordos.

Fia de Freind vu da Natua, de's liawa ned so sandig hãm, wia's in da Wüstn waa, empföihn si de Graslända vu Bashang bei da Grenz zu Peking. Im UNESCO-Park Arshihaty Stone Forest kãu ma pråchtvolle, natiali entstãndene Granit-Foamazionen bewundan.

Tömpi vu de fümf Pagodn in da Hauptståd Hohhot

A buddhistischa Tömpi bei Wudangzhao

D'Große Maua ãn da Grenz zua Provinz Shanxi

Aus'm Föisn gmoaßlte Buddhastatuen

[dro werkln] Weblinks

Commons: Innare Mongolei – Buidl, Videos und/oda Audiodatein

• A Bericht üba'd Innare Mongolei vu da Gsöischåft fia bedrohte Vöika
• Datn zua Innan Mongolei auf german.china.org

Administrative Gliedarung vu da Voiksrepublik Kina

Provinzn: Anhui | Fujian | Gansu | Guangdong | Guizhou | Hainan | Hebei | Heilongjiang | Henan | Hubei | Hunan | Jiangsu | Jiangxi | Jilin | Liaoning | Qinghai | Shaanxi | Shandong | Shanxi | Sichuan | Taiwan (beãnsprucht, ned kontrolliad) | Yunnan | Zhejiang

Autonome Gebiete: Guangxi | Innare Mongolei | Ningxia | Xinjiang | Tibet

Regiarungsunmittlbåre Städt: Beijing | Chongqing | Shanghai | Tianjin

Sondervawåitungszonen: Hongkong | Macao