Pongaurisch

Der Artikl is im Dialekt Pongaurisch gschrim worn.

Pongauer Dialekt (Boarisch)
Vabroadung:	(AT) - Bundeslond Soizburg
Sprecha:	za. 60.000
Linguistische Klassifikazion:	Indogermanisch Germanisch West-Germanisch Hochdaitsch Owerdaitsch Boarisch Sidmittlboarisch Pongaurisch
Offiziella Status:
Åmtssproch in:	-
Sprochcodes:
ISO 639-1:	-
ISO 639-2:	(B) gem	(T) -
ISO 639-3:	bar}
SIL:	BAR

Pongaurisch werscht da Dialekt gnonnt, den ma im Soizburger Lond (Esterreich), im Bezirk Seiger Hons (oder kurschz Pongau gnonnt) reedt. As Pongaurische is a Ywergongsdialekt vam Mittl- zan Sydboarischen und houd sowoi sydboarische ois wia aa mittlboarische Elemente. Sydboarisch warad zan Beispij dia Lautvaschiawing vo ck za ckch oder an storch betonten ch-Laut (wia an Tiaroierrischen). Da Dialekt houd auffejige Nasoilaut, dia speziej a'da Gegand vam Tiaroier Unterlond, Pinz- und Pongau virkemmand. Weiders foid aa dia Vaniadlichungsform mid ai auf, wia z. Bsp.: Katzai, a bissai, a Schweindai, a Nudai/Nidai usw.

Heidige Situazion

Ma ko soung, dass da Dialekt im Begrijff is, se z'wondln, und durch'n storchn Zuazug va Leit aus onnerne Regionan va Esterreich oiwei a Poisai mer vam Donauboarischen beeiflusst werscht, speziej aus da Stoud Soizburg. Am sterchsten foid des an Eizugsgebit va dia zwee Kloasteed Seiger Hons und Behofen, sowia dia zwee beriamten Kurerschter Hofgoschtoa und Goschtoa auf, wo d'Kinder scho decht merklich onnerscht reen, wia zan Beispij no dia ejderne Genarazion. Vo Genarazion za Genarazion werscht da Dialekt oiwei ywerregionoier. Dia ejderne Genarazion vawendt no Ausdryck, dia d' jyngerne zwour an Groossen und Gonzen vasteet, zan Groosstoae ower neammer bnytzt. Weiders bemerkt ma aa dia deitliche Oschweching vam ckch za ck oder efters amoi sogour scho gg, sowia'm chch za ch, Wegfoi va diversen Nasoi-Diftongan und Nasoi-Lauten, sowia dia Vawending va da Vaniadlichungsform mid erl anstoutt ai, wia z. Bsp.: Katzerl, a bisserl, a Schweinderl, a Nuderl. A weiderschts Fenomeen is aa, das d'Leit, dia auf an Bauernhof aufgwouxen sand, no deitlich mer Pongaurisch reend, wia d'Leit va zan Bsp. ner Orweiterfamilie.

In d'kloanan Gmoaner is da Dialekt nouch wia vur guad dahoiden z. Bsp. Goidegg oder Seiger Veit eemso wia ad Seitentoier wia zan Bsp. im Groossourltoi oder Kloaourltoi. Seiger Honsner und Behofner homd midunter scho Schwirigkeiten, dia Leit va d'Seitentoier zan vastee - wonn dia ouft amoi speziej pongaurische Ausdryck vawenden.

Dialektenderrungen

Da urtymliche Dialekt kennt wias urtymliche Owerboarische koane Laut ü und ö; zan Beispij is a houchdeitschs el im urtymlichen Dialekt nid a Ostmittlboarischs öi, sundern wia z'Owerboarn a ej wia z. Bsp. in:

• Gejd oder aa Gejt anstott Göid
• schnej anstott schnöi
• hejffm anstott höiffm

Dia hochdeitsche Endsijm -iel dascheint nid wia im Ostmittlboarischen ois üi, sundern wia an benouchbarten Pinzgau sowiam Berchtsgouner Lond ois ij wia z. Bsp.:

• vij anstott vüi
• Hijfe anstott Hüife
• spijn anstott spüin

's ö werscht wia in Owerboarn za e wia z. Bsp.:

• Esterreich anstott Österreich an Ywerregionoin Dialekt
• efter anstott öfter

Bei da jingern Genarazion sand dia Formen ower schiager kaam no oozdreffm. Im Groossourltoi, wo da Dialekt no recht urtymlich is, sand dia Varianten aa am Ryckzug.

Untertoaling

A Reedner va an onnern boarischen Dialekt ko nid ausmochen va wo da im pongauer Dialekt reederschte her is. Leit de'n Dialekt bhearschnd, kennan genauerrer unterschein, va wous fyram Orscht dia entsprecherschte Person her is, weil se da Dialekt bereits va Orscht za Orscht leicht unterscheidt. Zan Beispij a Groossouler ko mid Sicherheit soung, ob eppern aus Seiger Hons kimmb oder nid. Groossouler reends ck bzw. as ch seer hourscht aus. Naasoilautt wia zan Bsp.: an Worscht Gmoâ wernd nasalirschter ausgsprochen wia sejg in Seiger Hons oder Behofen da Foi is (doudan dendirschts merer zan a hi). Schwourschzoch an Pongau gherscht aa ehernter zan modaraaten Dialektgebit dazua, wernd ma netter zwoa km weider, in Seinig Veit, bereits scho wiader an urtymlichern Dialekt reedt. In dia Gmoaner Werfen und Pfourwerfen, dia boade an Soizachtoi lingand, za da Grenz zan Tennengau hi, werscht ehernter urtymlicher greedt.

Weiders ko si da Dialekt in Seiger Hons bzw. Behofen sejm recht unterschein. Leit ad Orschtstoae reen moastens no urtymlicher wia dia an Orscht sejm.

As Ennspongaurische stejd eemfois a Untergruppm vam Pongaurischen dour, obwoi Reedner vam Soizachpongaurischen sejg mittlerrerweile nid genau unterschein kinnand obs a Ennspongauer oder a Soizachpongauer is. In da Reegl reend dia Ennspongauer ower no urtymlicher wia d'Soizachpongauer.

Beispije

Beispijwerschter

(in Boarischer Umschrift gschrijm)

Pongaurisch	Soizburgarisch (Stoud)	Hochdaitsch
nid	ned/nèd	nicht
zààch	miasèèlig/zààch	mühselig, zäh
Làssing/Frialing/Friajou	Frühling
Hêêrèst/Hîîrèst	Herbst	Herbst
Roâ	Òbhãng	Abhang
òichebloackd	òwègschmissn	hinuntergefallen
mòugst a Fotzn/Dèètschn	mògst a Wààtschn/ânè ãdrààd	willst du eine Ohrfeige
Naidài/Naidàl	Bussàl/Bussl	Küsschen
tênck/dênk	links	links
òuft hòusd a Pèèch	nòcha hòsd a Pèèch	danach hat man eben Pech
Àmpa	Küwè	Eimer/Kübel
Mijchbuutschn	Müüchkãnn	Milchkanne
Bichè	Hügl/Hügè	Hügel, Bühel
èppas/èpps	èbbs/wòs	etwas
ênk	aich/èng	euch
znààgst amòi	bòid amòi	bald einmal
Zwòugstèitz	Wòschschüssl	Waschschüssel
leeb lòub	zimle schlècht	ziemlich schlecht
Grànckn Sòissn	Bràislbeamamèlààd	Preiselbeermarmelade
Grànckn/Gràntn	Bràislbean	Preiselbeeren
sèig wûûscht woi's Irgèst saî	des wààrad schô des Eagstè	Das wäre wohl ganz schön schlimm
kleckhêêscht	stââhoat	steinhart
Droatsau		ein mit Getreide gefüttertes Schwein
Lââ	Lawin	Lawine
drai/droi	drài	drei
schiaga	fòst/schiaga/schia	fast/schier
drêntn	drüm/drüman/drênt	drüben
aizài	bissàl	bisschen, bissel
schaickig	liab/nètt	nett
bòutschiarigs Triichài	liabs Diandl/Mààdl	hübsches Mädel
gutt	klàss/toll/super/gwàndt	klasse/toll
zwêê(n)/zwoa/zwoo (gschlechtsouhengig m/s/w)	zwàà/ (Oid-Stodingarisch) zwoa	zwei
Diiwan	Couch/Diwan/Sofa/Sof	Couch/Sofa
fêêscht/vurigs Jòu	vorigs/vurigs Joa	vergangenes/voriges Jahr
oûgetzt	ò(b)grutscht	abgerutscht
Kliabhàcke	glââne Hòggn	kleine Hacke
Jàncka	Jànka/Jàggn	Jacke
Gstroû	Widda	Widder
Mànggài/Mànggàl	Muamèdia/Mànggal	Murmeltier
ôôhawig	ãhenglich/ãhawig	anhänglich/aufdringlich
Houdan	Hòòdan/Fètzn	Fetzen/Putztuch
iawand/iawènds	òb und zua	ab und zu
gààch	gààch/schnöö	schnell
Gràxn	Gràxn	altes Auto/Korb
Zècka	Koab	Korb
Klèètzn/Klòòtzn	Glètzn	gedörrte Birnen
Ziweem/Zibeem	Zwètschgn	Zwetschke
Bêêhaiga wtl.: "Beerenheiger"	Ègòist	Egoist
hoia/haia	hàia	heuer/dieses Jahr
schwòuschz	schwoaz	schwarz
greâ	greâ/grün	grün
bloohàppat	bloossfiassig/bòafiassig	barfüßig
ààschlings	oaschlings/rügglings	rücklinks
goodln	nòchèdösn	dösen/nachnickern
bleâgetzn	jàmman	jammern
ninascht	niangs	nirgends

Beispijseetz

Typische Beispijseetz sand no: (in Boarischer Umschrift gschrijm)

• Pongaurisch: Doscht amòi an Hîrèst hòuds an Lodan fâ da Gmoâ òichebloackt iwas Roâ.

• Modaraats Pongaurisch: Nailich im Heabsd hòds an Lodan fô da Gmoâ òwebloackt iwas Roâ.

• Stodingerrisch: Nailich im Herbst hòds'n Loda fô da Gmoâ òwègschmissn üwan Hügè.

• Hochdeitsch: Neulich im Herbst ist der gut gebaute Gemeindearbeiter gestürzt und den Abhang hinuntergerollt.

• Pongaurisch: Ah sèig greânè Schaickai gfòischd ma guad, sèig mechad i hòum.

• Modaraats Pongaurisch: Maî des greâne Schaickal gfòid ma guad, des mechad i hòm.

• Stodingerrisch: Maî de grüne/greâne Westn is voi liab/gwàndt, de mechad i hòm.

• Hochdeitsch: Diese grüne Weste finde ich sehr schön, ich würde die gerne haben wollen.

• Pongaurisch: Hoia an Winta is ôafòucht iwahàpps koâ Schnèè zan Schijfòun dòu gween, fêscht hòuds gnuag gèèm.

• Modaraats Pongaurisch: Haia im Winta is oâfoch iwahaupt koâ Schnèè zum Schijfoan dò gween, furigs Joa/Jòò hòds gnuag gèèm.

• Stodingerrisch: Haia im Winta is nèd wiaklich a Schnèè dò zum Schifoan, vurigs Joa hòds gnuag gèèm.

• Hochdeitsch: In diesem Jahr im Winter hat es kaum Schnee gegeben zum Schifahren, letztes Jahr war genug da.

Schau aa unter

Schau aa unter: Portoi Pongau • Portoi Boarische Sprouch

• Artike auf Sydmittlboarisch gschrijm
• Sydboarisch
• Boarische Sprouch