Art of Fighting

Aus Wikipedia

Wei as Fatal Fury an guad'n Absatz g'fundn hatte, hod SNK (da Heastella vo dem Spui) glei nochg'legt und füa sei Neog Geo-Konsoin glei no a Beat 'em Up, as Art of Fighting, aufan Moakt brocht. Und weis grod ned so vui Ideen barat g'hobt hom, homs desmoi ganz massiv vo Capcom ab'kupfad. Sa Spielprinzip is oba nadialich as gleiche blie'm: Hau zwoa Rund'n lang mit Standard und Spezialmoves drauf, bis am Gegna sei Kauleist'n se üba'n Blotz vateiln duad. Bei Art of Fighting ko ma im Storymode bloß zwischen am Sagazaki Ryo und am Gaarcia Robert auswöin.

De Gschicht[Werkeln | Am Gwëntext werkeln]

Da Sindikatsboss Mr. Big hod se aus eina Laune raus dazua entschloss'n, am Ryo sei Schwesta zum kidnapp'n. Wos eam des jetz' bringt, sei dahingstöit; auf jeh'n foi loss'n da Ryo und sei Spezi und Bruada, da Robert, a sowas ned auf se sitz'n. Und deshoibatweng mengs am Big jetzad a boa vaplett'n, dass eam Hean und Seng vageht. So kämpf'n de zwoa se fortan duach eanane Heimadstod South Town, um divease finstane Gstoitn üba den Vableib vo dem Madl auszumquetschen. Am Ende vo dera Queste woat'n dann no die Entführa söibst, da Mr. Big und da Mr. Karate, auf a boa saftige Backpfeif'n.

De, wo was teilnehma[Werkeln | Am Gwëntext werkeln]

De Kämpfa[Werkeln | Am Gwëntext werkeln]

De Aufzählung beziagt se jetz' bloß auf'an easchtn Teil vo dera Serien.

Da Sagazaki Ryo[Werkeln | Am Gwëntext werkeln]

A recht dreister Mischmasch aus am Ryu und am Ken vo Street Fighter. Söibst de Moves san fast identisch. An Fireball, an Uppercut und an Flugtritt kon dea Karatekämpfa macha. Grod ois wia de zwoa Street Fighter. Auf jeh'n Foi is da Ryo auf da Suach' nach seina Schwesta, de eam da Mr. Big entfüaht hod.

Da Garcia Robert[Werkeln | Am Gwëntext werkeln]

Da Robert is da Adoptivbruada vom Ryo und sei besta Spezl. Glare Sach, dass ea am Ryo a zua Seit'n steht, wenns drum geht, sei Schwesta zum befrei'n. Zumal, wei de sei Gschpusi is. Da Robert is ne'mbei gsagt a recht a Weiberhöd und stinkreich, wei a vo seine leiblich'n Öitan a riesigs Vameng g'eabt hod.

D' King[Werkeln | Am Gwëntext werkeln]

Hoaß'n duads zwoa "King" und ausschaung duads a fast wiera Mo, aba in Wiaglichkeit is' de King a Madl. Spätastens, wennst dera Thay-Boxerin aber a boa einihaust und ihr as Hemad zreißt, meakst und siegst, dass a Deandl is'.

Da Mickey[Werkeln | Am Gwëntext werkeln]

Da obligatorische Boxer, wiera hoid in fast jeh'm Beat'em Up-Spui woi heageh muas. Da Amarikana Mickey is alladings oana vo de langweiligst'n vo dera Zunft.

Da Jack[Werkeln | Am Gwëntext werkeln]

Dea is a gwampats Rockaviech mit speckige Hoa, dea se, wenna ned grod Billard spuit oda a Bia safft, mit Voaliebe a weng mid ondane Mitmensch'n kloppt.

Da John[Werkeln | Am Gwëntext werkeln]

Ois Soldat is no koana reich woan. A da John, dea bei da amarikanisch'n Luftwaffn oabat, ned. Und wei a hoid spar'n muaß, tritt a woi a voam ausrangiert'n Hintagrund vom Guile William (Street Fighter II) o. Und a ansunst'n scheint dea sei eakläats Idol zum sei. Outfit und Special Moves hod a se nämlich, wora grod dabei woa, a glei bei am Guile abschaut.

Da Lee[Werkeln | Am Gwëntext werkeln]

A Mask'n hod a auf, a Metallklau' am Oam. Na, kummt eich des bekannt voa? Und ja, da Lee hod se woi wiaglich a weng stark vom Vega (Street Fighter II) inspiriean loss'n.

Da Todo[Werkeln | Am Gwëntext werkeln]

Da Todo is a japanischa Samurai. Do hodas nadialich schwea, weia im Faustkampf auf sei Schneideeisen (Katana) hoild vazicht'n muaß. Mochd aba nixn, wei da Todo hod a no a boa andane Dricks auf Loga.

De Endbosse[Werkeln | Am Gwëntext werkeln]

Da Mr. Big[Werkeln | Am Gwëntext werkeln]

Wias a so Brauch und Sitt' is bei de Endboss, is a da Big a Drogendandler und Kartellboss, dea (warum genau, weiß da Deifi) am Sagazaki Ryo sei Schwesta entfiaht hod. Villeicht woa eam a Boadstoaschwoibm z'teia? Mia weans woi nia eafoahn. Auf jeh'n Foi hod a jetz' a Broblem, wei jetz' san da Ryo und da Robert scho a weng saua af eam.

Da Mr. Karate[Werkeln | Am Gwëntext werkeln]

Da Mr. Karate is da überraschend auftauchende, finale Endboss. Ausschaung duad a exakt ois wia da Ryo, bloß dassa a saublede Maskn im Gsicht drogt, de wos wohl an Oni (japanischa Dämon) mit ana Pinocchio-Nos'n doastöin soi. Wenndst'n bsiegst host, woat alladings a Übaraschung auf di, wea se do hinta dera Hoizmask'n vastecka duad.

Special Moves[Werkeln | Am Gwëntext werkeln]

Andas ois in ondane Beat 'em Ups braucha de Special-Attack'n beim Art of Fighting a Enagie, de da unta deina Lehmsleist'n ozoagt wead. Is de Enagieleist'n aschöpft, muasd as eascht wieda aufloh'n, dos'd wieda auf deine Special Moves z'ruckgreifa kannst. Nadialich hod a jeda Kämpfa seine ganz eing'nen Moves, de wie g'hobt mid ana Tast'nkombination ausglest wean kenna.

Bonus Games und Super Specials[Werkeln | Am Gwëntext werkeln]

Alle boa Kämpf' deafst im Storymode a Bonusspui absoivian, mit dems'd deine Fähigkeit'n ausbau'n konnst. Da soits'd Flaschen an Hois obahau'n, ohne das umfoin, oda a Schlogpoista mim "Superfireball" wegbrenna. Wennst des schaffst, valengan se wahlweis deine Lehms- und Enagieleistn oda du ealeanst an nützlich'n Super Move.