Barriada

Aus Wikipedia
Wexln zua: Navigation, Suach

Mid Barriadas wean de bsondas in Rondlong vo de groußn Städt in Peru liengdn Oarmenviadl bezeichnt. Es hondlt si um informeje Siedlunga oda Slums, bei dena de Bewohna ned iwa legoin Grundbsitz vafing. Ähnliche Viadl in Brasilien wean Favelas gnennt.

Si bstehn im Wesntlichn aus ana Osommlung vo kloana Hittn, de znächst aus Hoizobfäij, Stoff und Schrott baut wean, meist on Steijhäng oda ondan schwaara z bsiedlndn Flächn. In spodan Ausbaustuafn entstenga donn richtige kloane Haisa aus Stoana, de im Laff vo de Joare oft aa vaputzt und gstrichn wean.

In Peru gibts meah ois 800 Barriadas, de heit euphemistisch Junge Siedlung (Pueblos Jovenes) gnennt wean. Meah ois zwoa Milliona Menschn lem in Lima in soichn Gebieten.

Kontroverse[VE | Weakln]

Weahnd oanige Regiarunga Barriadas ausschliaßli ois duach Umsiedlung afzlesnde Problemzona seng, bschäftign si in de letztn Joar oanige Architektn duachaus positiv interessiat midm Phänomen vo de Eingbauhaisa. eijdane Barriadas vafuing tatsächli iwa a gwisse Infrastruktua mid Stromvasoagung, Trink- und Obwossaleitunga.

Da britische Architekt John Turner hod de beriahmtn Barriadas vo Lima sogoa ois „geoadnete, gut funktioniarnde, sejbstvawoite Siedlunga vo Leit, de ned nua gnau wissn, wos si baun woitn, sondan aa wia“.

In da Tot zoagt de statistische Afoabatung vom Zensus vo 1972 fia Peru (unvaeffntlichte Stootsexamensoarbat vo Franz-Josef Knur, Justus-Liebig-Universitet Gießen, 1975), doss de Barriadas vo drei exemplarischn Städt: (Lima/Callao, Arequipa und Chimbote), vuifoch afstrebnde rondstädtische Viadl wean („barriadas de esperenza“). Beginstigt wead de positive Entwicklung noch dera Untasuachung duachn selektivn Karakta vo da Binnenwondarung, de zu ana Konzentration menschlicha Ressourcn in de Barriadas fiaht. Begleit wead diese rondstädtische Entwicklung duachn Vafoi vo de innastädtischn „tugurios“ (aa: „barriadas de miseria“) undm massivn Brain-drain im ländlichn Bereich. Alphabetisiarung und Bschäftigungsquote lieng demzfoige in de Barriadas vuifoch weit iwam Landesduachschnitt.

As Eagebnis san in da Regl de sozioe und ökonomische Konsolidiarung vo de Barriadas, dea in fost oin Fäjn aa de politische und administrative Oeakennung ois „Pueblos Jovenes“, vabundn mid da Eihbindung in de städtische Infrastruktua.