Boarische Grammatik (Konjunktiona)

Aus Wikipedia
Zur Navigation springen Zur Suche springen
Der Artikl is im Dialekt Westlichs Nordboarisch gschrim worn.
Disambig-dark.svg Der Artikl dou ghejert zo da Artiklsommlung iwa d Grammatik vo da Boarischn Sprouch.
A iwasicht iwa olle Artikl zon Thema findts in Boarische Grammatik.

Konjunktiona (vo lateinisch: coniunctio, des hoisst Vabindung) vabindn Sozsticker und Setz mitanond.

De eftaste Konjunktion in Boarischn is das, des wird je noun Dialekt mit aran hölln oder dunkln, mit aran longa oder kurzn a gsprocha. Es das vadaitlicht, das a Soz unter an ondern untergordnat is, dou kos alloans stej oder zommat mit ondere Konjunktiona. Bol a Pronomen hintern das stejt, vabindsase gern mit dean. A por Baispül:

  • I denk, das des stimmt.
  • Er moant, das'a des ko.
  • I mecht wissn, wej long dassd nu brauchst.
  • I wois niat, warum das des su long dauert.
  • Trotzdean das'es moch, hairon tou'es niat.

Mit de unbetontn Personalpronomen kinnase newan das aa ondere Konjunktion vabindn. De betontn Pronomen vabindnse niat mit de Konjunktiona:

alloans, betont vabundn, unbetont Baispül, unbetont Baispül, betont
i -e das'e red, wal'e gej, bol'e schau Er wüll, das i redt.
du -st dasst redst, walst gejst, bolst schaust Er wüll, dasst Du redst. (es 'st ko niat weggafolln)
er -a das'a redt, wal'a gejt, bol'a schaut Er wüll, das er redt.
si -s dass redt, wals gejt, bols schaut Er wüll, das si redt.
es -s dass redt, wals gejt, bols schaut Er wüll, das es redt.
mir -ma das'ma ren, wal'ma genga, bol'ma schaua Er wüll, das mir ren. Er wüll, das'ma mir ren.
ees -s, -ts dass/das'ts redts, wals/wal'ts gejts, bols/bol'ts schauts Er wüll, dass ees redts. (es 's/ts ko niat weggafolln)
si -s dass ren, wals genga, bols genga Er wüll, das si ren.

Stot ees (a boarischs Kennwort) wird haintzatoch in niat-traditionölle Dialekt aa ihr (asn Standarddeitschn) gnumma. In Nordboarischn hoissts je nouch da Gechad aa: enk, enks, äts, deets, diits, diats. D Endung hoisst ower iwaol -s (a vakirzts ees) oder -ts (d Verbkonjunktionsendung + -s).

In Boarischn stejt hinter etle Konjunktiona oft das, in Standarddeitschn dageng stengas alloans oder min Infinitiv. Baispül han:

Standarddeitsch Boarisch
obwohl trotzdem das, zamtdem das, NB aa: trotzdean das, zantdean das
bevor vor (das), ee das, NB aa: ej das
seit, seitdem sait das, saitdem das, NB aa: saitdean das
damit damit (das)
nachdem nochdem das, NB aa: nouchdean das
kaum kam das, NB aa: kamats das
statt (... zu) stot das
ohne (... zu) one das

In Boarischn wern etle Konjunktiona mit da(r)- und wo(r)- aftolt. Des han ainggle Adverbien, dej wou ols Konjunktiona braucht wern. Des is glaich wej ba de Adverbien, ner das hinter deane koa das niat stejt. Baispül han:

Standarddeitsch Boarisch Baispülssetz
dafür dass fir des das Fir des das'a su olt is, is'a nu guat banond.
dadurch dass durch des das Durch des das'a suvül arwat, vadejnt'a an Haffa Göld.
wovon vo wos das I wois niat, vo wos dassd redst. (D Frouch war: Vo wos redst Du?)
wozu zo wos das I wois niat, zo wos dassd des brauchst. (D Frouch war: Zo wos brauchst des?)

A por waitere boarische Konjunktiona mit Unterschid zon Standarddeitschn han:

Standarddeitsch Boarisch Baispülssetz
weil, da, denn wal I ho koan Hunger, wal i schou wos gessn ho., I ho koan Hunger, wal i ho schou wos gessn. (in zwoatn Fol is d Sozstöllung wej ban Standarddeitschn denn)
wenn, falls, sobald wonn, wenn, bol Wenns rengt, blaiw'e dahoam. Bol'e hoamkumm, lech'e'me ins Bett. (bol stejt urspringle fir d Zait, olso temporal, des ko ower aa wej wonn, wenn konditional braucht wern)
dann no, NB: nou Wenns rengt, nou blaiw'e dahoam. Bol'e hoamkumm, nou lech'e'me ins Bett.
als, wie wia, NB: wej Wejs firte gwen han, hans hoamgonga.
als ob (as) wia wonn, NB: (as) wej wenn Der quakatzt, wej wenn'a a Frusch war.

Gem touts nu mejerer Konjunktiona.

Schau ar af[VE | Weakln]

Quölln und Literatua[VE | Weakln]

  • Ludwig Zehetner: Bairisches Deutsch, Heinrich Hugendubel Verlag/edition vulpes, Kreuzlingen/Minga/Regensburg, 2005, ISBN 3980702871
  • Ludwig Zehetner: Das bairische Dialektbuch, Verlag C.H.Beck, Minga, 1985, ISBN 3406305628
  • Ludwig Merkle: Bairische Grammatik. Buch & Media, Minga 2004, ISBN 3865200788.