Boarische Grammatik (Präpositiona)

Aus Wikipedia
Zur Navigation springen Zur Suche springen
Der Artikl is im Dialekt Westlichs Nordboarisch gschrim worn.
Disambig-dark.svg Der Artikl dou ghejert zo da Artiklsommlung iwa d Grammatik vo da Boarischn Sprouch.
A iwasicht iwa olle Artikl zon Thema findts in Boarische Grammatik.

Präpositiona (vo lateinisch: praepositio, des hoisst es Vorostölln, es Vorogstöllte) stölln a Vahöltnis zwischa Lait, Sochan oder Sochvoolt her, drum hoissns in da deitschn Grammatik aa Vahöltniswerter. Präpositiona kinnase af an Ort, a Zait, oder wos onders bezejng.

Da Ort[VE | Weakln]

A Präposition, wou af an Ort hiwaist, is a lokale Präposition. Dou ko'ma froung:

  • Wou kummt wos/wer her?
    • as, bo, bis vo, vo, vo ... o min Dativ
    • Baispül: I hul mai Gwond asn Kloiderkostn. I kumm bo da Tir aina. Des Packl kummt bis vo Sidtirol. I kumm vo Rengschburch. Vo Londshout o bin'e schnöller gforn.
  • Wou is wos/wer?
    • o/on, af, am (= afm), bo, entlong, gecha/geng, hinter, in, newa/nem, iwa, owa, unter, vor/fir, z, zwischa min Dativ; drasserhol, drenterhol, driwahol, drinnerhol, drowahol, drunterhol (dej olle aa mit her- vorn), hinterhol, vorderhol, gengiwa, wisawi (=vis-a-vis) mit Dativ oder vo; um min Akkusativ
    • Baispül: Es Büldl hengt o da Wend. Da Mo hockt af aran Gal. Es Essn stejt am Tisch. I pock d Kou bo de Herner. Da Nochbar owa mir is z laut. A guats Zoiglbejer homs z Eschawo. D Quölln is drowahol von Boch. Es Derfl drenterhol da Doana.
  • Wou gejt wos/wer hi?
    • o/on, af, am (= afn), bo, bis, bis af, durch, gecha/geng, hinter, in, iwa, newa/nem, nouch, unter, vor/fir, zwischa min Akkusativ; bo, zo min Dativ
    • Baispül: I henk a Büldl o d Wend. I for af Minga. I staich am Turm affe. I schau bon Fenster asse. In Summer for'ma bis af Spanien. I hock'me zo de Gest hi.

D Zait[VE | Weakln]

A Präposition, wou af a Zait hiwaist, is a temporale Präposition.

  • a Zaitpunkt:
    • bo, nouch, vo, vor, zo, zwischa min Dativ; bis, gecha/geng min Akkusativ
    • Baispül: Vor da Arwat trink'e koa Bejer niat, owa nouch da Arwat gunn'a'mar a Flaschl. D Zait zwischa Oustern und Pfingstn. I arwat vo Monta bis Fraita.
  • a Zaitdauer:
    • bo, in, seit min Dativ; af, durch, fir, iwa min Akkusativ; asserhol, innerhol mit vo
    • Baispül: I ho 'seit haint frej nix gessn. Es Boarische houtse iwa d Jourhundert vaendert.
  • a Zaitobschnit:
    • a Urzait: um Ochte (= genau um Ochte), umara Ochte (= a weng ejerer oder spejter wej Ochte), fimf af/vor Ochte, fimf iwa/nouch Ochte
    • a Monat oder a Zait von Jouer: in/im Jenna, Feba usw., in/im Summer, Winter usw.
    • a Toch oder a Zait von Toch: on/om Monta, Irta usw., om Oumd, af d Nocht, bon Toch, bo da Nocht, z mittogs, oumds, nochts
    • a Festtoch: z Wainochtn, Oustern usw., af Wainochtn, Oustern usw.

Da Grund[VE | Weakln]

A Präposition, wou af an Grund in waitern Sinn hiwaist, is a kausale Präposition.

  • as, bo, donk, durch, fir, mit, nouch, trotz, iwa, um, unter, vo, vor, wecha/weng/zwengs, zo

D Oart und Wais[VE | Weakln]

A Präposition, wou af a Oart und Wais hiwaist, is a modale Präposition.

  • af, as, asser, bo, bis, on, bis af, bis zo, entgeng, fir, gecha/geng, gengiwa, in, mit, mitsomt, one, stot, unter, vo, zo

Präpositiona und Föll[VE | Weakln]

Oa han min Dativ vabundn, oa min Akkusativ, oa min Dativ (nou stengas fir an Ort) oder en Akkusativ (nou stengas fir a Richtung, a Zül), oa mit an vo + Dativ. En Genitiv gits bo Präpositiona niat, dou stejt tolwais da Dativ und tolwais a vo + Dativ, an Asnoum han ner d Pronomen mainer, dainer, seiner, baispülswais hinter mainer, dou wead owa haintzatoch mejerer da Dativ verwendt: hinter mir.

Präpositiona und Artikl[VE | Weakln]

In Boarischn wern d Artikl gern mit de Präpositiona vabundn. Da bstimmte Artikl in Dativ deam wead zo -m, des wead in traditionelln Boarisch gern zo dean und -n vaschliffa. Baispülmasse: om/on, bom/bon, im/in, vom/von, zom/zon, hinterm/hintern, newam/newan. Da bstimmte Artikl in Akkusativ dean wead zo -n, des wead zo -s. Baispülmasse: inn, ins, hintern, hinters. Da unbstimmte Artikel kose aa valengern und in Dativ aa zo ran -n vaschlaiffa nouch ara Präposition. Baispülsmasse: af an/am/aran/aram Berch, af a/ara/ana Stonga.

Mejerer zo de oanzlna Forma vo de bstimmtn und unbstimmtn Artikl findts in Boarische Grammatik (Substantive).

Präpositiona und Pronominaladverbien[VE | Weakln]

In Boarischn wern Präpositiona wenger mit da-/dr- zo Pronominaladverbien vabundn, baispülswais: Fir des kon'e nix. Af des lou'e'me niat a.. Song ko'ma aa: Dou kon'e nix dafir. Dou draf lou'e'me niat a. (olso mit an extra dou). Niat vawechsln derf'ma dej mit Werter, dej wou fest zommaghejern und wos onders bedeitn, wej dabai, davu, dazou (da- + de betonte Form vo de Präpositiona): Da Vugl flejgt davu..

D Pronominaladverbien mit wo-/wor- kumma in Boarischn normalerwais aftrennt fir, baispülswais: Fir wos brauchst'n des? I wois niat, fir wos daß'e des brauch. iwa wos sinnierst'n ejtz? I denk nouch, iwa wos daß'ma dischkriern kanntn. A Rutschagal is a Hulzressal, wou de kloan Kinder draf rain kinna. oder: ..., af dean kinna de kloan Kinder rain.

Präpositiona und d Assprouch[VE | Weakln]

Dej Präpositiona, wou efters firkumma, wern assprechmasse gern vaschliffa, bsunders bài/bà/bo/bo, vau/vo/vũ, zou/zua hoissn oft in Nominativ bă/bŏ, vă/vŏ, ză/zŏ (z kummt von oltn ze, zou/zua/zŏ von oltn zuo) und in Dativ und Akkusativ băn/bŏn, văn/vŏn, zăn/zŏn, waiters on/au/o/oau, in bsunders vor de bstimmtn Artikl ă, ĕ: ă da Wend, ĕ da Kirch. De gnau gschrima Baispül zoing, daß es Boarische an Haffa Wortforma bo Präpositiona hout.

Schau ar af[VE | Weakln]

Quölln und Literatua[VE | Weakln]

  • Ludwig Zehetner: Bairisches Deutsch, Heinrich Hugendubel Verlag/edition vulpes, Kreuzlingen/Minga/Regensburg, 2005, ISBN 3980702871
  • Ludwig Zehetner: Das bairische Dialektbuch, Verlag C.H.Beck, Minga, 1985, ISBN 3406305628
  • Ludwig Merkle: Bairische Grammatik. Buch & Media, Minga 2004, ISBN 3865200788.