Boarische Schbråchinsln

Aus Wikipedia
Wexln zua: Navigation, Suach
Der Artikl is im Dialekt Hausrukfiatlarisch gschrim worn.

Boarische Schbråchinsln han Oatschåftn oda Regionen aussahåib fu Ésdaraich und Boarn, wo iagendwãn in da Gschicht Laid hî ausgwãndat san, dé an boarischn Dialekt grét hãm und doat hî midgnuma hãm, wo si si naich ãgsidlt hãm. Déswéng hãm si in faschidane Regionen Variantn fum Boarischn ghåidn, dé ma in Ésdaraich oda Boarn haid goa neama aso rét. Bai mãnche Schbråchinsln, dé eascht in jingana Zaid entschdãndn han, woas ma zimli genau wias dazua kema is und wås dés fia Laid woan, dé då wéka han und fu wo dé hea kema san und wås dé fian Dialekt midgnuma hãm. Es gibt åwa a boarische Schbråchinsln, zan Baischbü in Noaditalien, dé san so åid, das ma goa ned genau sång kã, wia und wãn de entschdãndn san.

De faschidanen Dialekt und Schbråchvariantn in de boarischn Schbråchinsln han natiali a fia de Foaschung recht intressant und aigentli håd ma eascht duach de Schbråchinslfoaschung d'Gschicht fu de boarischn Dialekt so richdig aussa findn und rekonsdruian kina. Duach s'Entschdê fu etnisch definiade Nazionalschdåtn im 19tn Joahundat und de schlimen Griag im 20sdn Joahundat han åwa fü fu de kloan Schbråchinsln schwa in Nod kema und mãnche han a komplet faschwundn. De wiatschåftliche Entwiklung und s'Åbwãndan fu junge Laid in gressane Schdet oda sogoa gãns ausn Lãnd aussi, hãm waida dazua baidrång, dass dé åidn boarischn Dialekt im Auslãnd nu mea wéniga woan han. Ãndanasaits han im 20dn Joahundat a naiche boarische Schbråchinsln entschdãndn, foa oim in Sidamearika und in Airopa håd si da Konflikt zwischn de Nazionalschdåtn nåchn zwoatn Wödgriag und foa oim a duach de EU wida so waid beruigt, das haid de klõan Regionalschbråchn sogoa wida gföadat wean und es gibt a Programe, das mas naich belebt.

Kronoligische Listn[VE | Weakln]

D'boarischn Schbråchinsln in Noaditalien, Oatsnãman auf Zimbrisch
  • d'Zimban in de 7 Gmõana im 11dn und 12dn Joahundat
  • d'Zimban in de 13 Gmõana im 11dn und 12dn Joahundat
  • d'Tischlbonga im 13dn Joahundat
  • d'Bemawaidla, dé si im 13dn Joahundat doat ãgsidlt hãm*
  • d'boarisch-ésdaraichischn Auswãndara nåch Sidbemen und Mean (Budweis, Iglau, Brünn, Olmütz)*
  • d'Gottschea, dé im 13dn und 14dn Joahundat ins haidige Slowénien kema san (schau aa: Göttscheabarisch)
  • d'Hutara und ãndane Anabaptistn, de im 16dn Joahundat fadrim woan san
  • d'Landla, dé wéng eanam Glaum im 18dn Joahundat fadrim woan san
  • d'Samnauna, a ehemåligs retoromanischs Doaf in da Schwaiz, wås im 18dn und 19dn Joahundat s'Diarolarisch ois Schbråch iwanuma håd
  • d'Zipsa in Rumenien, dé wo fu owaésdaraichische und boarische Auswãndara åschdãman, dé zeascht in de Zips in daheitingSlowakai und schbéda in de rumenische Region Maramuresch zong san.
  • d'transkarpatischn Deafa in da Ukraine, wo im 19dn Joahundat Laid aus Niadaboarn und im Såizkãmaguad ois Hoizoawata hîzong san
  • d'Owapföza Auswåndara nåch Nianbeag in da Zaid fu da Industrialisiarung
  • t'Diaroladeafa in Sidamearika dé im 19dn und 20dn Joahundat entschdãndn san

(*) bai de ehemålign Schbråchinsln in da Tschechischn Republik iss wichdig zan wissn, das blos de Laid im Bemawåid und an da Grenz zu Owa- und Nidaésdaraich, so wia in a boa Gégendn in Mean, an boarischn Dialekt grét hãm. De Sudetndaidschn im Noadn und de Schlésia hãm ned Boarisch grét.

Definizion wås a "boarische" Schbråchinsl is[VE | Weakln]

D'Wåssadåibã in de rumenischn Karpatn, wo im 19dn Joahundat dé Zipsa ois gfrågte Hoizknecht hîkema san

Fia de Schbråchinsln in Italien, Slowenien, daheitingTschechai, da Slowakai, Rumenien und so waida, håd si lãng neamt bsondas intressiad, néd in Ésdaraich und ned in Daidschlãnd. Fü fu de Grupn hãm a mid da Zaid in Kontakt zu dahoam faloan und neta wãn wea zufelig auf da Roas in so a Géngd kema is, woas a Iwaråschung, das dé doat a Schbråch rén, dé ma mid a weng an Intaresse a faschdê kã. Eascht im schbådn 19dn Joahundat, wia da Daidschnazionalismus sâi easchde Hochzaid ghåbt håd, hãm si Geamanistn und Foikskundla fia de Schbråchinsln zan intressian ãgfãnga. In deara Zaid is åwa oft kõa Untaschiad gmåcht woan, za wöchana Dialektgrupn dé faschidanen Mindahaitn kean, sondan ma håd õafåch fu "daidsche" Schbråchinsln grét und dé Foischungseagébnis san a oft glai ideologisch und politisch ausgschlåcht woan. Mea dazua unta Schbråchinslfoaschung.

Haid is de Definizion fu ana "boarischn" Schbråchinsl relatif kloa und neama ideologisch sondan linguisdisch definiad. Wãn a Dialekt oda regionale Mindahaidnschbråch ois negsdn Fawãntn õan fu de boarischn Dialekt in Ésdaraich oda Boarn håd, egal ob dés jéz Keantnarisch is, oda Diarolarisch, Owaésdaraichisch, Niadaboarisch oda Owapfåizarisch, dãn güt de Schbråchinsl ois boarische. A guads Kriterium han a nu dé so genãnte boarische Kenweata, wia Pfoad fia Hemt, Pfingsdåg fia Donasdåg oda de Pronomen "és" und "énk" fia de zwoate Peason Plural. Wai dé gibts neta in de boarische Dialekt und sunst in kõana ãndan Dialektregion.

Mãnche Schbråchinsln san a so åid, dass aus ana Zaid schdãman, wo zischn Boarisch und Alemanisch nu kõa bsondana Untaschiad woa, wia zan Baischbü de Zimban in Noaditalien. Då kintad ma oiso dischgrian, wås dé genau san, obwoi a dé fum schbråchlichn Befund do eha zan Sidboarischn zan zön han, håid in saina olaödasdn Foam.

Ãndane Schbråchinsl-Grupm, wia zan Baischbü de Hutara in Amearika, schdãman fu Auswãndara å, dé néd neta aus'n Boarischn und Ésdaraichischn kema san und doalwais a Element fu ãndane Dialekt drin hãm. Grundsezli kã ma åwa schã sång, das de Hutara eha fu Laid aus Ésdaraich und Boarn åschdãman und ma dés a in eanara Schbråch head, und dé ãndan Widadaifa-Grupm (Anabaptistn) wia de Amish People und de Menonitn fu Laid aus Noaddaidschlãnd und Holãnd.

D'Boarischn Schbråchinsln haid[VE | Weakln]

d'ausgwãndatn Diarola in Brasilien han recht dradizionsbewust, obwoi a doat d'Schbråch zruk ged

Wãn ma ole Schbråchinsln zãm zöd, in dénan iagend a boarische Dialekt grét wiad, kimd ma insgesãmt drozdem néd auf bsondas fü Laid. Maisdns bschded a jéde fu de Grupn neta aus a boa Hundat bis a boa Dausnd Laid, fu denan de mearan zwoa- oda sogoa measchbråchig san und a nu de Hauptschbråch fu eanam Lãnd kinan. In mãnche Schbråchinsln iss åwa aso, das dé goa ned Hochdaidsch leanan und a ned kinan und wãns dãn Dialekt rén, dãn is dés a zimli uariga Dialekt, dea oft sogoa fia Laid aus Ésdaraich und Boarn, dé si néd bsondas damid befåsst hãm, schwa zan faschdê is.

Dé schbråchliche Gemainsãmkaid måcht natiali de Schbråchinsln fian Duarismus intressant und bsondas bai de Zimban in Noaditalien und bai de Diaroladeafa in Brasilien fasuachn dé Laid doat sogoa aus eana schbråchlichn Situation a Gscheft zan måcha und gfrain si iwa Laid aus Ésdaraich und Boarn, dé zu eana auf Bsuach keman. Dé boarischn Schbråchinsln in Ostairopa san im Géngsåz dazua bis haid nu recht wéng bekãnt und doat foad a fåst kõa Duarist hî. Déswéng han de Oatschöftn in Rumenien und nu mea in da Ukraine a wiatschåflti néd bsondas entwükit und es gibt oiwai nu a grosse Åbwãndarung fu junge Laid. Aus dẽm Grund wiad a doat da Dialekt oiwai wéniga und ma woas ned wia lãng a iwahaupt nu bschdê wiad. Bai de Hutara in de USA und Kanada iss aso, das dé aus religiese Gründ iwahaupt kõa wiatschåftliche Entwiklung woin. Dé blaim bai da Lãndwiatschåft und fasuachn goa ned, dass mid Duarismus Göd fadinan. Wãn åwa õazöne Laid aso auf Bsuach keman, dé si fia eana Oat fum Lém und eana Schbråch intressian, gfrain si si åwa a und ma wiad néd wéka gschikt.

A boa boarische Schbråchinsln, foa oim de Gotschea in Slowenien und a dé in Bemen und Mean, han haid schã komplet faschwundn und ma drift hegsdns nu a boa õazöne åide Laid, dé wo dé ehemålige Schbråch nu kinan. Da Grund fia dés Faschwindn woa doat foa oim da Zwoate Wödgriag und dé géngsaitige Untadrükung und Fadraibung, zeascht fu de Daidschn géng de Tschechn und Slowenen und nåchn Griag umgekead. Wea iwa dé doating Schbråchvariantn haid wås wissn wü, kã si aigentli neta nu aus Biacha infoamian und åide Tonaufnãmen ãhoacha.