Der Bulle von Tölz: Bullenkur

Aus Wikipedia
Zur Navigation springen Zur Suche springen
Der Artikl is im Dialekt Obaboarisch gschrim worn.
Foig der Serie Der Bulle von Tölz
OriginaltitlBullenkur
ProduktionslandDeitschland
OriginalsprochDeitsch/Boarisch
Läng95 Minutn
OitasfreigobFSK 12
EinordnungStaffel 7, Foig 1
32. Foig insgesamt
Easchdausstrohlung24. Oktoba 2001 auf Sat.1
Stab
RegieWerner Masten
DrahbuachRalph Werner
ProduktionErnst von Theumer junior
MusiKristian Schultze
KameraRainer Lauter
SchnittMichael Breining
Bsetzung
Episodnlistn

Bullenkur is a deitscha Feansehfuim van Werner Masten ausm Joar 2001 noch on Drahbuach van Ralph Werner. Es is de 32. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 24. Oktoba 2001 af Sat.1 ausgstroit worn.

Handlung[VE | Weakln]

Da Kommissar Benno Berghammer Kriagt on Oruaf vo sein ehemolign Schuikollegn Dr. Kurt Thaler, dea wo ois Diätoarzt in da Däiza Kurklinik orbat. Ea losst duachblicka, doss in da Klinik ebbs ned stimmt, wui oba ned am Telefon driba redn und mocht midm Berghammer a peasenlichs Treffa aus. Dazua kimmts oba ned, wei si da Oarzt bei on Vakeahsunfoi mid Foaraflucht darennt.

Da Kommissar fiacht, doss sei oida Schuikolleg on Vabrechn zun Opfa gfoin is, und losst si ois Kurpatient eiweisn; so ko ea vor Ort bessa recherchian. De Stootsanwäitin Dr. Zirner, de wo emfois grod zua Kur is, hod koa Freid ned, wei de Kommissarin Sabrina Lorenz Ualaub hod. Da Berghammer losst si oba ned drausbringa und findt aa glei a poar Vadächtige: An Dr. Thaler sei Witwe, de wo amoi a Gspusi midm Kurklinikchef Dr. Peter Maywald ghobd hod, kriagt duachn Tod vo iam Mo on Haffa Gejd vo da Lemsvasicharung, und da Dr. Maywald stejd si ois Betriaga außa, dea wo mid manipuliadn Obrechnungan de Kranknkassn bscheißt, untastitzt vo da kokainsichtign Earztin Dr. Irene Pfister.

Wia ra ondana ibagwichtiga Kurgost af amoi stiabt – da zwoate Foi innahoib vo a poar Wocha – und ea sejba vo seina Physiotherapeitin Simone Erhardt ausm Dampfbad bfreit wean muass, wei ebba de Tia vo draußt zuagspead hod, denkt si da Berghammer, doss ea s Moardmotiv vielleicht am foischn Ort suacht – eascht recht, wia ea vo da Frau Erhardt eafoart, doss nochm Todesfoi des Medikament, des wo an Stoffwechsl oreng soid, bei olle Patientn obgsetzt worn is, bloß bei eam ned, sondan goar de Dosis vadopplt worn is.

Wia da Kommissar siagt, doss de Simone Erhardt a Medikament fia Schwongare einimmt, frogt ea de Christine Thaler, obs van Vahäitnis zwischad iam Mo und da Simone Erhardt gwisst hod. De Witwe sogt, doss se’s eascht eafoarn hod, wias nochm Unfoi in de Sochan vo iam Mo on Briaf gfundn hod, in dem wo de Frau Erhardt vo eam valongt hod, doss ea sei Frau valosst. Und wonn ea ned mid seina Frau redt, donn wead se mid ia redn. Da Kommissar mecht den Briaf seng, oba de Thalerin hod eam ogebli vabrennt.

Da Benno Berghammer findt außa, doss de Dr. Pfister bei iara vorign Orbatsstej z Reichahoi on Kunstfehla gmocht hod und nur drum no Earztin is, wei da Dr. Maywald, dea wo aa dort ia Chef woar, sei Hond iba se ghoidn hod. Außadem kriagt ea on Streit zwischad da Dr. Pfister und on Mitorbata vo ara Pharmafiama mid. Wia si außastejd, entwicklt de grod a Schlankheitspille, de wo de Dr. Pfister illegal bei ahnungslose Patienten ausprobiad; midm Gejd, wo se fia des kriagt, finanziats ian Kokainkonsum. Se streit ois ob, oba da Berghammer sogt dageng, doss se afgrund vo de Todesfäi s Risiko kennt, und do häds eam af hoamtickische Weis mid da doppltn Dosis umbringa woin, oba duach sei Roßnatua häd ea’s ibalebt. De Dr. Pfister gibt ois Grund o, doss se im Eafoigsfoi a neis Lem häd ofonga kinna, se häd ned woin, doss ebba gschädigt wead.

Da Benno Berghammer ist dawei sicha, doss da Dr. Thaler ned steam hod miassn, wei ea iba de Lumparei vo de zwoa Dekta Bscheid gwisst hod. Ea suacht de Simone Erhardt af und wui no amoi iba ia Alibi redn. Aft springts ins Auto und foart fluchtoarti wegga. Da Kommissar dawischts af ara Eisnbohbruck und ko nua duach guads Zuaredn vahindan, doss se obehupft. Sie sogt, doss’s koa Obsicht ned woar, doss da Dr. Thaler umkimmt. Se is midm Auto neba eam heagfoarn, se woit de Soch midm Briaf wieda guad Mocha, weis ned wiakli mid seina Frau redn woit. Oba ea hod iara ned zuagheard, hod d’Händ van Lenka gnumma und wuid gestikuliat und is midm Radl vo da Seitn ons Auto tuscht. Donn hods nua no gheard, wia sei Kopf ons Auto knoid und untan Roafn grodn is. Wias wieda a weng kloara im Schädl woar, hods umdraht, oba do woar scho da Nodoarzt do.

Hintagrund[VE | Weakln]

Gfuimt worn is z Däiz und z Bernried am Starnberger See (Klinik Höhenried);[1] ois Schaublotz fia de „Pension Resi“ homs as Hollerhaus Irschnhausn heagnumma.

Kritik[VE | Weakln]

De Programmzeitschrift TV Spielfilm schreibt: „Krimi, Komik und Kalorien satt.“[2]

Im Netz[VE | Weakln]

Beleg[VE | Weakln]

  1. Bullenkur – derbullevontoelz.de
  2. Der Bulle von Tölz: Bullenkur – Filmkritik bei TV Spielfilm