Der Bulle von Tölz: Sioux City

Aus Wikipedia
Zur Navigation springen Zur Suche springen
Der Artikl is im Dialekt Obaboarisch gschrim worn.
Foig der Serie Der Bulle von Tölz
OriginaltitlSioux City
ProduktionslandDeitschland
OriginalsprochDeitsch/Boarisch
Läng90 Minutn
OitasfreigobFSK 12
EinordnungStaffel 6, Foig 3
31. Foig insgesamt
Easchdausstrohlung17. Oktoba 2001 auf Sat.1
Stab
RegieWerner Masten
DrahbuachFranz Xaver Sengmüller
ProduktionErnst von Theumer junior
MusiKristian Schultze
KameraRainer Lauter
SchnittMichael Breining
Bsetzung
Episodnlistn

Sioux City is a deitscha Feansehfuim van Werner Masten ausm Joar 2001 noch on Drahbuach van Franz Xaver Sengmüller. Es is de 31. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 17. Oktoba 2001 af Sat.1 ausgstroit worn.

Handlung[VE | Weakln]

Im Landkroas Bad Däiz-Woifradshausn soi a neie Touristnattraktion afmocha: „Sioux City“, a Westanstod, de wo da Andi Stadler zammad mid ondane af on Grundstick vo sein reichn Voda, an Bauan Karl Stadler, baut hod. Wia d’Resi Berghammer si vo iam Sohn Benno dorthi bringa losst, weis de Gastronomie ibanehma wui, entdeckt da Kommissar unta ara Blochan a Leich mid Stroafschuss. Es is da Karl Stadler, dea wo oba ned on da Valetzung, sondan on an Heazinfarkt gstorm is.

De Eamittlungan eagem, doss da Karl Stadler mid seine Buam Andi und Marco und aa mid seina zwoatn Frau Margret zstriddn woar. Letztare hod eam nua wegan Gejd gheiradt, und ia Tochta aus ara friahran Beziehung is no goar nia ned afm Stadlerhof gwen. Da Marco, dea wo sei obgwiatschofte Disco umbaun wui, hod sein Voda umasunst um finanzielle Huif ogschnorrt, und da Andi is granti, doss da Voda eam zeascht on Spinna ghoaßn hod, oba jetzad, wo s Projekt steht, af amoi a Pacht valonga woit.

Vo da Ex-Ehefrau van Opfa eafoart da Kommissar Berghammer, doss da Karl Stadler vor 20 Joar de domois 14-jährige Lisa Hartl, de wo jetzad in da „Sioux City“ ois Sängarin aftritt, vagewoitigt und ia danoch a Oart Obfindung vo 10.000 Mark zoid hod. Dera ia Freind, da Stefan Rohrmoser, fia den wo de Soch nei is, hod oiso emfois a Motiv.

D’Margret Stadler beobocht bei da Nocht, wia ia Stiafsohn Marco in ian Stoi eidringt und a Gwahr vasteckt, duad oba, wia wonns nix gmeakt häd. Wia an Marco sei Discothek duachsuacht wead, taucht zu seina Vawundarung genau de Woffn in sein Büro wieda af. Wei oba de Tia mid on handlsiblichn Schloss ausgstott is, losst si ned sicha beweisn, doss da Marco Stadler s Gwahr sejba dort vasteckt hod.

Wia da Polizist Anton Pfeiffer an familiären Hintagrund vo da Margret Stadler duachleicht und außafindt, wias vorm Heiradn ghoaßn hod, is fian Kommissar Berghammer ois kloar. Ea hoit de Roßpflegarin Sandra Billing vo Sioux City ob und bringts zun Stadlerhof. Vor de Augn vo iara Muada, da Margret Stadler, ehemois Billing, nimmt da Kommissar d’Sandra fest. De gibt zua, doss an Karl Stadler obsichtlich z’tod daschreckt hod, wei ea de gonze Famij tyrannisiat hod. Se sogt, se häds fia se olle gmocht. D’Margret Stadler sogt, doss se iara Tochta ban Telefonian am Tatomd vazejhd hod, doss da Karl, soboid’s dunkl is, on Rundgong duach Sioux City mocha wead.

Hintagrund[VE | Weakln]

Gfuimt worn is z Däiz und z Dasing (Western-City);[1] ois Schaublotz fia de „Pension Resi“ homs as Hollerhaus Irschnhausn heagnumma.

Kritik[VE | Weakln]

De Programmzeitschrift TV Spielfilm schreibt: „Statt ‚High Noon‘ kommt hier nur ein Karnevalskrimi mit müden Reitern daher.“ Fazit: „Sheriff Benno? Da wiehert der Saloonhengst.“[2]

Im Netz[VE | Weakln]

Beleg[VE | Weakln]

  1. Sioux City – derbullevontoelz.de
  2. Der Bulle von Tölz: Sioux City – Filmkritik bei TV Spielfilm