Der Bulle von Tölz: Strahlende Schönheit
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Strahlende Schönheit |
| Produktionsland | Deitschland |
| Originalsproch | Deitsch/Boarisch |
| Läng | 90 Minutn |
| Oitasfreigob | FSK 12 |
| Einordnung | Staffel 10, Foig 1 44. Foig insgesamt |
| Easchdausstrohlung | 15. Oktoba 2003 auf Sat.1 |
| Stab | |
| Regie | Wolfgang F. Henschel |
| Drahbuach | Doris Jahn |
| Produktion | Ernst von Theumer junior |
| Musi | Uli Kümpfel |
| Kamera | Thomas Schwan |
| Schnitt | Michael Breining |
| Bsetzung | |
| |
Strahlende Schönheit is a deitscha Feansehfuim van Wolfgang F. Henschel ausm Joar 2003 noch on Drahbuach vo da Doris Jahn. Es is de 44. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 15. Oktoba 2003 auf Sat.1 ausgstroit worn.
Handlung
[Werkeln | Am Gwëntext werkeln]Da Schönheitschirurg Dr. Gerhard Mattel wead im Röntgenraum vo seina Klinik tod afgfundn. S Röntgengerät muass manipuliat worn sei, wei nua so woar a stundnlonge Bestrohlung mid fost hundertfocha Dosis ibahapts megli. Außadem is de Tia blockiat und da Nodschlissl obgrissn worn; so hod da Dokta koa Schaas zun Nauskemma ned ghobt.
Dawei de Eamittlungan olaffan, taucht de Bleamalvakaifarin Esther Landwehr, as neie Gspusi van Opfa, in da Klinik af. Wias eafoart, doss da Dr. Mattel tod is, sinkts ohnmächti in de Oarm van Polizistn Anton Pfeiffer. Eam wead gschafft, doss ea de Peasonalien vo deara Frau feststejd, soboids wieda zua si kimmt. Wia’s so weit is, entwischts eam und foart in on rodn Auto mid on Sunnableaml wegga.
Fost olle Kranknschwestan hom si mehra oda weniga freiwilli ara Schönheitsoperation ban Dr. Mattel untazong, und wea ned in sei Schema passt hod, is nausgschmissn worn. De Sabrina Lorenz valongt de Peasonalakten und schaugt haptsächli af d’Obgäng. Dort findts an Naman Regula Meier, de wo ian Job valorn hod, wei ia bei da Operation a Gsichtsneav duachtrennt worn is.
Da Dr. Liebnitz gibt offn zua, doss ea an Dr. Mattel ghosst hod, oba ea vaschweigt, doss ea dem sei Nochfoiga ois Loata vo da Obteilung Plastische Chirurgie wean soi und doss ea Radiolog is. De Kriminala stellen eam a Falle und bringan eam in de gleiche Situation wia da Dr. Mattel woar, nua desmoi ohne Röntgenkopf. Da Dr. Liebnitz gibt on Code ei und kimmt außa. Aft wead ea ois dringad Tatvadächtiga festgnumma. Da Berghammer hod oba trotzdem Zweife on seina Schuid.
Laut Grichtsmedizina Dr. Sprung is as Zentrale Neavnsystem noch kuaza Zeit zasteart worn. Da Dr. Mattel woar oiso huiflos da stundnlongan Strohlung ausgsetzt und is quoivoi gstorm. Wei da Dr. Liebnitz ois Radiolog iba de Auswiakungan Bscheid woaß, häd ea, wonn ea da Täta warad, aa gwisst, doss as Obreißn van Nodschlissl koan Sinn ned mocht.
Wia da Polizist Pfeiffer grod midm Dr. Liebnitz zun Kommissariat untawegs is, entdeckt ea des rode Sunnableaml-Auto, mid dem wo de Esther Landwehr vaschwundn is, und vafoigt se so long, bis ea s Kennzoachn lesn ko.
De Kommissar bsuachn in da Stodgalerie a Ausstellung vo da Veronika Speichert, an Dr. Mattel sei Lemsgfährtin. De Kinstlarin stejd Gipsskulptuan aus, af de wo Röntgenbuidln projiziat wean. De Kommissarin Lorenz vadächtigt de Speichert, doss se an Dokta umbrocht hod, wei ea se wega ara Jingan valossn woit, außadem weis ozoagt worn is, weis de Bezugsberechtigung vo da Lemsvasicharung vo iam Lemsgfährtn af ian Naman gändad hod. De Tatsoch, doss de Urkundnfejschung eascht nochm Moard passiat is, spricht oba eha gega ia Tätaschoft; außadem hods a Alibi.
Wia in da Eaeffnungsred gsogt wead, doss a gwissa Rolf Meier on an uroidn Röntgengerät umanondatiftlt und so de Ausstellung in deara Form eascht megli gmocht hod, foit ban Benno Berghammer da Groschn: Da Rolf Meier muass da Bruada vo da Regula Meier sei. Ea is dea Elektrika, dea wo seina Muada on Leasingvatrog fia 15 Feanseha vamittlt hod und a oids Werbevideo fia de „Pension Resi“ kopian soid. Letztas hod da Kommissar duach de Zohlung vo on Trinkgejd untabundn. Des Video is eam peinli, wei ea draf ois Weabeträga fungiat.
Da Rolf Meier eagreift de Flucht und wui no a poar Socha aus sein Haus midnehma. Dort trifft ea af d’Resi Berghammer, de wo mid Nochdruck de kopiatn Videos eifordat. Wia de zwoa Kriminala dazuakemman, nimmt da Meier de Berghammerin ois Goasl und bedroht se mid on Messa. Dawei de Sabrina Lorenz und da Benno Berghammer af Vastärkung woartn, redt d’Resi Berghammer beruhignd afn Rolf Meier ei. Ea zoagt ia ra Buidl vo seina Schwesta Regula und vazejhd ia, doss ea ois kloana Bua wega seina Hosnschartn ghänslt worn is. Ea is eascht mid 15 Joar operiat worn. Sei Großvoda, dea wo eam und sei Schwesta afzong hod, is ibafordat gwen und hod gmoant, doss’s aa ohne Operation geht. Sei Schwesta is des Scheenste und Liabste gwen, wo ea ghobt hod, und do is dea „Doktor Frankenstein“ kemma und hod ia gonzes Lem zschniddn.
Da Kommissar Berghammer hod si dawei Zuatritt zun Haus vaschofft und ois midgheard. Da Rolf Meier losst si widastondslos festnehma.
Hintagrund
[Werkeln | Am Gwëntext werkeln]Gfuimt worn is haptsächli z Däiz;[1] ois Schaublotz fia de „Pension Resi“ homs as Hollerhaus Irschnhausn heagnumma.
Im Netz
[Werkeln | Am Gwëntext werkeln]- Strahlende Schönheit in der Internet Movie Database (englisch)
- Strahlende Schönheit bei Fernsehserien.de
Beleg
[Werkeln | Am Gwëntext werkeln]- ↑ Strahlende Schönheit – derbullevontoelz.de (Memento vom 29. Aprü 2016 im Internet Archive)
| Vorherige Foig 8. Oktoba 2003: Klassentreffen |
Episodnlistn | Nächste Foig 29. Oktoba 2003: Der Heiratskandidat |