Der Bulle von Tölz: Tod auf Tournee

Aus Wikipedia
Zur Navigation springen Zur Suche springen
Der Artikl is im Dialekt Obaboarisch gschrim worn.
Foig der Serie Der Bulle von Tölz
OriginaltitlTod auf Tournee
ProduktionslandDeitschland
OriginalsprochDeitsch/Boarisch
Läng94 Minutn
OitasfreigobFSK 12
EinordnungStaffel 2, Foig 2
6. Foig insgesamt
Easchdausstrohlung19. Jenna 1997 auf Sat.1
Stab
RegieWalter Bannert
DrahbuachClaus Peter Hant
ProduktionErnst von Theumer junior
MusiKristian Schultze
KameraHanuš Polak
SchnittIngrid Träutlein-Peer
Bsetzung
Episodnlistn

Tod auf Tournee is a deitscha Feansehfuim van Walter Bannert ausm Joar 1997 noch on Drahbuach van Claus Peter Hant. Es is de sechste Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 19. Jenna 1997 af Sat.1 ausgstroit worn.

Handlung[VE | Weakln]

De Resi und da Benno Berghammer gengan ins Theata. Se san vo da Resi iara Ziehtochta Hanna Liebknecht eiglon worn, de wo a Ensemblemitglied vo an Tourneetheata is. De Berghammerin daschreckt, wias vor da Vorstejung d’Hanna siagt, wei de fost nockad is.

Da Robert Rieber vo de „Tölzer Nachrichten“ suacht in da Garderob an Interviewpartna. De Maria Schranner stejt eam a „Story“ in Aussicht, de wo wia ra Bombm eischlong wead. Se wui oba eascht am nächstn Dog wos dazua song.

In oana Szene vo da afgfiahtn Komödie daschiaßt da Hausherr (gspuit van Boris Bartholdi) as Hausmadl (gspuit vo da Maria Schranner). Wia si außastejt, doss de Schauspuiarin wiakli tod is, ibapriaft da Kommissar Benno Berghammer de Woffn und siagt, doss mid schoarfa Munition glon woar. Wei praktisch a jeda van Tourneetheata Zuagang zu de Requisitn ghobt hod, san de Eamittlungan schwierig.

Da Boris Bartholdi sogt aus, doss ea de Maria Schranner eascht ban Tourneetheata kennagleant hod und privat nix glaffa is. Fian nächstn Tog hod ea an Termin mid sein Psychotherapeuten z Berlin ausgmocht; ea miaßad unbedingt higeh. Oba da Berghammer sogt, doss ea Däiz ned valossn deaf.

De Hanna Liebknecht moant, doss de Maria Schranner vielleicht de Rechnung dafia kriagt hod, doss de Monna an Kopf vadraht, oba koan drolossn hod.

Da Harald Berger vazejt da Kommissarin Sabrina Lorenz, doss d’Hanna Liebknecht eifasichti af d’Maria Schranner woar, wei de ban Publikum so guad okemma is. Obwoi d’Hanna d'Haptroin gspuit hod, is d’Maria da Publikumsliabling gwen, und so häd d’Hanna bei ara jedn Vorstejung a weng weniga okobt, oba des häd ia aa nix ghoifa.

Da Requisiteur Edgar Hübner, dea wo mit da Hanna Liebknecht vabandlt is, sogt, doss ea alloa fias Lodn vo da Woffn vaontwortli is; a Vawechslung vo da Munition schliaßt ea aus, wei as Tourneetheata oiwei bloß mid Plotzpatrona orbat. Im Vorstrofnregista siagt de Kommissarin Lorenz, doss da Hübner mehrane Delikt afm Keabhoiz hod. In sein Hotejzimma findts a Schochtl mid schoarfa Munition, vasteckt im Klavier, oba es san olle Patrona drinnad. Draf ogsprocha, eakleart ea, doss ea a Sportschitz is, oba wega seine Vorstrofn koane Woffn und koa Munition ned hom deaf. Nochdem ea vo da Hanna eafoarn häd, doss de Kollegin daschossn worn is, häd ea de schoarfe Munition ausm Theata ghoit.

Da Robert Rieber eafoart van Rezeptionisten van Hotej, wo de Theataleit obgstieng san, doss a gwissa Dr. Engelhard ogruafa und de Maria Schranner valongt hod; scheinboar hod ea nix vo ian Tod gwisst. Aft suacht da Journalist an Dr. Engelhard im Kranknhaus af und gibt si fian Kommissar Benno Berghammer aus. Da Oarzt sogt eam, doss d’Maria Schranner HIV-infiziat woar; wia dea hoaßt, dea wo se ogsteckt hod, woaß ea ned.

De Kriminala woin außafindn, ob de Maria Schranner a Gspusi ghobt hod. Im Kommissariat zoagt da Polizist Anton Pfeiffer eana de „Tölzer Nachrichten“ mid an Bericht iba de HIV-Infektion vo da Schauspuiarin. Da Berghammer und de Lorenz schliaßn draus, doss de Schrannerin ian Liabhoba oprangan woit, doss dea oba schnejja woar. In dem Moment kriagt da Berghammer an besn Oruaf van Dr. Engelhard; dea wui eam wega dem Artikl ozoang, oba da Kommissar ko eam davo ibazeign, doss ea teischt worn is.

Dawei hod as Tourneetheata an Easotz fia de Tode gfundn und es wead wieda probt, oba da Boris Bartholdi daboggd’s ned, an Obzug vo da Woffn z drucka. Wei ea Däiz ned valossn deaf, losst ea sein Therapeutn aus Berlin kemma. Da Bartholdi stejt eam an Kommissar ois Dr. Henkel vor.

Wia da Kommissar Berghammer eafoart, doss d’Hanna Liebknecht Rotzngift an de Maria Schranner gschickt hod, wei de iara a Haptroin in ara Feansehserie weggschnoppt hod, wui ea an Edgar Hübner vahoftn, wei ea glabt, doss de zwoa gmoasame Soch gmocht hom. Do gibt da Requisiteur zua, doss a zwoate Schochtl mid schoarfe Patrona gem hod, oba de is neamma dort gwen, wia ea de Munition bei da Nocht van Theata obghoit hod. De Hanna sogt, doss da Bartholdi oft mid sein Therapeutn telefoniat hod und noch Berlin gflong is, wonn ea irngdwia krank gwen is. Da Benno Berghammer hod an Geistesblitz und losst de zwoa laffa. Ea bsorgt si gnauare Informationa iban Dr. Henkel. Dea is koa Psychotherapeut ned, sondan a internationale Aids-Koryphäe. Des losst fia an Berghammer und de Lorenz an Schluss zua, doss da Bartholdi Aids hod. Se findn in sein Hotejzimma de vaschwundene Munitionsschochtl und schoarfe Patrona offn umanandalieng; außadem fejn a poar davo. De Kommissar foarn ins Theata, wo grod de Szene midm Daschiaßn van Hausmadl probt wead. De Theataleitarin Ruth Alberti is ogfressn, wei da Bartholdi wieda ned schiaßt, obwoi grod da Therapeut bei eam woar. Do hoid da Bartholdi sei Woffn an sein Schädl, mocht a umfossnds Gständnis und wui obdrucka. Wei de Kommissarin Lorenz beheazt eigreift, geht da Schuss danem.

Hintagrund[VE | Weakln]

Gfuimt worn is z Däiz, im Konzerthaus Ravensburg und ban Schloss Leutstetten;[1] ois Schaublotz fia de „Pension Resi“ homs as Hollerhaus Irschnhausn heagnumma.

Im Netz[VE | Weakln]

Beleg[VE | Weakln]

  1. Tod auf Tournee – derbullevontoelz.de