Der Bulle von Tölz: Tod am Altar
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Tod am Altar |
| Produktionsland | Deitschland |
| Originalsproch | Deitsch/Boarisch |
| Läng | 91 Minutn |
| Oitasfreigob | FSK 12 |
| Einordnung | Staffel 2, Foig 1 5. Foig insgesamt |
| Easchdausstrohlung | 18. Feba 1996 auf Sat.1 |
| Stab | |
| Regie | Walter Bannert |
| Drahbuach | Claus Peter Hant |
| Produktion | Ernst von Theumer junior |
| Musi | Kristian Schultze |
| Kamera | Hanuš Polak |
| Schnitt | Ingrid Träutlein-Peer |
| Bsetzung | |
| |
Tod am Altar is a deitscha Feansehfuim van Walter Bannert ausm Joar 1996 noch on Drahbuach van Claus Peter Hant. Es is de fimfte Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 18. Feba 1996 af Sat.1 ausgstroit worn.
Handlung[Werkeln | Am Gwëntext werkeln]
Da Pfoarra Martin Petermeier bricht bei da Sunndogsmess zamm und stiabt. De Dr. Riccarda Inninger, an Petermeier sei Hausearztin, sogt zun Kommissar Benno Berghammer, doss da Pfoarra vorm Gottesdienst an Asthma-Ofoi ghobt und sei Heaz woahrscheinli neamma midgmocht hod.
Im Pfoarrhaus trifft da Berghammer af d’Iris, a junge Drognobhängige. Ia fimfjährige Tochta Theresa is van „Lichtwerk“, ara katholischn Eirichtung, in Obhuat gnumma worn. D’Iris sogt „Sekte“ dazua, oba de Pfoarraskechin Maria Moser hoit de Leit fia oständi – streng katholisch und van Popst gsegnd.
Bei da Obduktion stejt si außa, doss da Pfoarra Petermeier vagift worn is. Ban Suacha noch an Motiv eafoarn de Kriminala Benno Berghammer und Sabrina Lorenz van Direktor Dr. Max Römelin, doss on da Schui intern eamittlt worn is, wei da Pfoarra as 13-jährige Schuimadl Eva vagwoitigt hom soi. De Pfoarraskechin findt dawei an Obschiedsbriaf van Madl; aft rennan de Kommissar ind Kiach, wos de Eva, mid Tablettn vagift, bewusstlos affindn und grod no rechtzeiti an Nodoarzt ruafa kennan. Bei da Vanehmung gibt de Eva zua, doss se si de Vagwoitigung bloß ausdenkt hod, wei da Pfoarra se ignoriat hod. Se woit de Gschicht zrucknehma, oba da Direktor hod’s iara vabodn.
Im Aftrog van Bischof suacht da Prälat Hinter in de Untalong van Pfoarra Petermeier Dokumente, wo eam hejfa kanntn, as „Lichtwerk“ eizbremsn, oba de san ned affindboar.
Vo da Kindagäatnarin van Lichtwerk eafoart da Berghammer, doss de Sophia, de Leitarin van Lichtwerk, an Pfoarra sein Tod in olle Oanzlheitn vorausgseng hom soi. Dawei ea draf woart, doss ma eam zu ia vorlosst, trifft er d’Iris. De frogt eam, ob ea se und ia Tochta ned do außebringa kannt. – De Befrogung vo da Sophia bringt leida koane neien Eakenntnisse.
Im Gejdbeidl van Pfoarra findt da Kommissar zwoa Foto: oans vo da Kati Römelin, de wo an Schuidirekta sei Frau is, und oans vo da Dr. Riccarda Inninger. Es stejt si außa, doss de zwoa Schwestan san. Af de persenliche Widmung af an Foto ogsprocha, sogt de Dr. Inninger, doss an Pfoarra Petermeier vor drei Joar in ara Asthmaklinik z Innschbruck kennagleant hod; ban Pfoarra sojn de Ofäi psychisch bedingt gwen sei, bei ia sejba is’s a Kotzn-Allergie.
Wia de Eamittlungan ins Stockn grodn, schickt da Berghammer sei Kollegin zun Lichtwerk. Se soi dort vadeckt eamittln und da Iris hejfa.
Da Bischof valongt vo da Leitarin van Lichtwerk, doss as Togebiachl van Pfoarra Petermeier außaruckt, oba de Sophia lahnt ob und schmeißt eam naus. De Kommissarin Lorenz heart des Gspräch mid und sorgt fia an Strohmausfoi, dmids ungseng ins Büro vo da Sophia geh und si as Biachl sejba untan Nogl reißn ko. Vor an Lichtwerk woart da Berghammer im Auto af sei Kollegin.
Im Togebiachl steht, doss da Pfoarra Petermeier a Vahäitnis mid da Kati Römelin ghobt hod und doss se a Kind vo eam eawoart. Außadem hod as Lichtwerk an Bischof in da Hond, wei dea emfois Voda vo an Kind is.
Da Direkta Römelin gibt zua, doss ea van Vahäitnis vo seina Frau mid an Pfoarra gwisst hod; aa gibt ea de Schmiararei an da Kiachnmaua zua, oba midm Moard wui ea nix z doa hom; zua froglichn Zeit wui ea dahoam gwen sei. Ois Zeigin fia sei Alibi gibt ea sei Frau o; de is oba auszong und vaschwundn; zeascht hod se oba no iare Konten laargramt.
Ois Nächsts foarn da Berghammer und de Lorenz af Waging am See, wo da Pfoarra am Moarddog in da Fria an Unfoi mid Foaraflucht vauasocht hod. In da Pizzeria eafoarns, wo da Petermeier und de Kati Römelin eana Liebesnest ghobt hom, und findn dort de Restln van gmoasamen Essn.
Da Benno Berghammer gibt an Bischof as Togebiachl van Pfoarra, dmid ea an Lichtwerk an Riegl vorschiam ko, ohne doss ea länga eapressboar is. Mid da Huif vo da bischeflichn Intervention ban Jugendamt kennan d’Iris und ia Tochta aus da Sekte aussteing.
Wia de Kati Römelin endli gfundn wead, nehman de Kommissar se fest, obwoi se sogt, doss fian Moard koan Grund ned ghobt hod, wei da Pfoarra schliaßli da Voda vo iam Kind woar. Do kriang de Kriminala doh Zweifl, wei as Gift ned nua oral, sondan aa duach Inhalation vaobreicht worn sei kannt. As Letztere dad sofort wiakn; bei da oralen Variante dageng ko's scho aa amoi ocht Stundn dauan. Ban Duachgeh vo da Peasona mid Motiv stejd da Benno Berghammer fest, doss de Dr. Riccarda Inninger si am unaffälligstn vahoidn hod. Im Kommissariat zoagt ea ia de peasenlichn Sochan, wo da Pfoarra zletzt eigsteckt ghobt hod. Do kimmt de Sabrina Lorenz mid an Katzal afm Oarm ins Büro. Aft grot de Dr. Inninger in Panik und kriagt an Asthma-Ofoi. As Spray van Pfoarra Petermeier, des wo da Berghammer ia obiat, wuis ned hom. Fian Kommissar is des a kloara Beweis, doss se fia an Giftmoard vaontwortli is. Wias ia oagns Spray inhaliat und an Ofoi in Griff kriagt, gibts zua, doss an Pfoarra fia iare Schwesta umbrocht hod, wei da Petermeier as Lem vo da Kati ruiniat hod.
Hintagrund[Werkeln | Am Gwëntext werkeln]
Gfuimt worn is z Däiz, im Klosta Benediktbeiern, im Wossaschloss Sandizell und im Klosta Au am Inn;[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik[Werkeln | Am Gwëntext werkeln]
De Programmzeitschrift TV Spielfilm schreibt: „Ottfried Fischer sorgt immer wieder für pfundige Abwechslung im Serien-Einerlei. – Ellen Schwiers, die die Sektenführerin Sophia spielt, ist übrigens die Mutter von Katerina Jacob.“ Fazit: „Dank Fischer eine possierliche Provinz-Posse.“[2]
Im Netz[Werkeln | Am Gwëntext werkeln]
- Tod am Altar in der Internet Movie Database (englisch)
- Tod am Altar bei Fernsehserien.de
Beleg[Werkeln | Am Gwëntext werkeln]
- ↑ Tod am Altar – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Tod am Altar – Filmkritik bei TV Spielfilm
| Vorherige Foig 4. Feba 1996: Palermo ist nah |
Episodnlistn | Nächste Foig 19. Jenna 1997: Tod auf Tournee |