Finessensepperl

Aus Wikipedia
Wexln zua: Navigation, Suach
Der Artikl is im Dialekt Obaboarisch gschrim worn.
Da Finessensepperl

Finessensepperl wor da Spitznam vum Joseph Huber aus Minga (geb. 1763 z Minga, gest. 26. April 1828 z Minga), wo zu seina Zeit s bekanntaste Mingara Original wor, a Liabesbriaftroga, a legendeara Stodnorr und a Ortsheiliga zglei.

Lem und Nochlem[VE | Weakln]

Da Finessensepperl, da Suhn vo am Kutscha, wor mit 1,50 m kloawichsig oba woiproportioniat. Sein Lemsuntahoid hod a ois persenlicha Liabesbriaftroga vadeant. Er wor in oin Stodtein untawegs. Fia de Mingara Biaga wor a da easchte und imma vaschwiegane "Postillion d´Amour", dea wo bloß gegn wos zum Essn oda fia a poa Kreiza Liabesbriaf zuagstejt hod. Er hod ned lesn und schreim kenna, wor oba ungwähnlich schlau. Er hod imma genau gwisst, wiavui Kreiza er ois Lohn kriagt hod. Bettlt hod a nia, oba sei Gsichtsausdruck hod Bände gsprochn, so hod a oft s Zehnfoche vo dem kriagt, wos a ois Porto valangt hod und a guads Essn no dazua.

Sei Liabste wor de "roude Nanni", de ebmfois kloawichsig wor und aa a weng narrisch. Zamma san se oft durch Minga ganga. Jeda hod se kennt, vom Kini bis zum Bettla. Da Finessensepperl hod imma a schwoarz Ledakappal afghoft und an kuaz gschnittanan Spenzer trogn. Dazua hod a imma a Kerbal mit an doppetn Bodn dabei ghobt; obn fias Essn untn fia de Liabesbriaf sowia a Hafal fia de Klostasuppn, de er si oft ghoid hod.

Er is im Oidn Siidlichn Friedhof begrom worn, sei Skelett is oba makabaraweis a Zeit lang in da Anatomie ausgstejt gwen. Im Mingara Rathaus gibts no heit a Figur zu seim Gedenkn, so wiara im Valentin Musäum und untam Torbogn vom Karlstor am Stachus.

Sprich[VE | Weakln]

Obwoi sei Gsichtsausdruck oanfejtig und moastns griasgrämig gwen is, is a wegn seine schlaun, witzign und skurriln Sprich scho zu Lebzeitn a Legendn gwen. Af neigierige Frogn hod a moastns gsogt: "Nix Gwiss woass ma ned", wos de Leit zum Locha brocht hod und schnej zum Liablingssprichwort vo de Mingara worn is. Wiara amoi ban Ibagem vo oam Liabesbriaf dawischt worn is, hod a gsogt: "Koan Liabesbriaf hob i ned, san grod Radi, do muass i scho bittn sehr um Gnadi, do kinna S no an Kreiza segn. Mehra bring i ned mit - Radi zwegn!" Wiara gfrogt worn is, wo a wohnt, hod a gsogt: "Drei Stiagn oban Kamin".

Schau aaa[VE | Weakln]

Beleg[VE | Weakln]

  • Ulrich Holbein: Narratorium - Lexikon. Amman Verlag, Zürich 2008. ISBN 978-3-250-10523-7
  • A. Nerlich, O. Peschel, F. Parsche: Warum der "Finessensepperl" so klein war. Münchn. Med. Wschr. 133 (50), 12 - 16 (1991)

Im Netz[VE | Weakln]