Involtini alla siciliana

Involtini alla siciliana aus Koibfleisch, do mid Fisoin und Eadäpfe

De Involtini alla siciliana san a tipischs Haptgricht vo da sizilianischn Kuche. Involtino is's italienische Woat fia Rouladn.

Im Grundrezept wean fia de Rouladn dinne Koibfleischscheim vawendd. Fia de Fuijung wead a dicke Béchamelsauce mid Schinkn- und Kaaswiafl, Pinienkeane und Brodbräsl ogreichad und mid Lorbeer gwiazd. De Koibfleischscheim wean kuaz in Olivnöj obrodn, mid da Béchamelsauce bstrichn und afgrojd. Oschliaßnd weans mid griemnan Kaas und ogräsdne Brodbräsln bedeckd und im Ofn iwabockn.

Je noch Region wean stott'm Koibfleisch aa Schwertfiisch- oda Auberginenscheim vawendd. Saviad wean de Involtini alla siciliana meisd mid Salod und frischm Brod.