Klytemnestra

Klytemnestra (Κλυταιμ[ν]ήστρα = Klytaim(n)estra) is in da griachischn Mythologie de Dochta vum Spartanakini Tyndareos und vo da Leda. Klytemnestra is as Wei vum Agamemnon, am Kini vo Mykene, und de Schwesta vo da scheenen Helena. Se hod via Kinda Iphigenie, Orestes, Elektra und Chrysothemis.

De Klytemnestra hosst ian Mo Agamemnon, wei dea ia gmoasame Dochta Iphigenia opfan woit, nua um an ginstingn Wind fian Kriagszug noch Troja z kriagn. Duach de Geddin Artemis wead de Iphigenie owa af de Insl Tauris in Sichaheit brocht, ohne dass des irgenwea meakt. Olle Menschn glaam, se is gopfad worn. Klytemnestra is vo Racheduascht besessn. Wia da Agamemnon vum Trojanischen Kriag zruggkumma is, bringt s eam zamma mit ian Liabhoba Aigisthos um. Aa de Kassandra, wo da Agamemnon vo Troja mitgnumma hod, wead umbrocht.

Elektra bitt ian Bruada Orestes um Bluadrache. Owa eascht wia des Orakl vo Delphi eam ocht Joar spada dazua rot, mochta si afn Weg z Mykene und bringt sei Muada und sein Stiafvodan um.

Schau aa Tantaliden, Elektra

Im Netz

Commons: Klytemnestra – Sammlung vo Buidl, Videos und Audiodateien