Legio II Italica

Aus Wikipedia
Wexln zua: Navigation, Suach
Der Artikl is im Dialekt Owaöstareichisch gschrim worn.
Römische Legion in Schüdgrodn-Foamazion (testudo)

D Legio II Italica (zwoate italische Legion) woa a römische Legion, de fum Kaisa Marcus Aurelius im Joa 165 noch Grisdus gemainsaum mid da Legio III Italica in Italien ausghom woan is, zu ana Zeid wo s römische Reich glaichzeitig am Limes in Geamanien, an da Donau geng de Markomanen und im Ostn geng de Partha im Griag woa. D zwoate italische Legion woa bis ins 5. Joahundat in da Brovinz Noricum schdazioniad und doat foa oim im heiting Owaestareich und in Nidabaian südlich fu da Donau.

Gschicht[VE | Weakln]

Noricum[VE | Weakln]

Da Markomanen-Iwafoi auf Noricum und de Pannonia Prima im Joa 170 noch Grisdus
römische Münzn de untam Septimus Severus fia d Legio II Italica bregt woan is, links: da Kaisa Septimus Severus, rechts: s Legionssimbol mid n Romulus und Remus
Schdömpi fu da II Italica, dea auf am Züagischdoa in Wean, baim Haus Am Hof 4 gfundn woan is

S Haupteinsozgebid fu da Legio II Italica woa in Noricum und d Legion hod doat de Donaugrenz fum remischnReich fadaidigt und woa untam Marcus Aurelius in dn Griag geng de Markomanen dabai. S Legionssimbol woa s Woif-Waiwi mid de Zwiling Romulus und Remus, wos a a Zaichn dafia woa, dass de Legion diarekt in Italien ausghom woan is und zu mindest am Aufaung aus römische Soidodn beschdaundn hod. Im Joa 180 is d zwoate italische Legion fix in Lauriacum schdazioniad woan, am remischnOat und Kastel dea baim heiting Ens in Owaestareich gleng is.

Untam Septimus Severus[VE | Weakln]

Im Joa 193 wiad noch da Eamoadung fum Kaisa Pertinax wiad in Carnuntum da Genaral Septimus Severus fu de an da Donau schdazioniadn Legionen zum neichn Kaisa ausgruafn und d II Italica maschiad gemainsaum mid eam noch Rom im Kaumpf um de Foamocht im remischnReich. Nochdem si da Septimus Severus ois neicha Kaisa duachgsezt hod, wiad d zwoate italische Legion fu eam noch Ostn gschikt zeascht geng d Rebeljon fum Pescennius Niger und daun gengan Clodius Albinus. Nochdem baide nidagschlong woan han, is d Secunda Italica baim Septumus Severus seim Griang geng de persischn Partha dabai.

Im 3. Joahundat[VE | Weakln]

Im 3. Joahundat woa de II Italica baim Maximinus sein Griag in Dacia dabai und noch de iwalifatn Beleg zan schliassn, mindestns bai oam Födzug geng de Westgotn. Baim Konflikt zwischn am Kaisa Gallienus und seim Rivaln in Postumus is d zwoate italische Legion in Kaisa drai blim und hod auf des aufi in Eantitl Pia V Fidelis V (fimf Moi blichtbewust, fimf Moi in Kaisa drai) griagt. A bai schbedane inteane Konflikt im remischnReich woa de Legion oiwai auf da Seitn fum jewailing Kaisa und hod si nia an am Milideabutsch bedailigt.

Untam Diocletian[VE | Weakln]

In da Zeid fum Diocletian woa d II Italica oiwai nu in Lauriacum in Noricum schdazioniad, wo zu iara Untaschdüzung d neiche Legio I Noricorum aufgschdöd woan is. In deara Zeid is a zua Bewochung fu da Donau zusezli a nu a Schifsflotn aigricht woan, de in Favianis/Mautern und Lauriacum/Loach schdazioniad woa.

Untam Konstantin[VE | Weakln]

A Genarazion schbeda is a Untaobdailung fu da zwoatn italischn Legion noch Divitia/Deutz an d Rheingrenz obkomandiad woan, de s doatige römische Kastel auf da gengüwaligadn Seitn fu Köln bewocht hod. Aus deara Ainheit is schbeda a aigene Legion gmocht woan, de Legio II Italica Divitensium, de nochhea nu a wichdige Roin gschbüd hod und gemainsaum mim schbedan Kaisa Konstatin I fum Rhein noch Rom maschiad is und bai da berümtn Schlocht an da Milvinischn Brukn im Joa 312 dabai woa.

Am End fum Römischn Reich[VE | Weakln]

Im 4. Joahundat hod de Dopilegion II Italica zua mobiln Födarme ghead, de im Hintalaund schdazioniad woa und bai ana Bedroung doat hii gschikt woan is, wo Geamanen üwan Limes drüwa san. Am End fum remischnReich im 5. Joahundat wiad in da lezdn faleslichn milidearischn Beleg, da Notitia Dignitatum, d Legio II Italica Pia Fidelis ois oiwai nu an da Donau in Lauriacum schdazioniad eawent, wo s gemainsaum mid da I Noricorum de Donaugrenz fadaidigt hod. Dano faliad si jede Schbua, im Buach fum Lem fum Heiling Severin fu Noricum, da Vita Sancti Severini, gibt s koan Hinwais mea, das nu a intakde Legion an da Donau gwen wa.

Schau a[VE | Weakln]

Beleg[VE | Weakln]