Legio I Noricorum
| Der Artikl is im Dialekt Owaöstareichisch gschriem worn. |
D´Legio I Noricorum (easchde noarische Legion) woa a römische Legion, de untam Kaisa Diocletian (284-305) in da Brovinz Noricum aufgschdöd woan is und laung im heiting Nidaestareich schdazioniad woa. Zu da easchdn noarische Legion hod a a Flotn fu Schif ghead de gemainsaum mid ana Rai fu Kasteln de Donau im östlichn Noricum ripense geng Aungrif fu Geamanen fu da nöadlichn Sait fu da Donau bis ins 5. Joahundat aini bewocht had.
Zu da Zeid fum Diocletian is d'römische Arme schdoak umbaud und faendat woan. In deara Refoam san an Haufn neiche Legionna aufgschdöd woan, de owa fü kleana woan ois wiad dafoa und ois mobile Schbezialainheitn an da Grenz schdazioniad woan san. Da Oat Favianis an da Donau (maunchmoi a "Favianiae" gschrim) wiad daduach zum Quartia fia de neiche easchde noarische Legion und damid zu am wichdign Zentrum fum remischnMilidea nöadlich fu de Oipn. Zua gleichn Zeid woa in Lauriacum, baim heiting Ens in Owaestareich, schau seid 172/173 noch Grisdus d'Legio II Italica schdazioniad, de in westlichn Tei fu Noricum ripense bewocht hod. D'Donauflotn fu da Legio I Noricorum woa a fian westlichn Tei zuaschdendig und hod de II Italica so fum Wossa aus untaschdüzt.
Aus'n lezdn Joazent fum 3. Joahundat is uns a a Opfainschrift fu am Ofizia fu deara Legion an dn Got Mithras iwalifat. De Inschrift is in Virunum gfundn woan, da domoling Brovinzhauptschdod fu gaunz Noricum und de ned waid fum heiting Klongfuat in Keantn gleng is. S'Hauptquartia fu da easchdn noarischn Legion woa s'Kastel Adiuvense, wos baim heiting Ibs an da Donau ligt und Favianis, wos des heitige Mautan an da Donau is.
D'Legio I Noricorum wiad a nu am Aufaung fum 5. Joahundat in da Notitia Dignitatum ois in Favianiae schdazioniad aufglist und hod a Einheitn in da benochboatn Brovinz Pannonia Prima ghobt. Fia d'Brovinzn Pannonia Prima und Noricum hod's um s'Joa 400 noch Grisdus a an gemainsaumen milidearischn Komandantn gem, in Dux Pannoniae Primae et Norici. Dano faliad si owa de Schbua und am End fum 5. Joahundat woa d'Grenz an da Deana neama bewocht. In da Zeid fum Severin fu Noricum, dea 482 in Favianiae gschdoam is, hod's de Legion auf jedn Foi neama gem.
Schau aa
[Werkeln | Am Gwëntext werkeln]Beleg
[Werkeln | Am Gwëntext werkeln]- de.Wikipedia: Legio I Noricorum (gseng am 12. Nofemba 2007)
- Groh, Stefan; Sedlmayer, Helga: Forschungen im Kastell Mautern-Favianis - die Grabungen der Jahre 1996 und 1997 , Wien: Verlag d. Österr. Akad. d. Wiss., 2002, 612 S., ISBN 3-7001-3078-3 (Der römische Limes in Österreich, 42)
- www.imperiumromanum.com - Die Legionen des Imperiums: LEGIO I NORICORUM
- Zeitschrift für klassische Archäologie 5 / XII / 1997 Neue Ausgrabungen im römischen Auxiliarkastell Mautern-Favianis und im östlichen Lagervicus (Niederösterreich)
- www.livius.org Legio I Noricorum (Englisch)
- aeiou Österreich-Lexikon Favianis