Liachtnstoaklomm
| Der Artikl is im Dialekt Pongaurisch gschriem worn. |
| Liachtnstoaklomm Liechtensteinklamm | |
|---|---|
| Log: | St. Johann im Pongau (Soizburga Lond, Estareich) |
| Läng: | 4 km |
| Tiafm: | bis zu 300 m |
| Gwässer: | Groussorler Ochn |
| Zuagänglich: | 1 km (vo 4 km) |
| Effnungszeitn: | nur im Summer |
| Bsuchazoihn: | 100.000 Leit/Jouh |
| Webseitn: | www.liechtensteinklamm.at |
 | |
 | |
D' Liachtnstoaklomm (Hochdeitsch: Liechtensteinklamm) is a Klomm, an etler Kilometa vo Saiger Hons (Soizburga Lond) aweg und is ois Ausfluugszij seahr beliab.
Oigmoans
[Werkeln | Am Gwëntext werkeln]D' Klomm houd a Läng vo ebber 4 km, doudavo sand 1 km fir Bsuacher zuagänglich. D' Fejsn sand bis za 300 m tiaf. An monche Stejn is d' Klomm oft nur an etler Meter broad. D' Klomm is iwa Hoizsteeg z' besichting, de oiwei auf Sicherheit iwawocht wernd. Am End vom begehborn Sticki vo da Klomm befindt si a Wossafoi. Iwa d' Wintermonat is s' gschlossn. Jeeds Joahr weadsvo iwa 100.000 Leit bsuacht.
Gschicht
[Werkeln | Am Gwëntext werkeln]In da letztn Eiszeit hom bis za 300 m houche Gletscher de Täla und Berg vom Pongau bedeckt. Wia si as Kliima wieder gwondlt houd, houd d' Urgwoit vo d' Gletscher durchs obschmejzn d' Haupttäler ausgschliffm. D' Foing vo dem sand meterhouche Gländekonntn zua d' Seitntäler hi gween. Da Grossouler Gebirgsbouch houd si im Lauf vo Joahrtausndn an Weeg durch d' Konntn groum und houd schliasslich d' Schlucht de fost 300 m tiaf is aussagroum.
Nouch a poar vageebliche Vasuach is s schliasslich na Hond voi Pongauer Oipmvareismidgliedan 1875 glunga d' Klomm zan daschliassn. Im Lauf vo da Orwat is eana owa decht as Gejd ausgonga und se hom se on an Firscht Johann II vo und zua Liachtnstoa gwondt, der wous im naachandn Grossoul a Jogdwirtschoft betriem houd. Mid na Spendn vo 600 Guidn houd d' Daschliassung 1876 voiendet wern kenna. Seither hoasst d' Klomm „Liachtnstoaklomm“.
Saaga
[Werkeln | Am Gwëntext werkeln]Da Schmiad vo Owaoul in da Plankenau bei Saiger Hons houd sei vakrippite Tochter am Taifi vaschriem, wonn eam da Sejm d' Gastoaner Quejn vur sei Haisl bringa daad. D' Bedingung is owa decht gwesn, dass des Werk voiendet sei hätt miassn, bevur da Hoh in da Friah zan easchtn Moi as krah ofong. Da Taifi is auf den Pakt eigonga und houd in da finstan Noucht mid seiner Mochnschouft ogfonga. As Weib vom Schmiad - ois listige Hex bekonnt gween - houd vo dem Gschäftl an Wind kriag. Rosch entschlossn, woitad sie da mosslosn Giar vo ihrm Mo a End bereitn und houd an Hoh kurzum in 'n Brunnentroog taucht, so dass der vurm Dogobruuch zan krah ogfonga houd. Wia da Taifi vurm Dogbeginn mid de Quejn grod iwa d' Klomm gfloong kemma is, hod a z' Owaoul an Hoh krahn ghert und houd vabittascht feststejn miassn, dass a z' spaad kemma is. Wuatentbronnt hod a d' Quejn in d' Tiafm vo da Klomm oichi gschmissn so dass s koa Mensch jemois meahr fossn ko.
Bis heid is s aa decht nid glunga, s Heilwossa vo d' Quejn zan dafossn und fir Netzwerke ozloatn. Sie dagiassn si weidahi in d' Grossouler Ochn.
Webseitn
[Werkeln | Am Gwëntext werkeln]
Commons: Soizburga Lond – Oibum mit Buidl, Videos und Audiodateien