Liptauer
| Der Artikl is im Dialekt Weanarisch gschriem worn. |
Liptauer is a pikanta Brodaufstrich aus da ungarischn und östareichischn Kuchl. Da Liptauer is a typischa Aufstrich bei an Heirign. Da Nauman kummt aus da slowakischn Region Liptau, de wos bis 1918 zum Ungarischn Kenigreich in Österreich-Ungarn ghead hod.
An Liptauer mocht ma heizdog aus an Topfn, dea wos mit ana Butta zu ana Krem z'sammg'riaht wiad. Des ungarische Originäu hod ma aus an Brimsen gmocht, des is a gsoizana Frischkaas aus Schofsmüch. Dazua kummt in da urspringlichn, baialichn Fuam no a Paprikapuiva, a Kimme, a Pfeffa und klaagschnittane oda griebane Zwifln. Heit gibt ma oft aa no Kapern, Sempf und kla gschnittane Guakaln dazua. Da Liptauer wiad ois Brodaufstrich oda zum Eintunka ('Dip') serviat.