Raidió na Gaeltachta

Aus Wikipedia

Raidió na Gaeltachta (RnaG) is a Senda in Irland, aaf den wo blos Gaeilge, oiso Irisch, gredt wead, de keltische Schbroch vo Irland, owa koa Englisch ned. Irisch und Englisch hom praktisch nix mitananda z doa.

RnaG ghead zun effentle-rechtlichn Radio Telefís Éireann (RTÉ), des wos dazua no drai Radio-Programm aaf Englisch aussastroid. Aafgmacht homs RnaG in 2. Aprü 1972. Des woa da Ostasunntog. In Ambfang hot ma RnaG blos in da „Gaeltacht“ einakriagt, oiso in de bsundana Gaia in Westn vo da Insl, wo stuckara 80.000 Laid haid no Irisch rehn - und blos nehmbai Englisch.

Haidzadog kriagt ma RnaG in ganz Irland iwa Antenna eina. Erschtns, wai s iwaroi in Irland a bor hunadtausad Laid oda mera git, de wo adiam Irisch rehn, aa wenn s ned in da Gaeltacht dahoam san. Und zwoatns, wai ma se gsogt hot, dass a Radio-Senda aaf Irisch aa Laid, de wo normal Englisch rehn, drauf bringt, dass s Irisch eftas ohuacha. Irisch lernt ma ja in Irland zmindast amoi in da Schui, owa normai blos ois „de aigane Fremdschbroch“.

Raidió na Gaeltachta is dahoam in Casla in Conamara in Gaillimhe/Galway ganz waid drausd in Westn an Atlantik. Andane Redakziona san in Baile na nGall (Ciarraí/Kerry), Doirí Beaga (Dún na nGall/Donegal) und logisch in da Hauptschtod Baile Átha Cliath/Dublin. Es arwan stuckara 80 Laid vo Raidió na Gaeltachta.

Und aa in Internet ko ma Raidió na Gaeltachta 24 Schtund in Dog einakriang aaf http://www.rte.ie/rnag - rechts om auf "RnaG Beo" (RnaG in direkt).