Tschauner-Bühne
De Tschauner-Bühne is a Theata im 16. Hieb (Ottakring) in Wean, wos hauptsächlich ois Stegreifbühne vawendt wiad (Stegreif haaßt, doss zwoara Konzept gibt, um wos s in an Stickl geht, owa sunst is da Text ausn Huat). Nem dem gibz obaraa Kabaree, Konzeat und aundare Kuituagschichtln zum segn.
Gschicht[Werkeln | Am Gwëntext werkeln]
Augfaungt hoz mid da Tschauner-Bühne im Joah 1909. Do hod da Theatadirektoa Gustav Tschauner a Summabühne in da Bree (heite da 20. Hieb, Brigittenau) grindt. Da Sööbige haut daunn im 38a Joah (do hoda scho an Fuffzga am Buckl ghobt) de Karoline gheirot, de wos zwoa eascht neinzehne woa, owa ois Douchta von da Schaustölla-Famülie Rudolf de Bühne von de Öötan in de Ehe mitbrocht hod (de is in da Kendlastroßn in Ottakring gwesn). Se san mid eahnan Theata in de Ganglbauergossn umzogn, wos daun bis 1957gspüüt haum (während n Kriag sööba woa olladings Pause). Noocha sans noamoi umzoogn, in de Maroltingergossn 43, do homs 1959 in Spüübetrieb aufgnumman.
Wia da Gustav Tschauner im Joah 1961 gstuam is, is de Bühne in a schwaare Krisn einegrutscht. Owa de Witwe woa zaach und hod uman Eahoit vom Theata grafft. Des hoz ned nua gschofft, sondan des Theata is wieda zu aana Instituziaun im Weana Kuitualeem wuan. Im Joah 1987 hod de Tschaunarin de Bühne auns Weana Voiksbüdungsweak vakauft. Jezan wiad de Bühne vom Prof. Franz Strohmer und in Paul Balon gfiaht.
Wäu des Theata kuaz vuam Eistiazn woa, haum sas 1988 oreissn miaßn. Godseidaunk haum si de Stod Wean und a boa Sponsoan krozt, und am 4. Juli 1989 is wieda aufgmocht wuan min Nauman Original Wiener Stegreifbühne, vormals Tschauner. [1] [2]
De neiche Intendantin, de Zemlyak Anita, hod 2010 Tschauner Reloaded ins Leem gruafn. Im Weana Theatasumma wean Klassika wia da Jedermann, Schneewittchen & Co. und Die Geierwally aufgfiaht.
Beleg[Werkeln | Am Gwëntext werkeln]
- ↑ A boa Joahreszoin. Archiviert vom Original [1] am 13. Jenna 2016; abgerufen am 1. Dezember 2015.
- ↑ In da Wiki von da Gemeinde Wien. Archiviert vom Original [2] am 7. Meaz 2016; abgerufen am 1. Dezember 2015.
Im Netz[Werkeln | Am Gwëntext werkeln]
Commons: Tschauner-Bühne – Sammlung vo Buidl, Videos und AudiodateienKoordinaten: 48° 12′ 28,9″ N, 16° 18′ 16,2″ O