Viejas Locas

Der Artikl is im Dialekt Owaöstareichisch gschriem worn.

Viejas Locas
S'Bandlogo
da Start:	1989
Genre:	Rock (Stone Rock), Blues, Reggae
Webseitn:	viejas-locas.com.ar
Grindungsmitgliada
E-Boss:	Bachi
Gsaung:	Mauro Bonom
E-Gitar:	Cristian „Pity“ Alvarez
E-Gitar:	Diego Cantoni
Schlogzeig:	Gaston Mansilla
Letzte Mitgliada
Gitar, Gsaung:	„Pity“
Gitar, Chor:	Sergio „El pollo“ Toloza
Boss, Chor:	Fabian „Fachi“ Crea
Schlogzeig, Percussion:	Abel Meyer
Keyboard:	Burbujas Perez
Saxophon:	Juancho Carbone
Mundharmonika:	Peri Rodríguez

D'Viejas Locas (spanisch fia „oide varuckte Weiba“) woan a argentinische Rockband vu de spädn Neinzga-Joa, de wos aus ana südlichn Voastod vu Buenos Aires kemma is. D'Viejas Locas haum einige Stilelemente vu de Rolling Stones üwanumma und de Merkmale in vü vu iare Liadln mit aundare Musikrichtungen vamischt, wia zum Beispü mim Blues. Dea spezielle Stil is im lateinamerikanischn Raum ois Stone Rock, dea em noch de Rolling Stones bnamslt is, bekaunnt. Im Joa 2000 hod si de Band aufglöst, da „Pity“ und da Abel san iatst bei da Band Intoxicados aktiv, aundare Ex-Viejas Locas musizian heidzutogs bei Motor Loco und bei La Lengua.

Eana Naum und eana Aussog

Viejas Locas is a spanische Bezeichnung vu de Madres de Plaza de Mayo. Des woan d'Miata vu Leid, de währnd da Militäadiktatua in de Siebzga-Joa vaschwundn san und desweng auf d'Stroßn demonstrian gaunga san. Iagnda hochs Viech hod de Miata moi viejas locas - varuckte oide Weiba - gruafn und so haaßt oiso aa de Band. De Idee, dass si de Band so nenna kinnat, is vum easchtn Sänga kemma, im Mauro Bonom. („Mia haum imma gsogt, dass ma, soboid ma a Band hom, de daun Viejas Locas nenna wean.“)

D'Viejas Locas bekennan si in mearare vu eanare Liada zum Konsum vu Marihuana und Alkohoi - zum Beispü in de Songs ¡Legalízenla! („Legalisierts is!“) bzw. Botellas („Floschn“). S'Bandlogo deitt aa auf des hi, weils aus am ziemli fertign Aug besteht, des vu zwa Cannabisbletschn eigrahmlt is. Aundaraseits findn si oba aa gsöischofts- und sozialkritische Texte (Bsp: Niños, „Kinda“) und Söibstkritik (Una espina en el ojo, „A Doan im Aug“). Liade, de si üba Liebe drahn, homs oba aa gschrim.

Bandgschicht

Nochdem de Band schon ob 1989, oiso schau voa da eigntlichn Grindung existiad hod, san de Viejas Locas 1992 komplett umgebaut woan und netta da „Pity“ is bei da Band blim. Ea und de neichn Mitglieda - da Fachi, da Pollo und da Abel - hom 1995 s'Album Viejas locas aufgnumma, 1997 daun Hermanos de sangre („Bluadsbriada“) und 1999 daun schau d'letzte gemeinsaume Plottn, Especial („Spezial“). Warum si de Gruppm im Herbst 2000 daun aufglöst hod, is bis heid net wiakli gekläat woan.

Wia 1997/98 de Rolling Stones duach de Gegnd tourt hom, hom de Viejas Locas ois Support-Band mitmocha deafn.

Diskografie

• 1993: Una noche en La Cueva („A Nocht in La Cueva“; des is a Sampler, auf dem Auftritte vu mearare Gruppm im Lokal La Cueva drom san)
• 1996: Viejas locas (mitm Liadl Intoxicado, noch dem si vielleicht im Pity sei Nochfoigeband benaunnt hod)
• 1997: Hermanos de sangre
• 1999: Especial
• 2002: Sigue pegando - grandes exitos (Best of)

Im Netz

• Offizielle Website
• Viejas locas auf rock.com.ar (spanisch)